Palajatka karaloʼuta nüshajalaka Pedro 2:1-25
-
Jüchajaa maʼin süchiki tü nünüikikat Maleiwa (1-3)
-
«Müshii jia maʼaka saaʼin ipa eekai katüin soʼu, müshii jia maʼaka saaʼin wanee miichi nukumajaka chi Maleiwakai» (4-10)
-
Müinjana waya naʼaka na manoujainsaliikana maʼaka naaʼin wayuu nnojoliikana noumainpaʼajanain (11, 12)
-
Jüüjüüinjana waya (13-25)
-
Niʼitaain Cristo wapüleerua tü wakuwaʼipainjatkat (21)
-
2 Anashii juuʼulaale suulia jaaʼinrüin kasa mojusü, nnojo jimeejüin wayuu, nnojo piamain juʼupünaa, nnojo suchunjain jaaʼin jee nnojo jüküjain alawaa süchiki wayuu.
2 Maʼaka wanee joʼuu achajaakai maʼin süchira nii, akaainjanaʼaya jia jüchajaainjatü maʼin süchiki tü nünüikikat Maleiwa, tü pütchi shiimainkat süpüla jimiyoʼulaainjanain jee juʼttaainjanain. Tü nünüikikat Maleiwa müsü aka saaʼin wanee leechi eekai anain maʼin,
3 juunteerü tia jütüjaale saaʼu kamaneein maʼin chi Señotkai.
4 Nayoutuin na wayuukana chi makai aka saaʼin wanee ipa eekai katüin soʼu, aneekünapejeʼe nia nutuma Maleiwa jee kojutushi maʼin nia nümüin. Jürütkaapa nünainmüin
5 müshii jia maʼaka saaʼin ipa eekai katüin soʼu, müshii jia maʼaka saaʼin wanee miichi nukumajaka chi Maleiwakai sükajee tü nüpülainkat, nuʼunireetkalaka jukuwaʼipa Maleiwa sükajee tü nüpülainkat süpüla müin juʼutajatkai saaʼin mürüt nümüin, anashiijeetkalaka tia noʼuluʼu nükajee Jesucristo.
6 Anuu tü sümakat wanee pütchi ashajuushi suluʼu tü Karaloʼuta Nüchikimaajatkat Maleiwa: «Teʼitaajeechi chaa Sión wanee wayuu makai aka saaʼin wanee ipa eekai süneekuushin, wanee ipa kojutukat maʼin jee choʼujaakat maʼin. Nnojoleechi amülain neʼe chi wayuu kanoulakai nünain».
7 Kojutukalaka maʼin nia jümüin süka junoujainnapain, eekajasaʼa namüin na wayuu nnojoliikana anoujain müshi nia maʼaka saaʼin «tü ipa nayoutakat na akumajüliikana miichi, shia tü ipa choʼujaakat maʼin»
8 otta meechi nia maʼaka saaʼin «tü ipa süshanaajeechikalü aaʼujee wayuu jee meechi nia maʼaka saaʼin wanee wutai airuʼutka sümüin wayuu». Ashanaashii naya wayuukana süka nnojoliin noonooin sümaa nünüiki Maleiwa, shieeriaʼaya alataka tia namüin.
9 Napüshi jia «na wayuu aneekuushikana, wainma jia suluʼu juluwataain sümaa sacerdotein jia, akatannüshii jia nümüin Maleiwa, aneekuushi jia nutuma Maleiwa süpüla jüküjainjanain sainküin tü mmakat kamaneein maʼin chi Maleiwakai». Müshii neenajakai jaaʼin saʼakajee tü piʼyuushikat süpüla müinjatüin chuwatuuikai jaaʼu tü nuluusainkat, tü luusa anakat maʼin.
10 Nnojoliipuʼushii jia nüpüshin Maleiwa, nüpüshinnapapejeʼe jia maaʼulu, nnojotpuʼusü amülialaain naaʼin jaalin, amülialaaitpapejeʼe naaʼin jaalin.
11 Tawalayuwaa aishiikana tapüla, müshii jia maʼaka naaʼin wayuu nnojoliikana noumainpaʼajanain otta motsoʼopünaaka amaʼa yaa saaʼu tü mmakat, tachuntuin maʼin jümüin nnojoluinjatüin jaaʼinrüin tü suchuntaakat jiʼiruku, tü makat peʼipaakai saaʼin jümaa.
12 Anainjatü jukuwaʼipa suʼupala wayuu süpüshuaʼa, shiʼitaanüle jaaʼu jaaʼinrüin kasa mojusü, sütüjaajeerü aaʼu wayuu anain tü kasa jaaʼinrakat, suʼwaajeechikalaka Maleiwa suluʼujee tia soʼu tü kaʼi nünteechikalü oʼu sünain anaʼlawaa.
13 Jaaʼinreerü tü nüchekakat chi Señotkai jüüjüüle jia namüin na sülaülakana mma, jaʼitashi niain jüüjüüin amüin jia wanee eekai nuluwataain, jama laülaain nia jüpüleerua
14 jee jüüjüülejeʼeya jia namüin na sülaülajanakana mma, jama naluwataaushin nutuma süpüla kasalajanainjatüin natuma tü kasa mojusü saaʼinrakat wayuu jee kojutajanain natuma na aaʼinrakana kasa eekai anain.
15 Nücheküin Maleiwa jüpüleerua anainjatüin jukuwaʼipa shiiʼiree koʼutajanain jutuma na wayuu nnojoliikana ayaawatüin saaʼu nakuwaʼipa, na aashajaakana neʼe süpaʼa mma.
16 Müinjana jia maʼaka naaʼin wanee wayuu eekai taashin akuwaʼipa, nnojoliipejeʼe jia aaʼinrajanain kasa mojusü sünainjee neʼe taashin jukuwaʼipa, nüchepchiainjana jia chi Maleiwakai.
17 Kojuta jümüin wayuu maʼleekalia, alinjana jüpüla napüshuaʼa na juwalayuukana, kojuta jümüin Maleiwa otta kojuta jümüin chi aluwataashikai.
18 Jüüjüüinjana na achepchieekana namüin nalaamain sümaa kojutuin naya namüin, nnojoliipejeʼe nayainjanain neʼe kojutuin namüin na nalaamain eekai anamiain jee na nnojoliikana ichein süchiirua nanüiki, kojutuinjanaʼaya namüin na nalaamain nnojoliikana anain amüin wanee kasa.
19 Nüchecherüle naaʼin wanee wayuu soʼunnaa niʼrüin müliaa otta niʼnnülejeʼeya amüin saalinjee wuleein naaʼin noʼuluʼu Maleiwa, talatüsü naaʼin Maleiwa nümaa chia wayuukai.
20 Nnojotsü kasain saamüin jümüin jüchecherüle jaaʼin soʼunnaa jiʼyaatünüin saalinjee aaʼinraa kasa mojusü. Aluʼu anainjaʼa jüchecherüle jaaʼin soʼunnaa müliain jia atumawaa saalinjee jaaʼinrüin kasa anasü, talateerü naaʼin Maleiwa jutuma jaaʼinrüle tia.
21 ¿Aashin shiain aneekuushin apüla jia tia? Jamüshijaʼa Cristo müliashi nia jaaʼu, niʼitaainjeseʼe jüpüleerua tü sukuwaʼipainjatkat jutuma süpüla ayatüinjatüin maʼin jutuma tü nukuwaʼipakat.
22 Nnojoishi nia kaainjalain otta nnojotsü nimeejüin wayuu.
23 Jamüsüjaʼa wanaa sümaa airuʼuluin pütchi nümüin, nnojoishi nia peʼipaain namaa na airuʼutkana anüiki nümüin. Wanaa sümaa müliain nia atumawaa, nnojotsü nüküjain namüin na müliakana atuma nia neʼreenain noʼukajatü. Nuuʼulaain tia najapuluʼu chi laülaashi lotokoi atuma sukuwaʼipa wanee kasa süsalajatpa saainjala wayuu nutuma.
24 Müsü nülüʼüjakai saaʼin waainjala wanaa sümaa nükachennüin sünain wanee wunuʼu* süpüla outajachin nia. Müinnapaka outakai waaʼin süka taashinnapain waya suulia waainjala otta müitpa katakai woʼu süpüla waaʼinrajatüin kasa eekai lotuin akuwaʼipa jee «müinnapa anakai waaʼin saalinjee niʼikaajüin maʼin waaʼujee».
25 Mapuʼushii jia maʼaka saaʼin wanee anneerü eekai unatüin neʼe, aleʼejapejeʼe jia jüchikuaʼa nünainmüin chi arüleejüikai jia jee chi aaʼinmajüikai jia.
Noota
^ Pünaʼla tia suluʼu tü kanüliakat «Jamaluʼulu pütchikat».
