Palajatka karaloʼuta namüinjatka na chajanakana Corinto 12:1-31
12 Tawalayuwaa, tü tachekakat jüpüleerua shia jiyaawatüinjatüin saaʼu tü kasa nüsülajalakat Maleiwa jümüin.
2 Manoujainwaʼaya jia, wainma tü kasa emeejünapuʼukalü aka jia süpüla juʼwaajüin shiyaakua tü maleiwayaasü manüikat.
3 «Wayuu mojulaashisa Jesús» nnojoishi süpüla nümüinjachin wanee wayuu naapüle chi Maleiwakai tü nüpülainkat nümüin. Akaataajaʼa joo nia nnojoishi süpüla nümüin: «Niasaʼa Jesús chi Señotkai» aluʼusaʼa naapüle chi Maleiwakai tü nüpülainkat nümüin.
4 Wainma tü kasa nüsülajakat Maleiwa, naapapejeʼe shia sükajee tü nüpülainkat.*
5 Wainma tü kasa eekat süpüla waʼyataain anain, waneeshipejeʼe neʼe chi Señot waʼyataakai amüin.
6 Wainma tü kasa suuntakat saaʼinrüin wayuu sükajee tü nüpülainkat Maleiwa, waneeshipejeʼe neʼe chi Maleiwa suuntakai akajee wayuu tia.
7 Jaʼyasü saaʼu sukuwaʼipa wayuu sükaalinjünüin nutuma Maleiwa sükajee tü nüpülainkat. Naapüin Maleiwa tü nüpülainkat shiiʼiree anainjatüin wayuu.
8 Atüjashi maʼin wanee wayuu süpüleerua nünüiki sutuma tü nüpülainkat Maleiwa otta eeshii na wayuu aküjakana sükajee tü nüpülainkat Maleiwa wanee kasa nnojotka sütüjaain* aaʼu wayuu.
9 Eeshii na wayuu ountakana kanoulain naya sutuma tü nüpülainkat Maleiwa otta eeshii na ountakana naawaleʼerüin wayuu eekai ayuulin sükajee tü nüpülainkat Maleiwa.
10 Eeshii na ountakana naaʼinrüin kasa pülasü, eeshii na aküjakana süchiki tü kasa alatajatkat naashin Maleiwa otta eeshii na ayaawatakana saaʼu jamaluʼuluin wanee pütchi eekai nümaʼanajeejatüin Maleiwa. Eeshii na atüjakana aashajawaa suluʼu naata anüikii otta eeshiʼiya na ountakana naküjain jamaluʼuluin nünüiki wanee wayuu naatakai anüiki.
11 Suuntuin wayuu saaʼinrüin süpüshuaʼa tia sükajee tü nüpülainkat Maleiwa, naapüin Maleiwa tü nüpülainkat sümüin wayuu süpüla suuntajatüin wanee kasa wanaapünaa sümaa tü nüchekakat süpüleerua.
12 Jamüshijaʼa wanee wayuu kajapüshi, koʼushi, kooʼuishi jee eesü waneirua kasa nünain, waneeshipejeʼe neʼe chia wayuukai, akaataajaʼaya neʼe nukuwaʼipa Cristo, waneeshia neʼe nia.
13 Woutiisashii waya wapüshuaʼa nutuma chi Maleiwakai sükajee tü nüpülainkat, müinnaka waya maʼaka nukuwaʼipa wanee wayuu jaʼitashii judíoin, griegoin, achepchieein jee taashirejeʼeya wakuwaʼipa, shiaʼaya neʼe aapünaka wamüin wapüshuaʼa tü nüpülainkat Maleiwa.
14 Kajapüshi wanee wayuu, koʼushi, kooʼuishi jee eesü waneirua kasa nünain.
15 Jamüsüjaʼa kanüikitaarale nuuʼui wanee wayuu jee sümataarale «Nnojotsü taya najapüin, nnojotkalaka kasain taya nünain», jaʼitayaain müin sünüiki tü nuuʼuikat ayateeria nuuʼulin shia, nnojoleerü shia asünnaain nuulia.
16 Jamüsüjaʼa kanüikitaarale nücheʼe wanee wayuu jee sümataarale «Nnojotsü noʼuin taya, nnojotkalaka kasain taya nünain», jaʼitayaain sümüin tü nücheʼekat ayateeria nücheʼein shia, nnojoleerü shia asünnaain nuulia.
17 Jamüsüjaʼa shiale eein neʼe noʼu wanee wayuu, ¿jamataaleetka nukuwaʼipa süpüla naapüin wanee kasa? Jamüsüjaʼa shiale eein neʼe nücheʼe wanee wayuu, ¿jamataaleetka süpüla naatüin seejuu wanee kasa?
18 Niʼitaapejeʼe Maleiwa süpüshuaʼaleʼeya tü kasa eekat nünain wanee wayuu eere anashiin shia nümüin Maleiwa.
19 Wanaawale tü kasa nünainkat wanee wayuu, ¿jamüsüjeʼe niyolojo?
20 Wanee wayuu kajapüshi, koʼushi, kooʼuishi jee eesü waneirua kasa nünain, waneeshipejeʼe neʼe chia wayuukai.
21 «Nnojotsü choʼujaain pia tamüin» nnojotsü süpüla sümüinjatüin noʼu wanee wayuu sümüin tü najapükat. Akaʼaya neʼe tü nikiikat nnojotsü süpüla sümüinjatüin sümüin tü nuuʼuikat «Nnojotsü choʼujaain pia tamüin».
22 Choʼujaasü süpüshuaʼaleʼeya tü kasa eekat nünain wanee wayuu, jaʼitasü tü eekai müin maamalakai saaʼin nümüin.
23 Wainma tü kasa eekat wanain, wainmaleepejeʼe tü eekai müin nnojotkai kasain saamalain wamüin otta shia wounjulaka tü kasa nnojotkat shiʼrüinjatüin wayuu wanain. Eesü wanain tü kasa anakalü atuma wayolojo soʼuluʼu wayuu,
24 nnojotpejeʼe choʼujaain wainmain maʼin tia. Nukumajüin watapaʼa chi Maleiwakai süpüla waaʼinmaainjatüin maʼin tü kasa nnojotkat shiʼrüinjatüin wayuu.
25 Müsü sukuwaʼipa tia nutuma Maleiwa suulia katataawain tü kasa eekat wanain jee müinjatü saaʼinmajiraakai aaʼin tü kasa eekat wanain.
26 Aire wanee kasa nünain wanee wayuu aiyaa müsü wanee kasa nünain süchiirua. Müle kojutukai saaʼin atumawaa tü kasa eekai nünain wanee wayuu müsüjaʼaya talatakai saaʼin tü niʼirukukat sünainjee.
27 Müshii jia maʼaka saaʼin niʼiruku Cristo otta süpüshi jia waneʼewai jukua tü kasa eekat nünain.
28 Naya nüneekaka Maleiwa palajana na aluwataaushikana naʼakajee na anoujashiikana, süchikijee nüneeküin na nünüikimaajanakana, mapa naya nüneekaka na atüjakana ekirajaa jee süchikijee nüneeküin na wayuu aaʼinrakana kasa pülasü, na wayuu aawaleʼerakana wayuu eekai ayuulin, na akaalinjüliikana wayuu, na oʼunirakana sukuwaʼipa wanee kasa otta nüneeküin na wayuu atüjakana aashajawaa wainma anüikii.
29 ¿Aashin nnojoliin aluwataaushin napüshuaʼaleʼeya na anoujashiikana? Nnojoishii naya nünüikimaajanain Maleiwa napüshuaʼa. Nnojoishii naya atüjain ekirajaa napüshuaʼa jee nnojoishii naya aaʼinrayaa müin kasa pülasü napüshuaʼa.
30 ¿Aashin nnojoluin nountuin napüshuaʼa naawaleʼerüin wayuu eekai ayuulin? Nnojoishii naya atüjain napüshuaʼa süpüleerua naashajaainjanain suluʼu naata anüikii jee naküjainjatüin jamaluʼuluin nünüiki wanee wayuu naatakai anüiki.
31 Ayataʼaya jia süchiirua tü kasa eekai anain maʼin, taküjeetpejeʼe jümüin süchiki wanee kasa alanaʼaleeka maʼin suluʼu anain.
Noota
^ «Pneuma» maluʼulu tia suluʼu griego.
^ «Pütchi sümaajatka atüjawaa saaʼu wanee kasa» maluʼulu tia suluʼu griego. Shia süküjeeka achiki nütüjain wanee wayuu nutuma Maleiwa.
