Palajatka karaloʼuta namüinjatka na chajanakana Corinto 14:1-40
14 Ayataʼaya aijiraain jia, ayatajatpejeʼe kapülain jaaʼin tü kasa nüsülajakat Maleiwa jümüin sükajee tü nüpülainkat. Shia jaaʼinmaainjatka maʼin aküjaa süchiki tü kasa alatajatkat naashin Maleiwa.
2 Chi wayuu ountakai aashajawaa suluʼu anüikii naatajatü, nnojoishi aashajaain sümaa wayuu, nia naashajaaka amaa Maleiwa. Nnojotsü shiyaawatüin aaʼu wayuu tü nümakat süka nüküjain sükajee tü nüpülainkat Maleiwa tü pütchi nütüjaakalü aaʼu neʼe Maleiwa.
3 Eekajasaʼa chi wayuu aküjakai tü kasa alatajatkat naashin Maleiwa nükatsüinrüin saaʼin wayuu, nükaalinjain jee nümülialüin saaʼin sükajee tü nümakat sümüin.
4 Chi wayuu ountakai aashajawaa suluʼu kojuyasü anüikii, nükatchinrüin neʼe tü nunoulakat nümüiwaʼa, eekajasaʼa chi wayuu aküjakai tü kasa alatajatkat naashin Maleiwa, nükatchinrüin naaʼin na anoujashiikana.
5 Shia tachekaka jüpüleerua jaashajaainjanain suluʼu kojuyasü anüikii, shiapejeʼe tachekaleeinña maʼin jüküjainjanain süchiki tü kasa alatajatkat naashin Maleiwa. Chi wayuu aküjakai tü kasa alatajatkat alanaʼaleeshia nuulia chi wayuu ountakai aashajawaa suluʼu kojuyasü anüikii, aluʼujasaʼa nüküjale jamaluʼuluin tü pütchi nüküjakat süpüla katsüinjatüin naaʼin na anoujashiikana sükajee tü nümakat.
6 Tawalayuu, ¿kasa saametka jümüin tantüle jaʼakamüin sümaa taashajaain süka anüikii nnojotkalü jiyaawatüin aaʼu? Aluʼu shiainjaʼa anain tantüle sümaa wanee pütchi eekai nüküjalain Maleiwa tamüin, wanee kasa eekai tatüjaain aaʼu, wanee pütchi eekai sülatajatüin mapeena jee wanee kasa eekai tekirajüin anain.
7 Müsia neʼe tü alatakat sümüin wanee kasa eekai shiʼyalajinnüin maʼaka saaʼin tü kanüliakat «flauta» jee tü kanüliakat «arpa». Nnojorüle anain tü shiʼirakat atumawaa, ¿jamüsü süpüla shiyaawatüin saaʼu wayuu shiale keʼirain tü kanüliakat «flauta» jee shiale keʼirain tü kanüliakat «arpa»?
8 Nnojorüle aapünüin maʼin shiʼira tü konneetakat, nnojoleechi jaralin yapajüin süpüla tü atkawaakat.
9 Akaataajaʼa neʼe jukuwaʼipa jiakana. Nnojorüle jujuʼitirüin wanee pütchi eekai mapüleein, ¿jalapünaajeerü shiyaawatüin wayuu tü jüküjeekat sümüin? Amüleena neʼe jia aashajaain, sülüʼüjeerü neʼe joutai tü jünüikikat.
10 Watta saalii anüikii saashajaaka wayuu sainküinpünaa tü mmakat jee ayaawatüna aaʼu shia süpüshuaʼa.
11 Nnojorüle tayaawatüin saaʼu tü pütchi aküjünakat tamüin, meechi taya maʼaka naaʼin wanee wayuu naatajai nümüin chi wayuu aashajaakai tamaa, akaataʼaya joo chi wayuu aashajaakai tamaa, meechi aka naaʼin wanee wayuu naatajai tamüin.
12 Saaʼujee jücheküin maʼin süchiki saapünajatüin jümüin tü kasa nüsülajakat Maleiwa sükajee tü nüpülainkat, anakajaʼa jaaʼinmaale maʼin tia süpüla jükatchinrüin naaʼin na anoujashiikana.
13 Chi wayuu atüjakai aashajawaa suluʼu wanee anüikii naatajatü, oʼuraajüinjachi nia süpüla nüküjainjatüin jamaluʼuluin tü nümakat.
14 Tountuin toʼuraajüin suluʼu wanee anüikii naatajatü süka naapüin tamüin Maleiwa tü nüpülainkat, nnojotpejeʼe tayaawatüin aaʼu jamaluʼuluin tü tachuntakat.
15 ¿Kasakalaka anain süpüla taaʼinrüin? Oʼuraajeechi taya sükajee naapüin tamüin Maleiwa tü nüpülainkat sümaa tayaawatüin saaʼu tü tachuntakat. Taʼwaajeechi Maleiwa sükajee teeʼirajüin nümüin saaʼujee naapüin tamüin tü nüpülainkat sümaa tayaawateerüin aaʼu tü teeʼirajakalü achiki.
16 Puʼwaajüle chi Maleiwakai sükajee naapüin pümüin tü nüpülainkat, ¿jamakuwaʼipat süpüla «Amén»* sümüin wanee wayuu nnojorüle shiyaawatüin aaʼu tü puchuntakalü apüleerua?
17 Anasiaajeʼe tü sukuwaʼipakat pünüiki paapapa analuʼut nümüin Maleiwa, shiajaʼa neʼe nnojoluin anain sukuwaʼipa wayuu suluʼujee tia.
18 Taapüin analuʼutka nümüin Maleiwa saaʼu wainmain tü anüikii naatajatü tatüjakalü apüleerua juulialeʼeya jiakana.
19 Shia anaka aluʼu saaʼin tamüin tachuntule naʼaka na anoujashiikana jaʼraisü pütchi eekai tayaawatüin aaʼu süpüla tekirajüinjachin wayuu suulialeʼeya taküjain 10.000 pütchi suluʼu wanee anüikii naatajatü nnojotka shiyaawatüin aaʼu wayuu.
20 Tawalayuu, nnojotsü müinjatüin tü jülüjakat jaaʼin maʼaka tü jülüjakat saaʼin tepichi. Mamaʼülainjana jia maʼaka naaʼin wanee jintüi suulia sünainpünaajüin jia wanee kasa eekai mojuin, pansaainjatü tü jülüjakat jaaʼin.
21 Müsü tü ashajünakat sünain tü Pütchi Aapünakat nümüin Moisés:* «Anuu nünüiki Jehová:* ‹Taneekeena na wayuu aashajaakana suluʼu naata anüikii jee taneekeena wayuu naatajannuu süpüla naashajaainjanain namaa wayuukana naainnua, nnojoliijeenapejeʼe naya jaa müin tamüin›».
22 Tü aashajawaakat suluʼu anüikii naatajatü namüinjatü na wayuu manoujainsaliikana, nnojotsü namüinjatüin na anoujashiikana. Eekajasaʼa tü aküjaakat süchiki tü kasa alatajatkat naashin Maleiwa, namüinjatü na anoujashiikana, nnojotsü namüinjatüin na manoujainsaliikana.
23 Jamüshiijaʼa noutkajaataale na anoujashiikana suluʼu wanee miichi sümaa naashajaain suluʼu anüikii naatajatü jee süntataale naʼakamüin wayuu eekai eein neʼe sümaa wayuu eekai manoujain, ¿aashin süküjeerüin tia wayuukalüirua mamainnain na anoujashiikana?
24 Aluʼusaʼa eetaale jia sünain aküjaa tü kasa alatajatkat naashin Maleiwa otta nüntataale wanee wayuu eekai manoulain jaʼakamüin jee wayuu eekai eein neʼe, atanalaajeerü naaʼin sutuma tü kasa naapakat jee nüsakireʼereerü naaʼin sünain tü nukuwaʼipakat.
25 Atüjaaneerü aaʼu tü suluʼukat naaʼin, nüsapainkeechika nia mmoluʼu jee nuʼwaajeechikalaka Maleiwa sünain maa: «Shiimainña maʼin eein chi Maleiwakai jümaa».
26 Tawalayuwaa, ¿kasakalaka anain süpüla jaaʼinrüin? Juutkajaapa, eeinjachi chi eeʼirajakai Salmo,* eeinjachi chi ekirajakai, eeinjachi chi aküjakai wanee kasa nümaʼanajeejatü Maleiwa, eeinjachi chi aashajaakai wanee anüikii naatajatü otta eeinjachi chi aküjakai jamaluʼuluin nünüiki chi naatajachikai anüiki. Jaaʼinrajatü süpüshuaʼa tia süpüla jükatchinjiraain jaaʼin.
27 Eere wayuu atüjaka süpüleerua aashajawaa suluʼu anüikii naatajatü, anashii piamashiire neʼe naya jee apünüinshiire naya. Pachikuatüinjana naya sünain aashajawaa otta eeinjachi wanee aküjakai sümüin wayuu jamaluʼuluin nanüiki.
28 Nnojoire eein wanee wayuu aküjakai jamaluʼuluin tü nanüikikat, anashii koʼuuu namüle noʼupala na anoujashiikana noutkajaapa. Anashii naashajaale suluʼu naaʼin jee nümaa Maleiwa.
29 Anashii nayale aashajaain piamashii jee apünüinshii wayuu nünüikimaajanakana Maleiwa jee müshiʼiya na waneinnua nasakireʼerüinjatü naaʼin sünain jamaluʼuluin tü namakat.
30 Eere wanee wayuu eekai aküjünüin amüin nutuma Maleiwa tü kasa nümaʼanajeejatkat sümaʼainruʼu yalain nia joyotuin, anashi nnojoire niain aashajaain chi yalajachikai aashajaain palajana.
31 Anashii pachikuatüle jia jüpüshuaʼa sünain aküjaa tü kasa alatajatkat naashin Maleiwa, jütüjeenakalaka jüpüshuaʼa jee akatsüinraajeerü jaaʼin.
32 Na wayuu nünüikimaajanakana Maleiwa anainjatü sukuwaʼipa natuma tü kasa nüsülajakat Maleiwa namüin sükajee tü nüpülainkat.
33 Nnojotsü matüjaajuin aaʼu wanee kasa nutuma Maleiwa, shia eeka jimataa aaʼin nutuma.
Naʼaka na anoujashii nüneekajalakana Maleiwa,
34 nnojoliinjana aashajaain na jieyuukana eere noutkajaain, jama süpülajünüin tia noulia. Anashii jüüjüüle naya maʼaka süküjünüin sünain tü Pütchi Aapünakat nümüin Moisés.*
35 Natüjeere na jieyuukana anashii nasakirüle naʼwayuuse chaa nepialuʼu. Kaluʼusü japülii saashajaale wanee jierü sünain tü outkajawaakat.
36 ¿Jiache jiakana chajanakana Corinto kamaʼanajeejanakana tü nünüikikat Maleiwa? ¿Jiache neʼe aküjünaka amüin shia?
37 Eere wanee wayuu nünüikimaajachikai Maleiwa naashin jee saapünüle nümüin wanee kasa nutuma Maleiwa sükajee tü nüpülainkat, niyaawatüinjatü aaʼu shiain wanee kasa nuluwataakalü anain chi Señotkai tü tashajakalü achiki jümüin.
38 Eere wanee wayuu nnojoikai kasajachin amüin tia pütchikat nnojoleechijaʼa nia kasajachin nümüin chi Maleiwakai.
39 Tawalayuwaa, ayataʼaya kapülain jaaʼin jüküjain tü pütchi alatajatkat naashin Maleiwa jee nnojo jüpülajüin suulia wayuu saashajaain suluʼu anüikii naatajatü.
40 Anainjatpejeʼe maʼin sukuwaʼipa süpüshuaʼa tü kasa jaaʼinrakat, nnojotsü matüjaajuinjatüin saaʼu.
Noota
^ Pünaʼla tia suluʼu tü kanüliakat «Jamaluʼulu pütchikat».
^ Pünaʼla tia suluʼu tü kanüliakat «Jamaluʼulu pütchikat».
^ Pünaʼla tia suluʼu tü kanüliakat «Sooʼomüin pütchi A5».
^ Pünaʼla tia suluʼu tü kanüliakat «Jamaluʼulu pütchikat».
^ Pünaʼla tia suluʼu tü kanüliakat «Jamaluʼulu pütchikat».
