Palajatka karaloʼuta nüshajalaka Pedro 4:1-19
4 Eʼrüshi Cristo nümüliala wayuuiwaʼaya nia, akaainjanaʼaya neʼe jia wanaawainjatü jukuwaʼipa nümaa Cristo. Chi wayuu müliakai, jaʼyasü naaʼu nuuʼulaain suulia naainjala
2 süpüla nnojoluinjatüin naaʼinrüin tü kasa mojusü suchuntaakat saaʼin wayuu, shiakalaka naaʼinreerüin tü kasa nüchekakalü achiki Maleiwa.
3 Kakalia maʼin jia sünain aaʼinraa tü kasa naaʼinrakat na manoujainsaliikana, maapülinpuʼusalii jia sünain aaʼinraa kasa mojusü, suchuntaapuʼuin jaaʼin ainkawaa, alanaʼaleepuʼusü jutuma tü jüsüinkat, maaʼinpuʼu aaʼinchii jia sünain aaʼinraa miʼiraa, aainjapuʼushii jia miʼiraa shiiʼiree jüsaweein neʼe jee aʼwaajapuʼushii jia maleiwayaasü, nnojotsü anain tia.
4 Ponusü naaʼin naya wayuukana nnojoluitpain müin jukuwaʼipa maʼaka nakuwaʼipa sünain aaʼinraa kasa eekai mojuin, mojukalaka nanüiki jüchiki sünainjee tia.
5 Asoutuinjana saaʼu naainjala naya wayuukana nümüin Cristo, chi kasalajanainjachikai atuma saainjala wayuu, jaʼitasü türa eekai katüin soʼu jee türa eekai outuitpain.
6 Aküjünüsiaʼaya tü pütchi anakat maʼin* namüin na wayuu outuinnapakana* mayaainjeʼe süsalain naya naainjala atumawaa maʼaka süsalain atumawaa saainjala wayuu, oʼuninnüsü nakuwaʼipa nutuma chi Maleiwakai sükajee tü nüpülainkat.
7 Alüʼütsü maʼin tü kaʼi sajaʼttajatkalü oʼu kasa süpüshuaʼa, anakajaʼa laülaale jaaʼin otta eejüle jaaʼin sünain oʼuraajaa.
8 Shia alanaʼaleeinjatka maʼin jümüin aijiraain jia, chi wayuu aikai apüla wanee wayuu nülatirüin waneepia sooʼopünaa naaʼin tü kasa aainjünakat nümüin.
9 Anakajaʼa kamaneere jia sümüin wayuu, nnojoliipejeʼe jia aʼyounalaainjanain saaʼujee tia.
10 Wainma tü kasa watüjakalü apüleerua waneʼewai wakua nutuma Maleiwa. Anakajaʼa wakaalinjale na waneinnua süpüla kamaneeinjachin chi Maleiwakai namüin, wainma sukuwaʼipa tia nutuma.
11 Chi wayuu aashajaakai müinjatü nünüiki maʼaka nünüiki chi wayuu nünüikimaajachikai Maleiwa. Chi wayuu akaalinjakai wanee wayuu, naaʼinrajatü tia maʼaka naaʼinrüin shia chi wayuu akaalinjünakai nutuma Maleiwa sükajee tü nüpülainkat. Nuʼwaajüneechika chi Maleiwakai saaʼu kasa süpüshuaʼa nükajee Jesucristo, nia kojutuinjachika atumawaa jee nia pülaleekaʼaya süpüla kaʼikat süpüshuaʼa. Amén.*
12 Tawalayuu aishiikana tapüla, nnojotsü ainkuuinjatüin jaaʼin sutuma tü kasa alatakat jümüin müinmaʼa yaa, tü makalü aka saaʼin sikoʼu. Nnojotsü ponuinjatüin jaaʼin tia maʼaka sülatakaijaʼaya aaʼin wanee kasa nnojotka maajüin.
13 Aluʼu shiainjaʼa anain talatüle jaaʼin soʼunnaa jiʼrüin tü müliaa niʼrakat Cristo, talateetkalaka jaaʼin soʼu tü kaʼi eʼnneetkalü oʼu pülashin nia.
14 Anakuwaʼipalii jia mojule pütchi jüchiki saaʼu juushikajaain süchiirua nukuwaʼipa Cristo, jama eein tü nüpülainkat Maleiwa jaaʼu, tü anakat maʼin.
15 Eejüinjatü jaaʼin suulia jiʼrüin müliaa sutuma juʼunuliin saaʼin wayuu, kaʼruwaraliin jia, kaainjaraliin jia jee sünainjee jikerotuin sünainpünaa sukuwaʼipa wayuu.
16 Nnojoishi japülinjachin wanee wayuu niʼrüle müliaa sutuma nuushikajaain süchiirua nukuwaʼipa Cristo,* shia anaka aluʼu nuʼwaajüle chi Maleiwakai sükajee nuushikajaain süchiirua nukuwaʼipa Cristo.
17 Süsalashii naainjala maaʼulu yaa na wayuu nipialujunakana Maleiwa. Wayale süsalain waainjala palajana, ¿kaseetkajasaʼa maʼin alatüin namüin na wayuu nnojoliikana oonooin sümaa tü pütchi anakat maʼin nüchiki Maleiwa?
18 «Kapüleerejeʼeya nuʼtteʼennüin chi wayuu lotokoi akuwaʼipa, ¿kaseetkajasaʼa maʼin alatüin nümüin chi wayuu manoulakai nünain Maleiwa jee kaainjaraikai?».
19 Na wayuu eʼrakana müliaa sünainjee aaʼinraa tü kasa nüchekakat achiki Maleiwa, anakajaʼa ayatüle naaʼinrüin kasa eekai anain sümaa neʼitaain nakuwaʼipa najapuluʼu chi Kakumainkai waya, watüjaa aaʼu shiimain nünüiki.
Noota
^ Pünaʼla tia suluʼu tü kanüliakat «Jamaluʼulu pütchikat».
^ Nnojotsü woʼtchejaain amaa shiain aküjüneein achiki eein na wayuu makana outakai naaʼin saaʼujee kaainjalain naya. Paashajeʼera Éf 2:1.
^ Pünaʼla tia suluʼu tü kanüliakat «Jamaluʼulu pütchikat».
^ «Cristianos» maluʼulu tia suluʼu griego.
