Palajatka karaloʼuta nümüinjatka Timoteo 2:1-15
2 Tamüshii paala jia palajana, achuntunajatü nümüin Maleiwa saaʼu wayuu süpüshuaʼa, oʼuraajünüinjatü apüleerua, asoutunüinjatü aaʼu jee aapünajatü analuʼut saaʼu wayuu maʼleekalia.
2 Achuntunajatü napüleerua na sülaülashiikana mma jee napüleerua napüshuaʼa na aluwataashiikana süpüla anainjatüin waaʼin jee jimatüinjatüin waaʼin sünain aʼwaajaa chi Maleiwakai jee müsia laülaainjatüin waaʼin sünain aainjaa wanee kasa.
3 Anasü tia jee lotusü sukuwaʼipa noʼuluʼu chi Maleiwa Oʼtteʼerakai waya.
4 Nücheküin chi Maleiwakai suʼttaainjatüin wayuu maʼleekalia jee shiyaawatüinjatüin saaʼu tü pütchi shiimainkat.
5 Waneeshia neʼe chi Maleiwakai jee waneeshia neʼe chi akaalinjakai wayuu süpüla anajiraainjatüin shia nümaa Maleiwa, chia makai nia Cristo Jesús,
6 aapajiraashi nia nikii saaʼu wayuu süpüshuaʼa. Aküjüneerü süchiki tia soʼu tü kaʼi aneekünakat süpüla.
7 Aneekünüshi taya süpüla taküjainjachin tia pütchikat jee aneekünüshi taya süpüla taluwataaushinjachin. Shiimain tü tamakat, nnojoishi taya aküjain alawaa. Tekirajüin na wayuu nnojoliikana judíoin süpüla kanoulainjanain naya nünain Maleiwa jee tekirajüin naya sünain tü pütchi shiimainkat.
8 Kasataalejeseʼe nayalerüin najapü na tooloyuukana sünain achuntaa nümüin Maleiwa na waneepiakana nümaa, jaʼitashii jalain naya. Nnojoliinjana naya jashichin jee nnojoliinjana aaʼayajiraain naya.
9 Akaʼaya na jieyuukana anainjatü sukuwaʼipa naʼanaaya jee nnojoliinjana aʼalaajaain suluʼu nasheʼin jee laülaainjatü naaʼin, nnojoluinjatü atürensajuushin naʼwala, nnojoluinjatü nanain ooro jee kaaʼürüla* jee nnojoluinjatü naʼatüin nanain kuluulu eekai kojutuin maʼin,
10 anainjatü tü kasa naaʼinrakat, jama shiain nakuwaʼipain tia na jieyuu aʼwaajakana Maleiwa.
11 Nnojotsü yaletüinjatüin saaʼin wanee wayuu shikirajünapa jee nnojoluinjatü shia aashajaain.
12 Nnojotsü tacheküin shikirajüinjatüin wanee jierü jee nnojotsü laülaainjatüin shia naaʼu wanee wayuu, shia anaka aluʼu nnojorüle saashajaain.
13 Nia Adán akumajünaka palajana, shiakalaka akumajünüin Eva nüchikijee.
14 Nnojoishi niain emeejünüin Adán, shia emeejünaka tü jietkat, kaainjaratkalaka shia.
15 Ayateeriaʼaya oʼtteʼennüin shia saaʼujee kachooin shia. Aainjüneerü tia süpüleerua ayatüleʼeya kanoulain shia, aire wayuu süpüla, wulere sukuwaʼipa jee laülaale saaʼin.
Noota
^ «Perlas» maluʼulu tia alijunaikiruʼu.
