Chiiruaajatka karaloʼuta namüinjatka na chajanakana Corinto 1:1-24
1 Karaloʼutakat tüü tashajala tayakai Pablo, aneekuushi taya nutuma Maleiwa süpüla taluwataaushinjachin nutuma Cristo Jesús, anii tamaa chi wawalakai Timoteo. Karaloʼutakat tüü namüinjatü na anoujashii chakana Corinto jee namüinjatü napüshuaʼa na aneekuushikana nutuma Maleiwa chakana Acaya.
2 Kasataalejeseʼe kamaneein jümüin chi Washikai Maleiwa jee jimatüin jaaʼin nutuma jee nutuma chi Señotkai Jesucristo.
3 Kasataalejeseʼe nuʼwaajünüin chi Nümaleiwasekai chi Waseñotsekai Jesucristo sümaa Nüshin nia. Nia kanainjeejachika* tü aliikalü apüla wayuu jee nia chi amülialakai saaʼin wayuu.
4 Nümülialüin waaʼin Maleiwa weʼrapa müliaa, wamülialüinjeseʼe saaʼin wayuu süka nümülialüin waaʼin, jaʼitasü jeʼtsüin maʼin tü müliaa shiʼrakat wayuu.
5 Eʼrüshii waya müliaa sükajee woushikajaain süchiirua nukuwaʼipa Cristo. Amüliajünapejeʼe waaʼin nükajee Cristo.
6 Eʼrüshii waya wamüliala süpüla wamülialüinjatüin jaaʼin jee süpüla juʼtteʼennüinjanain. Amüliannüsü waaʼin süpüla wamülialüin jaaʼin. Jüchechereetkalaka jaaʼin soʼunnaa tü müliaa jiʼrakat maʼaka tü müliaa weʼrakat.
7 Watüjaa aaʼu nnojoleenain juuʼulaain suulia anoujaa, jama watüjaain saaʼu jiʼrüin müliaa maʼaka tü müliaa weʼrakat jee watüjaa aaʼu jümülianneenain aaʼin maʼaka wamüliannüin aaʼin.
8 Tawalayuwaa, anasü jütüjaale saaʼu tü müliaa weʼrakat suluʼupünaa tü mmakat Asia,* kapüleesü maʼin tia kasa weʼrakat. Isakalaka wachiki wachecherüinjatüin waaʼin wamüiwaʼa, ayoʼujaasü maʼin waaʼin, outajanayaa waya waaʼinruʼu.
9 Shiimainña maʼin weʼrüin tü outaakat wooʼomüin. Alatüsiaʼaya tia süpüla nnojoluinjatüin weʼitaain waaʼin wanainjiraa, niainjachi weʼitaaka anain waaʼin chi Maleiwa asoʼireʼerakai saaʼin wayuu outusü.
10 Nuʼtteʼerüin waya suulia outajüin waya jee nuʼtteʼereenaʼaya waya wachikuaʼa, watüjaa aaʼu meerüinña tia.
11 Eepejeʼeya süpüla juchuntuin maʼin wapüleerua, watteenaka naalii na aapakana analuʼut wamüin saaʼujee wattain naalii na achuntakana wapüleerua.
12 Aʼwaataashii waya suluʼu wulein waaʼin,* jama nnojoluin yarüttüin wakuwaʼipa, nnojotsü piamain woʼupünaa sümüin wayuu, shialeekajaʼa jümüin jiakana. Kamaneeshii waya maʼaka kamaneein chi Maleiwakai jee nnojotsü neʼe waainjain tü kasa sütüjakalü apüleerua wayuu.
13 Tü pütchi washajakat jümüin, nnojotsü shiain wanee kasa nnojotka jütüjaain aaʼu jee nnojoleetka jiyaawatüin aaʼu. Tatüjaa aaʼu jiyaawateerüin saaʼu süpüshuaʼa.
14 Jiyaawatüitpa aaʼu juʼwaataain waaʼu maʼaka waʼwaataajeenain jaaʼu süntaleepa nükalia chi Waseñotsekai Jesús.
15 Sutuma tatüjaaitpain saaʼu müin tia, chejeweeshi taya anaʼlaain jümüin palajana, talateetkalaka jaaʼin jüchikuaʼa.
16 Antajachiaa taya taküjainruʼu jümaʼanamüin toʼunapa Macedoniamüin. Jee süchikijee taleʼejüin Macedoniajee, antapünaainjachiaa paala taya tachikuaʼa jümaʼanapünaa süpüla jiʼikajaainjachin taya süseʼeruʼu tü wopu chaʼwatkat Judea.
17 Wanaa sümaa taaʼinrajatüin tia, nnojotsü taaʼinrüin neʼe shia süpaʼa mma jee nnojotsü shia taaʼinrüin süpüla taaʼinrüin neʼe tü anakat saaʼin tamüin. Nnojoikalaka «aa» tamüin neʼe süpüla «nnojo» tamataalain süchikijee.
18 Shiimainña maʼin tü waküjakat jümüin, jiʼitaa jaaʼin nünain Maleiwa. Jamüshiijaʼa «aa» wamüle jümüin, nnojoishii süpüla «nnojo» wamüin jümüin süchikijee.
19 Jesucristo chi Nüchonkai Maleiwa, (chi taküjakai achiki jümüin jee chi nüküjakai achiki Silvano otta Timoteo), nnojoishi neʼe «aa» müin nia sümüin wanee kasa sümaa «nnojo» nümataalain süchikijee, nikeraajüinña waneepia tü nümakat.
20 Süpüshuaʼa tü kasa nüpansaajakat Maleiwa, ekeraajüsiaʼaya shia nükajee Jesús. Müshiijeseʼe «amén»* wamüin nümüin Maleiwa nünülialuʼu Jesús süpüla kojutuinjachin atumawaa Maleiwa.
21 Chi apansaajakai süchiki juushikajaain wanaa wamaa süchiirua nukuwaʼipa Cristo, nia chi Maleiwakai, chi kaneekajalakai waya.
22 Müsüjaʼa niʼitaakai saaʼin wanain wanee jeerü. Tia jeetkat shia tü nüpülain niʼitaakat suluʼu waaʼin, tü nüpansaajakalü akajee wamüin tü kasa eejeetkat nutuma mapeena.
23 Nnojoiyüiya taya oʼunuin Corintomüin suulia mojuin maʼin jaaʼin. Nütüjaa aaʼu Maleiwa shiimain tü tamakat jümüin.
24 Nnojoishiisa waya laülaain saaʼu tü junoulakat, (jama ayatüinña jia sünain tü anoujaakat süka katchin maʼin tü junoulakat) akaalinjalii neʼe waya süpüla talatüinjatüin jaaʼin.
Noota
^ «Washikai» maluʼulu tia suluʼu griego.
^ Pünaʼla tia suluʼu tü kanüliakat «Jamaluʼulu pütchikat».
^ Pünaʼla tü pütchikat «Conciencia» suluʼu tü kanüliakat «Jamaluʼulu pütchikat».
^ Pünaʼla tia suluʼu tü kanüliakat «Jamaluʼulu pütchikat».
