Chiiruaajatka karaloʼuta namüinjatka na chajanakana Corinto 11:1-33
11 Mayaainjeʼe müin taya maʼaka naaʼin wanee wayuu mayaawatüinkai saaʼu nukuwaʼipa, kasataalejeseʼe nnojoliin jukulajaain aaʼin tamaa. Tatüjaapejeʼe saaʼu jüchecherüin jaaʼin suulia jukulajaajüin aaʼin tamaa.
2 Kachipünaashii jia taaʼin maʼaka kachipünaain wayuu naaʼin Maleiwa. Taapüin jia süpüla müinjanain jia maʼaka saaʼin nuʼwayuuse Cristo, taapeein jia nümüin maʼaka saaʼin wanee wayuu eekai nnojoyülüin kasaalüin.
3 Shapaasü taaʼin jaaʼu, jama jimeejünaleere maʼaka shimeejünüin Eva sutuma tü wüikat, jama sumojujaʼaleere tü sulujutkat jikii, nnojoleena jia waneepiain nümaa Maleiwa suluʼujee tia jee nnojoleerü wulein jukuwaʼipa. Chi wayuu oushikajaakai süchiirua nukuwaʼipa Cristo waneepiainjachi nümaa jee wuleinjatü nukuwaʼipa.
4 Jamüshiijaʼa jia müinmaʼa yaa, nüntataarale wanee wayuu jaʼakamüin sünain aküjaa pütchi jümüin nüchiki Jesús, wanee pütchi naata maʼin suulia tü waküjakat jümüin, nnojoleerü mojushiin tia jümüin, jaapaajeerü amaa. Akaataajaʼa neʼe eere wanee kasa naata oʼuniraka tü jülüjakat jaaʼin suulia tü oʼunirapuʼukat shia paala jee süntataarale jaʼakamüin wanee wayuu sünain aküjaa wanee pütchi anakat maʼin sümaa naatain tia pütchikat suulia tü jaapaakalü amaa paala, nnojoleerü mojushiin tia jümüin, jaapaajeerü amaa.
5 Nnojoishiisa alanaʼaleeinña toulia nala «aluwataaushi atüjashii maʼin» jümakana amüin.
6 Mayaainjeʼe nnojolin tatüjain maʼin süpüleerua tü tanüikinjatkat, eesia tü kasa tatüjaakalü aaʼu. Jütüjaa aaʼulu tia süka wachajaain maʼin sukuwaʼipa süpüla waaʼinrüin tia juʼupala.
7 Nnojotsü yaletüin taaʼin sünain taküjain jümüin süka anaka akuwaʼipa tü pütchi anakat maʼin* nüchiki Maleiwa jee nnojoishi taya achekajüin saaʼu shiiʼiree jiainjanain kojutuin atumawaa, ¿mojusüche sukuwaʼipa tia tatuma?
8 Taapaain tü nasülajakat tamüin na anoujashii outkajaakana suluʼupünaa waneirua outkajaalee shiiʼiree taʼyataain jüpüleerua.
9 Soʼu chajachin taya jümaa, eesü tü kasa choʼujaakat tamüin, nnojotpejeʼe kasain tachuntuin jümüin, süka jamüin, na anoujashii antakana Macedoniajee, naapüin tamüin süpüshuaʼa tü kasa choʼujaakat tamüin. Tachajaakalaka sukuwaʼipa süpüla nnojoluin kasain tachuntuin jümüin, ayateerüjaʼaya müin sukuwaʼipa tatuma.
10 Saaʼu toushikajaain süchiirua nukuwaʼipa Cristo, ayateechi taya aʼwaataain suluʼu tia chaa suluʼupünaa tü mma chakat Acaya.
11 ¿Jamüsüche nnojotka kasain tachuntuin jümüin? ¿Shiache süka maalin jia tapüla? Nütüjaa aaʼu Maleiwa alin jia tapüla.
12 Eeshii na wayuu aʼwaataakana suluʼu aluwataaushin naya naashin maʼaka waaʼin wayakana, ayateechikalaka taya sünain aainjaa tü kasa taainjapuʼukat suulia eejüin wanee kasa naʼwaataaka aluʼu naya wayuukana.
13 Nnojoishii aluwataaushin naya wayuukana, emeejülii naya wayuu otta nayayaashii na aluwataaushikana nutuma Cristo.
14 Nnojotsü ponuin taaʼin tia, jaʼitakajeʼe neʼe Satanás nuuʼulaküin müin nukuwaʼipa maʼaka wanee aapiee eekai anamiain.*
15 Müsüjeseʼe nnojoluin ponuin waaʼin lotoyooin nakuwaʼipa na wayuu aʼyataakana nümüin chi Yolujaakai. Neʼreetpejeʼe noʼukajatü saaʼujee tü kasa naaʼinrakat.
16 Anuu tanüiki tachikuaʼa jümüin: nnojo jülüjain jaaʼin wayuuin mayaawatüinsai taya saaʼu takuwaʼipa, jülüjalejeʼeya jaaʼin tia, nnojo jukulajaain aaʼin tamaa saaʼu mayaawatüin taya saaʼu takuwaʼipa. Taʼwaataajeechika saaʼu wanee kasa motsomüinyaakaijeʼe neʼe.
17 Müinmaʼa yaa, nnojoleechi taya yootuin jümaa suluʼu tashatüin nukuwaʼipa chi Señotkai, yootushi taya jümaa maʼaka naaʼin wanee wayuu nnojoikai ayaawatüin saaʼu nukuwaʼipa, atüjakai maʼin naashin süpüleerua nukuwaʼipa otta aʼwaataakai suluʼu nukuwaʼipa.
18 Suʼwaataale wayuu suluʼu tü kasa sümaʼanajeejatkat wayuu, aʼwaataweechijaʼa taya.
19 «Saaʼu wayuuin ayaawatüshii jia saaʼu jukuwaʼipa jaajüin», anashiisü jümüin tü naaʼinrakat wanee wayuu mayaawatüinkai saaʼu nukuwaʼipa.
20 Anashiisü jümüin nukuwaʼipa chi wayuu kachepchiakai jia, chi eekai ajaʼttirüin tü kasa eekai jümaʼanain, chi eekai asütüin wanee kasa juulia, chi eekai alanaʼaleeinña akuwaʼipa juulia otta chi eekai aʼyaatüin jia juwalapünaa.
21 Eʼrüshii waya japülii saaʼu waküjain tia, süka eein waneinnua wayuu jaʼakajee aküjakana iseerüin wachiki naashin anain sukuwaʼipa watuma tü laülawaa eʼitaanakat wajapuluʼu.
Eerejeʼeya wayuu nnojoliikana japülin sünain aʼwaatawaa, nnojoleechijaʼa taya japülin sünain aʼwaatawaa, (jaʼitashijaʼa müin nnojoikai tayaawatüin saaʼu takuwaʼipa saaʼin sümüin wayuu).
22 ¿Wayuu hebreo naya? Müshijaʼa tayakai. ¿Wayuu israelita naya? Müshijaʼa tayakai. ¿Nüikeyuu naya Abrahán? Müshijaʼaya tayakai, nülüin taya.
23 ¿Aʼyataalii naya nümüin Cristo? Anuusa joo tanüiki maʼaka nünüiki wanee wayuu eekai mamainnain: alanaʼaleeshia maʼin taya noulia. Wainmaleʼeya tü kasa taʼyataakalü anain, kojuyatuaichi taya püreesain atumawaa, wainmatuaichi maʼin taya aʼyaajünüin jee kojuyatuaichi maʼin taya ajachijain sutuma outaa.
24 Jaʼraitua nakua na judíokana sünain naʼyaatüin taya apünüintua shikii mekietsalümüin.
25 Apünüintua taʼyaajünüin süka wunuʼu, uwatua teʼinaʼannüin süka ipa, apünüintua tajachijain sutuma palaa, siraasü taaʼu wanee ai sümaa wanee kaʼi chaa pasanain sünain palaa.
26 Wattakuwaishi taya sünain oʼunajawaa, ajachijashi taya sutuma wüinsiraa shiroku süchi, sajachijain taya wayuu kaʼruwarannuu, najachijain taya na wayuu toumainpaʼajeʼewaliikana, sajachijain taya wayuu naataka oumain, ajachijünüshi taya pueulopaʼa, chaa isashiipaʼa, chaa pasanain sünain palaa, najachijain taya na wayuu anoujayaashiikana.
27 Meemeraainsai taya suulia aʼyatawaa, aʼyataashi maʼin taya. Siraʼawaisü ai taaʼu sümaa matunkuin taya, alatitshi taya jamü, wüinñaasüshi taya, kojuyatuaichi maʼin meküin taya, müliashi maʼin taya sutuma jemiai jee masheʼinsai taya.
28 Mayaainjeʼe sülatüin tia tamüin, eesia wanee kasa alatawaikat tamüin weinshi, shapaʼawaisü taaʼin naaʼu na anoujashiikana.
29 Aisü tamüin nümüliala wanee wayuu eekai choʼujaain amüin kaalinwaa. Jashichishi taya naalinjee wanee wayuu eekai eemiajeʼennüin anoula.
30 Waʼwaataainjanale suluʼu wanee kasa, aʼwaataajeechi taya suluʼu tü kasa ayaawatünakalü akajee eein tü kasa isakat tachiki.
31 Nütüjaa aaʼu chi Maleiwakai, nnojolin taküjain taʼalain. Nüshi nia chi Señotkai Jesús jee aʼwaajünajachi nia süpüla kaʼikat süpüshuaʼa.
32 Chaa suluʼu tü mmakat Damasco, nünajira aaʼu soʼu tü pueulokot chi aluwataashikai süpüla nütaʼülirüin taya, niajaʼa chi eʼitaanakai sünain aluwatawaa nutuma Aretas, chi sülaülakai mma.
33 Ashakatinnapejeʼe taya suluʼu wanee kanaasüta, suluʼupünaa wanee wentaana eejatka sünain süsepü tü pueulokot.
Noota
^ Pünaʼla tia suluʼu tü kanüliakat «Jamaluʼulu pütchikat».
^ Jee niale «wanee aapiee eekai warattüin maʼin».
