Palajatka karaloʼuta nümüinjatka Timoteo 4:1-16
4 Saashin tü pütchi nümaʼanajeejatkat Maleiwa eejeena wayuu mapeena eekai nooʼulaweenain suulia tü nanoujakalü anain süka shieerüin neʼe jülüjain naaʼin tü pütchi emeejünakalü aka naya jee jülüjeerü naaʼin tü shikirajakalü anain yolujaa.
2 Alatüsü tia süka piamain noʼupünaa na wayuu aküjakana alawaa jee nnojotsü mojuin naaʼin saalinjee tü kasa naainjakat.*
3 Napülajüin noulia na wayuukana kasaalüinjanain naya jee neküinjatüin wanee eküülü eekai nümaʼanajeejatüin Maleiwa, tü neküinjatkat jee tü naapajatkalü aaʼu analuʼut na wayuu kanoulakana jee atüjaakana saaʼu tü pütchi shiimainkat.
4 Anasü maʼin süpüshuaʼa tü kasa nukumajalakat Maleiwa, saapünülejeʼeya analuʼut saaʼu nnojotsü kasain ayoutunajatüin
5 süka wuleitpain tü eküütkat naashin Maleiwa jee oʼuraajüshii waya saaʼu.
6 Püchiaapa na wawalayuukana sükajee tia pütchikat, aneerü sukuwaʼipa tü piʼyataainkat nümüin Cristo Jesús. Ekirajüneechi pia sükajee tü pütchi punoujakalü anain otta tü pütchi anakat maʼin* ekirajünakalü anain pia, tü puʼunirakalü achiirua pukuwaʼipa.
7 Piyouta tü alawaa mojutukalü atuma Maleiwa maʼaka tü naashajaakalü achiki na jieyuu laülaayuuinnakana, shia anaka pikirajaale süpüla puʼwaajüinjachin chi Maleiwakai.
8 Eesü tü kasa anakalü apüla aainjaa ejercicio, eekajasaʼa aʼwaajaa chi Maleiwakai, anasü süpüla kasa süpüshuaʼa, jama weʼreenain kasa anasü sutuma maaʼulu jee müsia mapeena.
9 Anoujunuinjatü anain tia pütchikat jee aapaanajatü amaa shia.
10 Müshiijeseʼe waʼyataain maʼin jee waaʼinmaain maʼin süpüshuaʼa tü kasa waainjakat, jama wanoujain sünain weʼreenain kasa anasü nutuma chi Maleiwa matüjainkai outaa, chi Oʼtteʼerakai wayuu süpüshuaʼa, naya nuʼtteʼeraka maʼin na oonookana waneepia sümaa nünüiki.
11 Ayataʼaya puluwataain naya sünain tia pütchikat jee pikiraja naya sünain.
12 Nnojo puuʼulaain mojutuin pia sutuma wayuu saaʼujee jintülin pia suulia. Anakajaʼa anale pukuwaʼipa noʼupala na anoujashiikana sükajee anain pünüiki, laülaain paaʼin, alin püpüla wayuu, anain punoula jee wulein pukuwaʼipa.
13 Sümaʼainruʼu tantüin chaa pümaʼanamüin, ayataʼaya pia sünain paashajeʼerüin pütchi suʼupala wayuu, ayataʼaya pia sünain achiawaa jee sünain ekirajaa.
14 Jülüja maʼin paaʼin tü kasa naapakat Maleiwa pümüin, tü eʼitaanakat pajapuluʼu sükajee wanee pütchi aküjünatüjütkalia paala. Aapünüsü tia pümüin soʼu neʼitaain najapü na laülaashiikana paaʼu.
15 Püsakireʼera paaʼin sünain tia, piʼyataa maʼin sünain, shiʼreetka wayuu süpüshuaʼa laülaain paaʼin sünain anoujaa.
16 Jülüja maʼin paaʼin tü pukuwaʼipakat otta tü pikirajakalü anain. Nnojo puuʼulaain suulia paaʼinrüin tia, müle sukuwaʼipa putuma oʼttaajeechi pia jee oʼttaajeenaʼaya na aapajakana pünüiki.
Noota
^ Jee shiale «müsü shiʼitaanakai saaʼin kachueera jaʼisü sünain naaʼin».
^ Pünaʼla tia suluʼu tü kanüliakat «Jamaluʼulu pütchikat».
