Palajatka karaloʼuta nüshajalaka Pedro 5:1-14
5 Saaʼujee laülaashin taya napüleerua na anoujashiikana jee tatüjaain saaʼu tü müliaa niʼrakat Cristo otta napüshin taya na wayuu kojuteenakana nutuma Maleiwa, anuu wanee kasa tachuntaka maʼin namüin na laülaashii chakana jaʼaka:
2 müinjana jürüleejakai naaʼin na anoujashiikana nünain Maleiwa, na eʼitaanakana jajapuluʼu, jaaʼinmajüinjana maʼin naya, nnojotpejeʼe jaaʼinrajatüin tia sükajee münajalain shia jümüin, jaaʼinrajatü süka anakalü akuwaʼipa nuʼupala Maleiwa, nnojotsü jaaʼinrajatüin tia sükajee juwalaajünüinjanain saaʼu, jaaʼinmaainjatü maʼin tia.
3 Nnojoishii müinjanain jia maʼaka naaʼin nalaamain* na niʼitaakana Maleiwa jajapuluʼu, anainjatü jukuwaʼipa napüleerua süpüla nashatüinjatüin shia na makana aka saaʼin naʼanneetse Maleiwa.
4 Niiʼiyalaapa chi arüleejüi kojutukai maʼin, aapüneerü jümüin wanee kasa anasü maʼin* matüjainkalü ajaʼttaa.
5 Jia wawalayuu jimaʼaliikana, anakajaʼa jüüjüüle jia namüin na wayuu miyoʼuyuukana juulia, nnojotpejeʼe yaletajiraainjatüin jaaʼin, jama nnojoluin talatüin naaʼin Maleiwa namaa na wayuu yaletakana aaʼin. Amülialaapejeʼe naaʼin naalin na wayuu nnojoliikana yaletüin aaʼin.
6 Anakajaʼa nnojorüle yaletüin jaaʼin nuʼupala chi Maleiwa pülashikai maʼin,* kojuteenakalaka jia nutuma soʼu tü kaʼi niʼitaakat süpüla tia.
7 Jüpüta najapuluʼu Maleiwa süpüshuaʼa tü kasa shapaakalü atuma jaaʼin, jama jülüjain maʼin jia naaʼin.
8 Ayataʼaya laülaain jaaʼin sümaa eejüin maʼin jaaʼin. Saaʼu jüʼünüüin chi Yolujaakai, warai müshi nia jüʼütpünaa maʼaka naaʼin wanee león eekai nulonojooin shiiʼiree nikeein wayuu.
9 Jiyoutüinjatü achiki tü nümakat, icheinjatü maʼin tü junoulakat. Soto jaaʼin wanaawain tü jümülialakat sümaa namüliala na wawalayuukana sainküin tü mmakat.
10 Süchikijee müliapünaain jia atumawaa motsomüin, ekirajüneena jia jee yapeena jia süpüla aʼyatawaa nutuma chi Maleiwa kamaneekai maʼin, chi aneekakai jia süpüla kojutuinjanain jia süpüla kaʼikat süpüshuaʼa nükajee Cristo. Katsüinjeerü junoula nutuma chi Maleiwakai, katsüinjeerü jaaʼin nutuma jee nükaalinjeena jia suulia jaaʼinrajüin kasa mojusü.
11 Niaʼaya pülaka süpüla kaʼikat süpüshuaʼa. Amén.
12 Anuu wanee jeʼrasüchein pütchi tashajiraka jümüin nükajee Silvano, nia wanee wawala oonookai maʼin waneepia nümüin Maleiwa. Tashajirüin pütchikat tüü süpüla takatchinrüin jaaʼin jee süpüla taküjain jümüin shiimain maʼin kamaneein chi Maleiwakai. Anakajaʼa jüchecheraale süchiirua kamaneeinjachin chi Maleiwakai jümüin.
13 Asakünüshii jia sutuma tü wawala yaakat Babilonia, tü aneekuushikat wanaa jümaa otta nüsaküinña jia Marcos, chi makai aka naaʼin wanee tachon tamüin.
14 Anakajaʼa jujuupajiraale* namaa na juwalayuukana jüsakapa naya.
Kasataalejeseʼe jimatüin jaaʼin jüpüshuaʼa jia paaʼinwakana nümaa Cristo.
Noota
^ Jee shiale «eekai laülaain naaʼu na niʼitaakana Maleiwa jajapuluʼu».
^ «Kotse» maluʼulu tia suluʼu griego.
^ «Suupünaa najapü chi Maleiwa pülashikai maʼin» maluʼulu tia suluʼu griego.
^ «Jutuʼla naya süka alin naya jüpüla» maluʼulu tia suluʼu griego.
