Palajatka karaloʼuta namüinjatka na chajanakana Tesalónica 4:1-18
4 Tawalayuwaa, wekirajüin jia sünain tü jukuwaʼipainjatkat süpüla anainjatüin jukuwaʼipa noʼuluʼu Maleiwa otta shiaʼaya jaaʼinraka tia. Waküjeepejeʼe jümüin jee wachunteein jümüin naaʼu chi Señotkai Jesús, jaaʼinraleeinjatüin maʼin tia.
2 Jütüjaa aaʼulu tü pütchi aluwataanakalü anain jia nutuma chi Señotkai Jesús, tü waküjakat jümüin.
3 Anuu tü nüchekakat Maleiwa jüpüleerua: wuleinjatüin jukuwaʼipa jee nnojoliinjanain jia aʼluwajiraain jukuwaʼipa.*
4 Achecherüinjana jia jaaʼin waneʼewai jukua süpüla wuleinjatüin jukuwaʼipa jee anainjatüin shia noʼuluʼu Maleiwa.
5 Nnojo jüshatüin nakuwaʼipapala na wayuu nnojoliikana eʼraajüin Maleiwa, jama shiain suchuntaain maʼin naaʼin kakuwaʼipain naya sümaa wanee jierü jee wanee jierü nümaa wanee toolo otta ayatataasia neʼe keeʼireein naaʼin tia.
6 Nnojo pümaʼülapalain wanee puwala otta nnojo püʼlaülaajaain saaʼu nukuwaʼipa, jama kasalajaneerüin süpüshuaʼa tia nutuma Jehová* maʼaka waküjaitpain shia jümüin otta wachiaain jia suulia.
7 Nnojoishii waya nüneeküin Maleiwa süpüla yarüttajatüin wakuwaʼipa, nüneeküin waya süpüla wuleinjatüin wakuwaʼipa.
8 Chi wayuu ayoutakai tia pütchikat nnojoishi niain niyoutuin anüiki wanee wayuu, nia niyoutaka anüiki Maleiwa, chi aapakai nüpülain sümüin wayuu.
9 Otta müshiʼiya jia nnojotsü choʼujaain jümüin washajüinjanain süchiki aijiraainjanain jia maʼaka aijiraain wanee wayuu namaa nuwalayuu, süka nikirajüin jia Maleiwa süpüla aijiraainjanain jia.
10 Shiaʼaya jaaʼinraka tia napüleerua na wawalayuu chakana Macedonia. Tawalayuu, shiapejeʼe anain jaaʼinraleere maʼin tia.
11 Anakajaʼa jaaʼinmaale anajiraain jia, nnojo sünainpünaajüin jia sukuwaʼipa wayuu, anashii jiʼyataaliire maʼin wanaapünaa sümaa tü waküjakat jümüin.
12 Natüjaweetkalaka saaʼu na wayuu nnojoliikana anoujain, wayuuin loto akuwaʼipachii jia otta nnojoleetkalaka choʼujaain juchuntuin namüin wanee kasa.
13 Wawalayuu, shia wachekaka jüpüleerua jütüjaainjanain saaʼu tü kasa alatajatkat namüin na wayuu outuinnapakana, suulia joo yüülain jaaʼin maʼaka yüülain naaʼin na wayuu nnojoliikana aʼatapajüin neʼrüinjanain kasa anasü.
14 Wanoujale sünain outuin Jesús jee nüsoʼireʼennüin aaʼin, wanoujeeriaʼaya anain nüsoʼireʼereerüin Maleiwa naaʼin na wayuu outuinnapakana süpüla kottüinjanain naya nümaa Jesús.
15 Shiakalaka wanüikin tüü jümüin sünainjee tü nümakat Jehová:* katüle woʼu yaapa chi Señotkai oʼuneena waya iipünaamüin, nayeenapejeʼe asoʼiraain aaʼin palajana na outatüjüliikana paala, wasoʼiraweenaka aaʼin nachikijee.
16 Ashakateechi chi Waseñotsekai chejee iipünaajee, emetuleetkalaka maʼin nikiisa maʼaka emetuluin nikiisa chi sülaülajanashikai aapiee sümaa najapuluʼujüin tü nukotneetsekat Maleiwa, nayasaʼa na paaʼinwakana nümaa Cristo, na outatüjüliikana paala nayeena asoʼiraaka aaʼin palajana.
17 Katüle woʼu amaaneena waya saʼakapünaa tü sirumakat süpüla wantiraainjanain nümaa chi Señotkai chaa iipünaa, cheenakalaka waya waneepia nümaa.
18 Shiakalaka anain aluʼu jümüliarüle jaaʼin waneʼewai jukua sükajee tia pütchikat.
Noota
^ Pünaʼla tia suluʼu tü kanüliakat «Jamaluʼulu pütchikat».
^ Pünaʼla tia suluʼu tü kanüliakat «Sooʼomüin pütchi A5».
^ Pünaʼla tia suluʼu tü kanüliakat «Sooʼomüin pütchi A5».
