Chiiruaajatka karaloʼuta namüinjatka na chajanakana Corinto 12:1-21
12 Aʼwaataainjachi taya. Taküjeein jümüin süchiki tü kasa teʼrakat nutuma chi Señotkai jee süchiki tü nüküjakat tamüin, mayaainjeʼe nnojoluin teʼrüin kasa anasü sünainjee tia.
2 Teʼraajüin wanee wayuu paaʼinwakai nümaa Cristo, polooirü pienchimüin juya süchikijee nümaanüin chaa iipünaamüin, chaa eere apünüintuain tü sirumatuʼukat (nnojotsü tatüjaain saaʼu nümaanüle suluʼu wayuuin nia jee suluʼu meʼrujuin nia, niaʼala neʼe Maleiwa atüjaaka saaʼu tia).
3 Teʼraajüinña chia wayuukai (nnojotpejeʼe tatüjaain saaʼu nümaanülejeʼeya suluʼu wayuuin nia jee suluʼu meʼrujuin nia, niaʼala neʼe Maleiwa atüjaaka saaʼu tia).
4 Amaanüshi nia suluʼumüin tü paʼaraiisükat, naapakalaka pütchi nnojotka süpüla süküjain wayuu.
5 Aʼwaataajeechi taya suluʼu nukuwaʼipa chia wayuukai, eekajasaʼa tayakai, aʼwaataajeechi suluʼu tü kasa isakat tachiki.
6 Jaʼitayaain taʼwaataweein nnojoleechi müin taya maʼaka wanee wayuu nnojoikai ayaawatüin saaʼu nukuwaʼipa, jama taküjeerüin tü shiimainkat. Nnojoipejeʼe taya aʼwaataain suulia kojutuleein taya sutuma wayuu sünainjee neʼe tü kasa taaʼinrakat jee sünainjee neʼe tü tamakat
7 süchiki tü kasa anasü maʼin teʼrakat nutuma chi Señotkai.
Suulia yaletajüin taaʼin, müliashi maʼin taya sutuma wanee kasa makat aka saaʼin keipüse sünainka teʼiruku. Tia müsü aka nukuwaʼipa wanee aapiee nümaʼanajeejachi Satanás, aʼyaatakai tawalapünaa waneepia suulia joo yaletajüin taaʼin.
8 Apünüintua maʼin tachuntuin nümüin chi Maleiwakai* nüsünneʼerajatüin tia toulia.
9 Anuujeseʼe nünüiki tamüin: «Aneerü paaʼin sutuma kamaneein taya pümüin, katchinreejeeria maʼin tü tapülainkat paaʼu isale püchiki wanee kasa». Taʼwaataajeechika suluʼu tü kasa isakat tachiki süpüla eeinjatüin taaʼu waneepia tü nüpülainkat Cristo maʼaka saaʼin wanee miichi.
10 Talatüsü taaʼin süka tatüjaain saaʼu eein tü isakat tachiki, talatüshi taya taʼülüjünüle amüin sutuma wayuu, teʼrüle choʼujawaa, müliale taya atumawaa otta sülatüle tamüin wainma kasa saaʼu tanoujain nünain Cristo. Katchinreesia maʼin taaʼin isapa tachiki wanee kasa.
11 Jia kasitka taya süpüla müinjachin taya maʼaka nünüikipala wanee wayuu mayaawatüinkai saaʼu nukuwaʼipa. Nnojotsüje müin takuwaʼipa analejeʼe jünüiki tachiki, jama jütüjaain saaʼu nnojoliin nalanaʼaleeinña toulia nala «aluwataaushi atüjashii maʼin» jümakana amüin, jaʼitashijaʼa wayuʼulaain neʼe taya.
12 Jütüjaa aaʼu tachecherüin taaʼin soʼunnaa müliaa süpüla taaʼinrajatüin tü naaʼinrakat wanee aluwataaushi jee süpüla taaʼinrajachin kasa pülasü.
13 Nnojotsü kasain tachuntuin jümüin, shiakalaka naatain aluʼu jukuwaʼipa tia noulia na wane anoujashiikana, ¿mojusüche tia taaʼinrakat jümüin? Mülejeʼeya sukuwaʼipa tia, motomata jaaʼin taainjala.
14 Apünüintuaichi maʼin taya yapajüin süpüla oʼunaa chaa jümaʼanamüin otta nnojoleerü eein wanee kasa tachuntakat jümüin, jama toʼunushin shiiʼiree akaalinjaa jia, nnojoishi taya oʼunushin shiiʼiree tü kasa eekat jümaʼana. Nayainjana anaajaka nneerü na wayuu kachonshiikana nayaaluʼu nachonnii, nnojoishii nayainjanain anaajüin nneerü na nachonniikana.
15 Talateechi taya sünain aapaa süpüshuaʼa tü kasa eekat tamaʼana otta sünain aapajirawaa tekii jaaʼu. Airejeʼeya jia tapüla, ¿jamakaʼa maaliinka taya jüpüla?
16 Nnojotsü eein wanee kasa tachuntaka jümüin, eekajasaʼa jaajüin jiakana «temeejüin jia» otta «wayuu atüjashi maʼin taya süpüleerua tü tamaʼülakat» jaajüin.
17 ¿Temeejüinche jia nakajee na wawalayuu taluwataakana jümaʼanamüin?
18 Tachuntuin nümüin Tito nünaʼlaainjachin jümüin nümaa chi wawala tajütakai nümaa. ¿Eesüche wanee kasa nimeejakalü aluʼu jia Tito? ¿Aashin wanaawayaain waaʼin sünain tü jülüjakat waaʼin? ¿Aashin wanaawayaain waaʼin sünain tü kasa waaʼinrakat?
19 ¿Asoutushiiche waya waaʼuwaa saaʼin jümüin juʼupala jiakana? Nia wasoutaka oʼupala Maleiwa, nia waashajaaka amaa sümaa paaʼinwain waya nümaa Cristo. Jia wawalayuu aishiikana wapüla, süpüshuaʼa tü waaʼinrakat süpülajatü anain jukuwaʼipa.
20 Wainmajüsü taaʼin saaʼu nnojoluin müin jukuwaʼipa maʼaka tü tachekakat jüpüleerua tantapeena jümaʼanamüin jee nnojoluin müin tü takuwaʼipakat maʼaka tü jüchekakat tapüleerua. Eeshiijaʼa mojujiraajeenale jia tapüla, juchumüjiraale, jashichijiraale jia, jaaʼayajiraale, jüküjiraale alawaa jüchiki, shiale neʼe eein perulaa, yaletüle jaaʼin otta jütkaajiraale.
21 Toʼunapeena tachikuaʼa chaa jümaʼanamüin, eeshijaʼa japüijeechire taya nuʼupala Maleiwa jaʼaka jiakana otta eesüjaʼa mojeerüle taaʼin naalinjee na wayuu nnojoliikana ooʼulaʼaleeinña suulia tü kasa mojusü naaʼinrapuʼukat sümaiwa. Na nnojoliikana eeʼiratüin tü jülüjakat naaʼin süchiki tü kasa yarüttüsü naaʼinrapuʼukat sümaiwa, na aʼluwajiraakana nakuwaʼipa* otta na wayuu maapülinkana sünain aaʼinraa kasa mojusü.*
Noota
^ «Señotkai» maluʼulu tia suluʼu griego.
^ Pünaʼla tia suluʼu tü kanüliakat «Jamaluʼulu pütchikat».
^ Pünaʼla tia suluʼu tü kanüliakat «Jamaluʼulu pütchikat».
