Palajatka karaloʼuta namüinjatka na chajanakana Corinto 2:1-16
2 Tawalayuu, soʼu chejeein taya jümaʼanajee süpüla taküjain jümüin tü kasa nütüjaakalü aaʼu Maleiwa, nnojotsü taküjain tia jümüin sükajee sunoutuushin pütchikat tatuma jee nnojoishi taya aʼwaataain suluʼu kekiin maʼin taya.
2 Soʼu chajachin taya jümaʼana shia jülüjaka maʼin taaʼin taküjainjachin nüchiki Jesucristo jümüin jee süchiki nükachennüin sünain wanee wunuʼu süpüla outaa.
3 Chejeeshi taya jümaʼanajee sümaa matchin taaʼin, kutkuttüshi taya sutuma mmoluin taya.
4 Soʼu taküjain pütchi jümüin, nnojoishi taya aashajaain sükajee nanüikipala na wayuu kekiishiikana. Aküjashi taya pütchi jümüin sükajee tü nüpülainkat Maleiwa.
5 Taainjain tia süpüla junoujainjanain, nnojoliipejeʼe jia anoujain sükajee kekiin wayuu, sükajeejatü nüpülain chi Maleiwakai.
6 Shia waashajaaka achiki namaa na wayuu kooʼomüinkana anoula kekiin chi Maleiwakai, nnojoliipejeʼe waya aashajaain süchiki kekiin na wayuu eekana maaʼulu jee süchiki kekiin na aluwataashiikana saaʼu wayuu, ajaʼttajana neʼe na makana.
7 Aluʼu shiainjaʼa waashajaain achiki kekiin chi Maleiwakai, nia neʼe atüjaaka saaʼu tia, nnojotsü sütüjaain aaʼu wayuu. Pansaatüjütpejeʼe sukuwaʼipa nutuma süpüla kojutuinjanain waya atumawaa.
8 Na aluwataashii eekana maaʼulu nnojotsü natüjaain aaʼu süchiki tü kasa nütüjaakalü aaʼu Maleiwa, natüjaalejeʼe saaʼu nnojoishije nakacherüin chi Waseñotsekai sünain wunuʼu süpüla outajachin nia.
9 Shiaʼaya aküjünaka achiki tia suluʼu tü Karaloʼuta Nüchikimaajatkat Maleiwa, tü makat mayaa: «Nnojoishi eein wanee wayuu eekai niʼrüin wanee kasa, nnojoishi eein wanee wayuu eekai aapüin pütchi jee nnojotsü antapünaain suluʼu nikii wanee wayuu tü kasa kettaatüjütkalia nutuma Maleiwa napüla na wayuu aikana apüla nia».
10 Nüküjain wamüin tia chi Maleiwakai sükajee tü nüpülainkat, jama nüküjain chi Maleiwakai süpüshuaʼa tü kasakalüirua sükajee tü nüpülainkat, jaʼitakajeʼe neʼe tü kasa jülüjakat naaʼin Maleiwa, tü nnojotkalü atüjaanüin aaʼu.
11 Tü jülüjakat naaʼin wanee wayuu nnojotsü jaralüin atüjaain saaʼu, niaʼala neʼe niakai atüjaaka saaʼu tü suluʼukat naaʼin. Akaataajaʼa neʼe nukuwaʼipa Maleiwa, nnojotsü eein wanee wayuu atüjaaka saaʼu tü jülüjakat naaʼin, sütüjaajeetpejeʼe saaʼu sükajee tü nüpülainkat Maleiwa.
12 Nnojotsü aapünüin wamüin tü shikiirujutkat wayuu, shia aapünaka wamüin tü nüpülainkat Maleiwa, wayaawataka sükajee tia tü kasa nikirajakalü anain waya Maleiwa, jama kamaneein nia wamüin.
13 Aashajaashiʼiya waya süchiki tia kasakalüirua, nnojotpejeʼe waküjain süchiki sükajee tü pütchi nojuʼitirakat na wayuu kekiishiikana. Aküjashii waya süchiki tia sükajee tü pütchi nikirajakalü anain waya chi Maleiwakai sükajee tü nüpülainkat. Waainjain tia süpüla wekirajüin süchiki tü shiimainkat nüchiki Maleiwa.
14 Eekajasaʼa wanee wayuu eekai jülüjain naaʼin tü shikiiruʼujeejatkat wayuu, nnojotsü jamajatüin nümüin tü kasa nüküjakat chi Maleiwakai sükajee tü nüpülainkat, malaa neʼe tia naashin. Nnojotsü süpüla niyaawatüin saaʼu tia, süka jamüin, süpüla niyaawatüin wanee wayuu saaʼu tia nikirajaainjatü maʼin anain sümaa nükaalinjünüin nutuma chi Maleiwakai sükajee tü nüpülainkat.
15 Akaisaʼa chi wayuu oʼuninnakai akuwaʼipa nutuma Maleiwa sükajee tü nüpülainkat, niyaawata aaʼu süpüshuaʼa tü kasakalüirua, nnojotpejeʼe ayaawatünüin aaʼu nukuwaʼipa sutuma wayuu.
16 Anuu tü sümakat tü Karaloʼuta Nüchikimaajatkat Maleiwa: «¿Jara ayaawataka saaʼu tü kasa nikiirujutkat Jehová* süpüla nikirajünüinjachin nutuma wanee wayuu yalejee?». Eekajaʼa wayakana wayaawata aaʼu tü nikiirujutkat Cristo.
Noota
^ Pünaʼla tia suluʼu tü kanüliakat «Sooʼomüin pütchi A5».
