Palajatka karaloʼuta namüinjatka na chajanakana Corinto 13:1-13
-
Shia alanaʼaleeka maʼin tü aliikalü apüla wayuu (1-13)
13 Tatüjale süpüleerua sünüikipala wayuu jee tatüjale süpüleerua nanüikipala na aapiee nümaʼanajeejanakana Maleiwa sümaa maalin tapüla wayuu, meechi taya maʼaka saaʼin wanee kachueera eekai sütaʼijiraanüin sümaa kepisanain maʼin shia.
2 Tountule taküjain tü alatajatkat mapeena, tayaawatüle saaʼu tü nütüjaakalü aaʼu Maleiwa, tatüjale süpüleerua wanee kasa jee tountule tapataain wanee uuchi saaʼujee kanoulain taya, nnojoleerü kasain saamüin tia tamüin maalinre wayuu tapüla.
3 Taapüle süpüshuaʼa tü kasa eekat tamaʼana süpüla shiküinjatüin wayuu tatuma jee shiale taapajiraain tekii saaʼu wayuu süpüla taʼwaataainjachin saaʼu tia, nnojoleerü kasain saamüin tamüin maalinre wayuu tapüla.
4 Chi eekai alin apüla wayuu nnojoishi kashapajaaralin, wayuu kamaneeshi. Nnojoishi achunjain, nnojoishi aʼwaataain suluʼu nukuwaʼipa, nnojotsü yaletüin naaʼin,
5 nnojoishi eʼrülin wayumüin, nnojotsü jülüjain naaʼin nukuwaʼipa nümüiwaʼa, nnojoishi aashichijaamaatüin. Nnojotsü sotokuʼu müin naaʼin tü aainjünakat nümüin.
6 Nnojotsü talatüin naaʼin sümaa wanee kasa eekai mojuin, shia talataka amaa naaʼin wanee kasa eekai shiimain.
7 Chi aikai apüla wayuu nnojoishi amalajaain, jaʼitasü kasain alatüin nümüin, nunoujain kasa süpüshuaʼa, naʼatapajüin sunoutaain wanee kasa jee nüchecherüin naaʼin soʼunnaa tü alatakat.
8 Chi aikai apüla wayuu matüjainsat ajaʼttaa saalin wayuu nüpüla, eekajasaʼa tü aküjaakat süchiki tü kasa alatajatkat ajaʼtteerü, akaʼaya joo tü atüjaakat süpüleerua kojuyasü anüikii sümaʼaleeya atüjawaa saaʼu wanee kasa ajaʼtteerü tiaʼaya.
9 Nnojotsü watüjaain aaʼu kasa süpüshuaʼa, akaʼaya tü kasa alatajatkat mapeena nnojotsü wayaawatüin aaʼu süpüshuaʼa.
10 Watüjaapa saaʼu süpüshuaʼa kasa jee wayaawatapa saaʼu süpüshuaʼa tü kasa alatajatkat mapeena, ajaʼttinneerü tü kasa nnojotkat wayaawatüin aaʼu jee tü kasa nnojotkat watüjaain aaʼu.
11 Jintüliiwaʼaya taya mapuʼusü tanüiki maʼaka nünüiki wanee jintüi, jülüjapuʼusü taaʼin tü jülüjakat naaʼin wanee jintüi jee tasakireʼerapuʼuin taaʼin maʼaka nüsakireʼerüin naaʼin wanee jintüi. Eekajasaʼa jooluʼu süka wayuuichipain miyoʼu taya nnojoluitpa müin takuwaʼipa maʼaka nukuwaʼipa wanee jintüi.
12 Müsü müsatakai saaʼin wanee kasa woʼupaʼaluʼu maʼaka müsatüin waya weirakaajiraale suluʼu wanee rouya aainjuushi süka kachueera, jaʼyeetpejeʼe maʼin shia wamüin mapeena. Nnojotsü pansaain maʼin wanee kasa wamüin maaʼulu, pansaʼaleejeetpejeʼe shia wamüin mapa maʼaka pansaain maʼin nümüin Maleiwa tü takuwaʼipakat.
13 Anuupejeʼe apünüinsü kasa ayateetkalia eein: ayateeria eein tü kanoulaakat, ayateeria waʼatapüin sunoutaain wanee kasa jee ayateeria alin wapüla wayuu. Shiapejeʼe alanaʼaleeinña maʼin tü aliikalü apüla wayuu.
