Palajatka karaloʼuta namüinjatka na chajanakana Tesalónica 3:1-13
3 Sutuma watüjaweein maʼin saaʼu jamüin jukuwaʼipa, anashiisü saaʼin wamüin makatüin waya Atenas.
2 Nia wajütaka Timoteo jümüin, wawalaichi nia jee aʼyataashi nia nümüin Maleiwa sünain aküjaa tü pütchi anakat maʼin nüchiki Cristo. Wajütüin nia süpüla katchinjatüin jaaʼin jee süpüla nümülialüin jaaʼin shiiʼiree aneein tü junoulakat.
3 Nnojoleechikalaka eein wanee wayuu eekai sümalajaain nunoula sutuma niʼrüin tia müliaakat, jama jütüjaain saaʼu nnojoluin kasakainjatüin watuma tü wamülialakat.
4 Wanaa sümaa chajanain waya jümaa waapirapuʼuin jia süchiki weʼrüinjanain müliaa, jütüjaa aaʼu shiainjaʼaya alatüin tia.
5 Tatüjaweepa maʼin saaʼu jamüin jukuwaʼipa, tajütüin jümüin Timoteo süpüla tatüjaain saaʼu ayatüle joonooin waneepia nümüin Maleiwa suulia juuʼulakünüin aaʼin nutuma chi Yolujaakai. Amüla meeria neʼe waʼyataain jüpüleerua.
6 Aleʼejüichipa Timoteo süchikijee anaʼlawaa jümüin jee anasü maʼin tü pütchi nüntirakat wamüin süka nüküjain wamüin waneepiain jia sünain oonowaa nümüin Maleiwa jee alin wayuu jüpüla. Nüküjainña wamüin sotuin waya jaaʼin sümaa alin waya jüpüla otta nüküjain wamüin jiʼreein waya maʼaka weʼreein jia.
7 Tawalayuu, shiaʼaya amülialaaka atuma waaʼin tia soʼunnaa tü müliaa weʼrakat jee soʼunnaa tü kasa mojusü alatakat wamüin jee amülialaasiaʼaya waaʼin sutuma waneepiain jia sünain oonowaa nümüin Maleiwa.
8 Akatchinraasia waaʼin ichere jia sünain oushikajawaa süchiirua nukuwaʼipa chi Señotkai.
9 ¿Kasache waaʼinrajatka süpüla waapüin analuʼut nümüin Maleiwa jaaʼu jee saaʼujee talatüin maʼin waaʼin jutuma nuʼupala chi Wamaleiwasekai?
10 Achuntawaishii maʼin waya saʼwai jee soʼukai nümüin chi Maleiwakai shiiʼiree weʼrüinjanain jia jee shiiʼiree wakaalinjeein jia sünain wanee kasa eekai choʼujaain jümüin süpüla katsüinjatüin junoula.
11 Kasataalejeseʼe nükaalinjain waya chi Washikai Maleiwa jee chi Waseñotsekai Jesús süpüla woʼunuinjanain chaa jümaʼanamüin sünain anaʼlawaa jümüin.
12 Kasataalejeseʼe nükaalinjain jia chi Señotkai süpüla alin jüpüla na juwalayuukana jee alin jüpüla wayuu maʼleekalia maʼaka alin maʼin jia wapüla,
13 katchinjeetka jaaʼin nutuma jee wuleetka jukuwaʼipa nuʼupala chi Washikai Maleiwa soʼu tü kaʼi yaainjachikalü oʼu chi Waseñotsekai Jesús* namaa napüshuaʼa na aneekuushikana.
Noota
^ «Parousía» maluʼulu tia suluʼu griego. Pünaʼla tü pütchikat «Eewaa» suluʼu tü kanüliakat «Jamaluʼulu pütchikat».
