Palajatka karaloʼuta namüinjatka na chajanakana Tesalónica 1:1-10
1 Karaloʼutakat tüü, tashajala tayakai Pablo, anii tamaa chi wawalakai Silvano otta müshia Timoteo. Karaloʼutakat tüü, namüinjatü na anoujashii chakana Tesalónica, na paaʼinwakana nümaa chi Washikai Maleiwa jee nümaa chi Señotkai Jesucristo:
Kasataalejeseʼe kamaneein jümüin chi Maleiwakai jee jimatüin jaaʼin nutuma.
2 Waapawalin analuʼutkat waneepia nümüin Maleiwa jaaʼu woʼuraajapa jüpüleerua nümüin.
3 Sotusü waaʼin waneepia nuʼupala chi Washikai Maleiwa tü jiʼyataainkat nümüin saaʼujee kanoulain jia, jaaʼinrüin wanee kasa süka wayuuin aipüralii jia otta jüchecherüin jaaʼin süka jütüjaain saaʼu jiʼreenain kasa anasü nutuma chi Waseñotsekai Jesucristo.
4 Jia wawalayuu aishiikana nüpüla Maleiwa, watüjaa aaʼu nüneekalain jia.
5 Nnojotsü jaapajüin neʼe tü pütchi anakat maʼin* sükajee waküjain shia jümüin, nükaalinjainña jia Maleiwa sükajee tü nüpülainkat. Watüjaa aaʼu shiimain tü kasa waküjakat jümüin otta anasü jukuwaʼipa sünainjee tia.
6 Mayaainjeʼe müliain maʼin jia, talatüsü jaaʼin sünain aapawaa sümaa tü pütchikat, jama nükaalinjain jia Maleiwa sükajee tü nüpülainkat, jüshatüitkalaka wakuwaʼipa jee nukuwaʼipa chi Señotkai.
7 Anakalaka maʼin jukuwaʼipa napüleerua napüshuaʼa na anoujashii chajanakana Macedonia jee Acaya.
8 Nnojotpejeʼe shiain neʼe jüküjain aluʼupünaa tü mmakat Macedonia jee Acaya tü nünüikikat Jehová,* aapünüsiaʼaya sainküinpünaa mmakat süchiki wayuuin kanoulashii jia nünain Maleiwa, nnojotkalaka choʼujaain waküjainjanain wanee kasa.
9 Ayatüshiʼiya naya aküjain süchiki tü palajatkat wakua chaa Tesalónica jee süchiki juuʼulaain suulia aʼwaajaa shiyaakua tü jümaleiwasepuʼukat, nüchepchiainnakalaka jia chi shiimainkaijaʼaya suluʼu Maleiwain, chi matüjainkai outaa.
10 Jaʼatapeechi nüntüin chi Nüchonkai chejee iipünaajee, chi asoʼireʼennakai aaʼin naʼakajee na outushiikana, nia Jesús chia makai. Nuʼtteʼereena waya süsalapa saainjala wayuu nutuma Maleiwa.
Noota
^ Pünaʼla tia suluʼu tü kanüliakat «Jamaluʼulu pütchikat».
^ Pünaʼla tia suluʼu tü kanüliakat «Sooʼomüin pütchi A5».
