Palajatka karaloʼuta namüinjatka na chajanakana Corinto 16:1-24
16 Süpüla tü nneerü akotchojünakat nayaaluʼu na anoujashii aneekuushikana nutuma Maleiwa, shia anaka aluʼu jaaʼinrüle tü taluwataakalü anain na anoujashii chakana Galacia.
2 Shiinaluʼujee semaanaka, anashii jükatarüle tü jüsülajüinjatkat waneʼewai jukua wanaapünaa sümaa tü juuntakat. Nnojoleetkalaka choʼujaain jukotchojüin shia tantapa jümaʼanamüin.
3 Jee chapa taya jümaʼana, tajüteena Jerusalénmüin na wayuu jüneekakana, na juchuntakana anülia suluʼu tü karaloʼutakat süpüla nalüʼüjüin tü nneerü asülajuushikat.
4 Eerejeʼeya süpüla toʼunuin namaa oʼuneechi taya.
5 Awaraijaweechi taya jaaʼu talatapünaapa Macedoniapünaa, jama chainjachin taya Macedoniamüin.
6 Eeshijaʼa kakalieechire taya jümaʼana jee cheechire taya juyapoʼu, jiʼikajaajeechikalaka taya süseʼeruʼu wopukot toʼunapeena.
7 Nnojoishi neʼe taya alatapünaweein chaa jümaʼanapünaa, eejeesü takalia shialejeʼeya nücheküin Jehová* tapüleerua.
8 Makateechipejeʼe taya chayaa Éfeso waneʼereeya süntapa tü kaʼi saainjünüinjatkalü oʼu tü Miʼiraa kanüliakat Pentecostés.*
9 Aapünüsü tamüin wanee aʼyatawaa* akooʼomüinraajeetka atuma taʼyataain nümüin Maleiwa, wainmapejeʼe na ayoutakana süchiki tia.
10 Nüntüle Timoteo jümaʼanamüin, anainjatü naaʼin jutuma suulia mmolujuin nia sünain aaʼinraa wanee kasa. Niʼyataajeechikalaka sünain tü aʼyatawaa eʼitaanakat najapuluʼu nutuma Jehová* maʼaka taʼyataain sünain.
11 Nnojoishi jaralinjachin mojutuin atuma nia. Jükaalinja nia süpüla nüntüinjachin süka anakalü akuwaʼipa tamaʼanamüin, anii nia taʼatapajüin namaa na wawalayuukana.
12 Eekajasaʼa chi wawalakai Apolos, tachuntuin maʼin nümüin süpüla nuwaraijaain jaaʼu namaa na wawalayuukana. Nnojotsiaajeʼe jutatüin nukuwaʼipa müinmaʼa yaa süpüla nuʼunuin jümaʼanamüin, oʼuneechipejeʼe nia mapa.
13 Anakajaʼa eejüle jaaʼin, jüchechera jaaʼin sünain tü anoujaakat, yalayala jaaʼin otta katsüin jaaʼin.
14 Jaaʼinrüinjatü kasa süpüshuaʼa süka alin wayuu jüpüla.
15 Tawalayuwaa, jütüjaa aaʼuchii nayain anoujain palajana suluʼu tü mmakat Acaya na wayuu chajanakana nipialuʼu Estéfanas jee naneeküin naʼyataainjanain namüin na aneekuushikana nutuma chi Maleiwakai.
16 Jüüjüü jia namüin na wayuu makana akuwaʼipa jee namüin napüshuaʼa na akaalinjakana otta na aʼyataakana maʼin.
17 Talatüshi maʼin taya süka yaain tamaa Estéfanas, Fortunato otta Acaico, nayainnapa akaalinjaka taya jüchikumüin.
18 Natütüleʼerüin taaʼin maʼaka natütüleʼerüin jaaʼin. Anakalaka kojutule jümüin na wayuu makana akuwaʼipa.
19 Nasaküin jia na anoujashii chakana Asia.* Nüsaküin jia Áquila sümaa Prisca otta na anoujashii chakana outkajaain nepialuʼu, na anoujakana nünain chi Señotkai.
20 Nasaküin jia napüshuaʼa na wawalayuukana. Kamaneejiraa jia jüsakapa na wawalayuukana.
21 Tayakai Pablo tashajüin karaloʼutakat tüü süpüla tasaküin jia.
22 Chi wayuu eekai maalin apüla chi Señotkai, anasü kasalajanale tia nümüin. ¡Señotkalee, kasataalejeseʼe püntüin maalü!
23 Kasataalejeseʼe kamaneein jümüin chi Señotkai Jesús.
24 Aishii jia tapüla, jama nikirajalain jia Cristo Jesús.
Noota
^ Pünaʼla tia suluʼu tü kanüliakat «Sooʼomüin pütchi A5».
^ Pünaʼla tia suluʼu tü kanüliakat «Jamaluʼulu pütchikat».
^ «Ojutalaasü tapüleerua wanee puettoʼu miyoʼu» maluʼulu tia suluʼu griego.
^ Pünaʼla tia suluʼu tü kanüliakat «Sooʼomüin pütchi A5».
^ Pünaʼla tia suluʼu tü kanüliakat «Jamaluʼulu pütchikat».
