Chiiruaajatka karaloʼuta namüinjatka na chajanakana Tesalónica 3:1-18
3 Tawalayuwaa, ayataʼaya juʼuraajüin wapüleerua süpüla suʼwalakajaamaatüin tü nünüikikat Jehová,* kojuteetkalaka shia sümüin wayuu maʼaka kojutuin shia jümüin.
2 Ayataʼaya juʼuraajüin wapüleerua süpüla nnojoliinjanain jamajüin waya sutuma wayuu eekai mojulaain jee eʼrülin wayumüin, jama nnojoluin sunoujayaa sümüin wayuu süpüshuaʼa.
3 Waneepiashi jümaa chi Señotkai, nüchechereerü jaaʼin jee naaʼinmajeena jia nuulia chi Yolujaakai.*
4 Sutuma woushikajaain süchiirua nukuwaʼipa chi Señotkai, watüjaa aaʼulu joonooin sümaa tü waluwataakalü anain jia jee ayateenain joonooin sümaa tü pütchikat.
5 Kasataalejeseʼe ayatüin nükaalinjain jia chi Señotkai süpüla alinjachin jüpüla chi Maleiwakai jee jüchecherüinjatüin jaaʼin süpüla jiʼyataainjanain nümüin Cristo.
6 Tawalayuwaa, wachuntuin maʼin jümüin saaʼu nünülia chi Waseñotsekai Jesucristo jükatalaainjanain nuulia chi anoujashi maʼlaüleʼerüinkai naaʼin sünain anoujaa jee nnojoikai aaʼinrüin tü waluwataakalü anain jia.
7 Jütüjaa aaʼu tü jaaʼinrajatkat süpüla jüshatüinjatüin wakuwaʼipa, jama laülaain waaʼin sünain tü anoujaakat juʼupala.
8 Nnojotsü maliain wapüleerua tü kasa wekakalü aaʼu. Aʼyataashii waya soʼukai jee saʼwai sümaa meemeraain waya, waaʼinrüin tia suulia wekeʼejüin jaaʼin süchiirua wanee kasa choʼujaaka wamüin.
9 Nnojotsiaajeʼe mojuin wachuntule jümüin wanee kasa, shiajaʼa neʼe aneein tü kasa waaʼinrakat juʼupala süpüla jüshatüinjatüin wakuwaʼipa.
10 Anuu tü waluwataakalü anain jia soʼu chajanainkai waya jümaa: «Chi wayuu nnojoikai aʼyataweein, anashijaʼamata nnojoire niküin».
11 Waapa achikichii eein waneinnua anoujashii jaʼaka maʼlaüleʼerüinkana aaʼin, nnojoishii naya aʼyataain jee ekerotushii naya sünainpünaa sukuwaʼipa wayuu.
12 Wachuntuin maʼin namüin naya wayuukana saaʼu nünülia chi Señotkai Jesucristo naʼyataainjanain süka anaka akuwaʼipa jee neküinjanain saaʼu süliapala tü naʼyataainkat.
13 Jee müshiʼiya jiakana tawalayuu, ayataʼaya jaaʼinrüin kasa eekai anain.
14 Eere wanee wayuu jaʼaka nnojoikai oonooin sümaa tü pütchi ashajünakat suluʼu karaloʼutakat tüü, eeja maʼin jaaʼin* nuulia jee nnojo aleewain jia nümaa süpüla niʼrüinjachin japülii.
15 Nnojoipejeʼe müinjachin nia jümüin maʼaka naaʼin wanee jüʼünüü, ayataʼaya jüchiaain nia maʼaka jüchiaain wanee juwala.
16 Kasataalejeseʼe jimatüin jaaʼin waneepia nutuma chi Señot kamaʼanajeejachikai tü jimataakalü aaʼin. Kasataalejeseʼe eein jümaa chi Señotkai.
17 Tayakai Pablo tashajüin karaloʼutakat tüü süpüla tasaküin jia, maʼwaisia tanüiki tashajapa wanee karaloʼuta süpüla jütüjaain saaʼu tashajalain shia.
18 Kasataalejeseʼe kamaneein jümüin chi Waseñotsekai Jesucristo.
Noota
^ Pünaʼla tia suluʼu tü kanüliakat «Sooʼomüin pütchi A5».
^ «Kamaʼürai» maluʼulu tia suluʼu griego.
^ «Kayaawase jutuma chi wayuukai» maluʼulu tia suluʼu griego.
