Palajatka karaloʼuta nümüinjatka Timoteo 3:1-16
3 Anuu wanee pütchi anoujunuinjatka anain: eere wanee wayuu aʼyataakai süchiirua laülaashinjachin nia,* anasü maʼin tü niʼyataweekalü anain.
2 Chi wayuu aʼyataakai süchiirua laülaashinjachin nia, nnojotsü ayoujunuinjatüin nukuwaʼipa saaʼu wanee kasa, waneesüinjatü nuʼwayuuse, niisattüinjatü nukuwaʼipa, laülaainjatü naaʼin, lotuinjatü sukuwaʼipa tü kasa naainjakat, kapülainjatü naaʼin nakuwaʼipa na waneinnua jee atüjainjachi nia ekirajaa.
3 Nnojoishi epeʼrülinjachin, nnojoishi kataʼaralinjachin jee nnojoishi icheinjachin süchiirua nünüiki, nnojoishi katkaaralinjachin jee nnojotsü alanaʼaleeinjatüin sujutu nneerü nümüin.
4 Anainjatü sukuwaʼipa tü kasa naaʼinrakat napüleerua na nipialujunakana jee jüüjüüinjana na nüchonniikana nümüin sümaa laülaain naaʼin.
5 Isale nüchiki wanee wayuu anain sukuwaʼipa nutuma tü kasa naaʼinrakat napüleerua na nipialujunakana, ¿jamataalainjatü sukuwaʼipa nutuma süpüla naaʼinmajüinjanain na anoujakana nünain Maleiwa?
6 Nnojoishi laülaashinjachin wanee wayuu jekechikai sünain anoujaa suulia yaletajüin naaʼin jee suulia süsalain nia naainjala maʼaka süsalain atumawaa naainjala chi Yolujaakai.
7 Anainjatü nanüiki na manoujainsaliikana nüchiki, nnojoleechika niyoujunuin saaʼujee wanee kasa jee nnojoleechika nimeejünüin nutuma chi Yolujaakai.
8 Akaataajaʼa neʼe na neʼipajanakana na laülaashiikana, laülaainjatü naaʼin, nnojotsü piamainjatüin noʼupünaa, nnojoishii asüliinjanain maʼin wiino jee nnojotsü kachiiruainjatüin maʼin naaʼin washirüü jee akanajaa nneerü,
9 aluʼu shiainjaʼa anain nachecheraale sünain tü nütüjaakalü aaʼu Maleiwa, tü nanoujakalü anain na anoujashiikana jee naaʼinrajatü tia sümaa wulein naaʼin.
10 Atüjaanajatü aaʼu palajana keraale naya süpüla tia aʼyatawaakat, nnojorülejeʼe eein wanee kasa ayoujunaka aaʼujee naya, anashiijaʼamata neʼipajanale naya na laülaashiikana.
11 Akaataajaʼaya neʼe na jieyuukana, laülaainjatü naaʼin, nnojoliinjana perulaayuulin, keisalainjana sümüin nakuwaʼipa jee jaʼyainjatü saaʼu nakuwaʼipa waneepiain naya nümaa Maleiwa.
12 Na neʼipajanakana na laülaashiikana waneesüinjatü naʼwayuuse, anainjatü tü kasa naaʼinrakat napüleerua nachonnii jee napüleerua na nepialujunakana.
13 Anasü pütchi nachiki na wayuu anakana atuma sukuwaʼipa naʼyataain jee nnojotsü eein wanee kasa ataʼülaka nakuwaʼipa süpüla naashajaain süchiki tü nanoulakat nünain Cristo Jesús.
14 Mayaapejeʼe toʼuneechin chaa pümaʼanamüin soʼu palit kaʼi, tashajüin pümüin karaloʼutakat tüü,
15 jama kamaʼaleere joo taya, pütüjaajeetkalaka saaʼu tü pukuwaʼipainjatkat naʼaka na nüpüshikana Maleiwa, na anoujakana nünain chi Maleiwa matüjainkai outaa, müshii naya maʼaka saaʼin süsaʼa wanee miichi jee naaʼinmajüin tü pütchi shiimainkat.
16 Wainma maʼin tü kasa nütüjaakalü aaʼu Maleiwa nüchiki chi wayuu aʼwaajüinjachikai nia sünain kasa süpüshuaʼa: ‹Wayuushi Jesús, lotusü nukuwaʼipa nutuma Maleiwa wanaa sümaa meʼrujuin nia nüchikuaʼa nutuma, eeʼiyalaashi nia namüin na aapieekana, aküjünüsü pütchi nüchiki sainküin mma, anoujasü wayuu nünain jee kojutushi nia atumawaa wanaa sümaa nuʼunuin chaa iipünaamüin›.
Noota
^ Jee niale «wanee wayuu jülüjeekai aaʼin jee aaʼinmajeekai na anoujashiikana».
