Palajatka karaloʼuta nüshajalaka Juan 1:1-10
1 Nia washajaka achiki jümüin chi eetüjüikai sümaiwa paala, chi waapakai anüiki, chi weʼrakai, chi jülüjakai waaʼin jee chi wepettakai. Washajüinña jümüin süchiki tü pütchi katakalü atuma soʼu wayuu.
2 Watüjaa aaʼu jee wayaawata aaʼu tü pütchi katakalü atuma soʼu wayuu, tü naapakat wamüin chi Washikai Maleiwa, waküjakalaka süchiki tia sümüin wayuu.
3 Waküjainña jümüin süchiki tü kasa waapakat jee weʼrakat süpüla paaʼinwainjanain jia wamaa maʼaka paaʼinwain waya nümaa chi Washikai Maleiwa jee nümaa Jesucristo, chi Nüchonkai.
4 Washajüin jümüin pütchikat tüü süpüla talataleeinjatüin maʼin waaʼin.
5 Anuu tü pütchi nüküjakat wamüin Jesús jee waküjain joo shia jümüinña. Müshi saaʼin luusa chi Maleiwakai otta nnojotsü kasajatüin piʼyuushi nümüin.
6 «Paaʼinwashii waya nümaa» wamataarüle sümaa ayatataainña saʼakain waya piʼyuushi, aküjashiijaʼamata waya waʼalain otta nnojotsü pansaain wakuwaʼipa wanaapünaa sümaa tü pütchi shiimainkat.
7 Mülejeʼeya chuwatuuikai saaʼin luusa waaʼu maʼaka chuwatuulin shia naaʼu Maleiwa, paaʼinwashiijaʼamata waya otta müsü nülaʼajaakai saaʼin waainjala woulia sükajee nüsha Jesús, chi Nüchonkai.
8 «Wayuu maainjalasalii waya» wamataarüle, emeejiraashii neʼe waya otta nnojotsü wanoujain anain tü pütchi shiimain ekirajünakalü anain waya.
9 Nnojoleena waya nüpütüin Maleiwa wamüiwaʼa otta loto akuwaʼipachi nia. Moteerü naaʼin waainjala waküjale süchiki nümüin otta wuleerü wakuwaʼipa nutuma suulia kasa eekai mojuin.
10 «¿Joujanakai kaainjalain waya?» wamataarüle, müshi waʼalaajakai naaʼin Maleiwa sükajee tia otta nnojotsü wanoujain anain tü nümakat.
