Palajatka karaloʼuta nüshajalaka Juan 2:1-29
-
Aapajiraashi nikii Jesús saaʼu waainjala süpüla anajiraainjanain waya wachikuaʼa nümaa Maleiwa (1, 2)
-
«Ayatajana waya oonooin sümaa tü nuluwataakalü anain» (3-11)
-
Nnojotsü jeketüin tü pütchi aluwataanakalü anain, kakaliairü (7, 8)
-
-
Tü nüshajakalü anainjee Juan namüin na anoujashiikana (12-14)
-
«Nnojo kachiiruain jaaʼin nakuwaʼipa na manoujainsaliikana» (15-17)
-
Eejüinjatü waaʼin nuulia chi niʼipolokoi Cristo (18-29)
2 Tachonniichein, tashajüin jümüin pütchikat tüü süpüla nnojoliinjanain kaainjalain jia. Eeshi chi akaalinjakai waya, ichaa nia nüʼütpaʼa chi Washikai Maleiwa, nia Jesucristo, loto akuwaʼipachi nia, nükaalinjeechi wanee wayuu eekai kaainjalain jaʼaka.
2 Aapajiraashi nia nikii saaʼu waainjala süpüla anajiraainjanain waya wachikuaʼa nümaa Maleiwa, nnojoipejeʼe neʼe nia aapajiraain nikii saaʼu waainjala, aapajiraashiaʼaya nia nikii saaʼu saainjala wayuu süpüshuaʼa.
3 Anuu wanee kasa wayaawatakalü akajee weʼraajüin nia: ayatajana waya oonooin sümaa tü nuluwataakalü anain.
4 «Teʼraajüinsa nia», nümataarale wanee wayuu sümaa nnojolin noonooin sümaa tü nuluwataakalü anain, alaa neʼe chia wayuukai, nnojotsü nüküjain tü shiimainkat.
5 Eekajasaʼa eere wanee wayuu eekai oonooin sümaa nünüiki Cristo, shiimainjaʼa maʼin alin Maleiwa nüpüla. Sükajee tia watüjaa aaʼu paaʼinwain waya nümaa.
6 Chi wayuu aküjakai paaʼinwain nia nümaa, shia naaʼinrajatka tü naaʼinrapuʼukat chi nüshatakai akuwaʼipa.
7 Tawalayuu aishiikana tapüla, tü tashajakat jümüin nnojotsü jeketüin aluwataanüin anain, kakaliairü. Shiaʼaya jaapaka tia pütchi kakaliaitkalü aluwataanüin anain.
8 Anii taya ashajüin jümüin süchiki tü pütchi jeketü aluwataanakalü anain, oonooshi nia sümaa tia pütchikat, akaʼaya jia oonooshii jia sümaa, jama nnojoluitpain kojoin maʼin tü piʼyuushikat, shiaitpa chuwataka tü shiimainkalüjaʼaya luusain.
9 Chi wayuu aküjakai chuwatüin luusa naaʼu sümaa nüʼürülain chi nuwalakai, ayatayülia kojoin piʼyuushi naaʼu.
10 Chi wayuu aikai apüla nuwala, müsü chuwatakai saaʼin luusa naaʼu jee nnojoishi kaainjalain nia.*
11 Kojosü piʼyuushi naaʼu chi wayuu aʼürülaakai nooʼomüin nuwala jee müshi waraittakai naaʼin saʼakapünaa tü piʼyuushikat. Nnojotsü nütüjaain aaʼu jalapünaainjachin nia, jama müin moʼupaʼakai naaʼin sutuma kojoin piʼyuushi naaʼu.
12 Tachonniichein, ashajüshi taya jümüin süka sülatinnüipain jaainjala juulia saaʼu nünülia.
13 Jia wayuu kachonniikana, ashajüshi taya jümüin süka jiʼraajüitchipain chi eetüjüikaiya sümaiwa paala. Jia jimaʼaliikana jee majayünnüükana, ashajüshi taya jümüin süka niyamünnüitchipain chi Yolujaakai jutuma. Jia tepichicheinkana, ashajüshi taya jümüin süka jiʼraajüitchipain chi Washikai Maleiwa.
14 Jia wayuu kachonniikana, ashajüshi taya jümüin süka jiʼraajüitchipain chi eetüjüikaʼaya sümaiwa paala. Jia jimaʼaliikana jee jia majayünnüükana, ashajüshi taya jümüin süka katchin jaaʼin, junouja anainrü tü nünüikikat Maleiwa jee ayamuluushi chi Yolujaakai* jutuma.
15 Nnojo kachiiruain jaaʼin nakuwaʼipa na manoujainsaliikana jee nnojo kachiiruain jaaʼin tü kasa eekat natuma. Chi wayuu kachiiruakai aaʼin nakuwaʼipa na manoujainsaliikana nnojoishi alin chi Washikai Maleiwa nüpüla.
16 Alatüsü tia süka müin nakuwaʼipa na manoujainsaliikana, suchuntaain neʼiruku naaʼinrüin kasa mojusü, suchuntaain naaʼin tü kasa neirakaakalü amüin jee aʼwaataashii naya saaʼu tü kasa eekat namaʼana. Shiaʼaya nakuwaʼipaka tia na manoujainsaliikana, nnojotsü shiain tü akuwaʼipaa nikirajakalü anain chi Washi iipünaajachikai.
17 Ajaʼttinneena na manoujainsaliikana sümaʼaleeya süpüshuaʼa tü kasa suchuntaakat naaʼin, eekajasaʼa chi wayuu aaʼinrakai tü nuluwataakalü anain Maleiwa eejeechi süpüla kaʼikat süpüshuaʼa.
18 Tachonniichein, paliʼirü tü kaʼi apütaakat, jaapa achikirü eeinjachin chi niʼipolokoi Cristo. Maaʼulu yaa wattainnapa naalii na niʼipolokana Cristo, müsüjeseʼe watüjaain saaʼu paliʼirüin tü kaʼi apütaakat.
19 Ojuʼitüshii naya waʼakajee, nnojoliipejeʼe naya wapüshin, wapüshirejeʼeya naya yaashiije naya wamaa, ojuʼitapejeʼe naya süpüla sütüjaanüinjatüin saaʼu eein na nnojoliikana wapüshin.
20 Aneekünüshii jia nutuma Chi Maleiwa wulekai akuwaʼipa jee jütüjaaitpa aaʼu tü pütchi shiimainkat.
21 Nnojoishi taya ashajüin jümüin sükajee nnojoluin jütüjaain saaʼu tü pütchi shiimainkat, ashajüshi taya süka jütüjaain saaʼu tia pütchikat, akaʼaya joo tü alawaakat, nnojotsü sünainjeejatüin tü pütchi shiimainkat.
22 ¿Jarai chi aküjakai naʼalain? ¿Aashin niain chi aküjakai nnojolin niain Jesús chi Cristokai? Chi niʼipolokoi Cristo nia chi wayuu nnojoikai kasajachin amüin chi Washikai Maleiwa jee chi nnojoikai kasajachin amüin chi Nüchonkai Maleiwa.
23 Chi eekai nnojolin kasajachin amüin chi Nüchonkai Maleiwa, nnojoishi aleewain nümaa chi Washikai Maleiwa, eekajasaʼa chi wayuu anoujakai nünain chi Nüchonkai Maleiwa aleewashi nümaa chi Washikai Maleiwa.
24 Ayatüinjatü suluʼu jaaʼin tü pütchi jaapakat sümaiwa paala. Ayatülejeʼeya suluʼu jaaʼin tia pütchi jaapakat paala, ayateenaʼaya jia paaʼinwain nümaa chi Washikai Maleiwa jee nümaa chi Nüchonkai.
25 Nüküjatüjülia wamüin paala katüinjatüin woʼu süpüla kaʼikat süpüshuaʼa.
26 Tashajüin jümüin pütchikat tüü nachiki na wayuu emeejeekana jia.
27 Ayatüshii jia nümaa süka nüneekajalain jia, nnojotka choʼujaain jikirajünüinjanain sutuma wayuu. Shiimain maʼin nüneekajalain jia, nnojotsü alawaain tia, nikirajüin jia süchiki kasa süpüshuaʼa. Ayatajanaka jia paaʼinwain nümaa maʼaka nikirajüin jia.
28 Tachonniichein, ayataʼaya paaʼinwain jia nümaa, yalayaleenaka waya sünain aashajawaa niiʼiyalaapa jee nnojoleena waya akatalaain nuulia sutuma japülin waya yaapa nia.
29 Jütüjaale saaʼu lotuin nukuwaʼipa, jütüjaa aaʼulujaʼamata nüchonniin na wayuu aaʼinrakana tü kasa lotokalü akuwaʼipa.
Noota
^ «Nnojotsü kaainjalain wayuu nutuma» eesüjaʼa maluʼurüle tia.
^ «Kamaʼürai» maluʼulu tia suluʼu griego.
