Chiiruaajatka karaloʼuta namüinjatka na chajanakana Corinto 2:1-17
-
Talateesü naaʼin na corintojeʼewaliikana nutuma Pablo (1-4)
-
Motuinjatü waaʼin naainjala wanee wayuu jee eiteʼennüinjachi nia nüchikuaʼa naʼakamüin na anoujashiikana (5-11)
-
Antüshi Pablo suluʼumüin tü pueulokot Troas jee Macedonia (12, 13)
-
Tü waʼyataainkat nümüin Maleiwa müsü aka naaʼin na surulaat aleʼejakana süchikijee akanajaa wanee atkawaa (14-17)
-
Nnojoishii waya achuntuin nneerü saaʼu waküjain tü nünüikikat Maleiwa (17)
-
2 Nnojoleerü mojuin jaaʼin tatuma piantua chapeena taya tachikuaʼa jümaʼanamüin.
2 Mojule jaaʼin tatuma, ¿jaraleechikaʼa atalateʼerüin taaʼin? Nieechijaʼa chi mojukai aaʼin tatuma.
3 Ashajüshi taya jümüin suulia mojujain taaʼin naalinjee na talatüinjanakana atuma taaʼin tantapeena jümaʼanamüin. Tatüjaa aaʼu talatüin jaaʼin sutuma tü kasa talatakalü atuma taaʼin.
4 Aʼyalajüshi taya wanaa sümaa tashajüin jümüin karaloʼutakat tüü saaʼujee mojuin taaʼin jee shapaain taaʼin jaaʼujee. Nnojotsü taaʼinrüin tia süpüla mojuinjatüin jaaʼin, taaʼinrüin shia süpüla jütüjaainjatüin saaʼu miyoʼuin tü jaalinkat tapüla.
5 Eerejeʼe wanee wayuu jaʼaka eekai mojuin atuma jaaʼin, nnojoishi tayain mojuin aaʼin nutuma, jia mojuka aaʼin nutuma (süpüla nnojoluin airuʼuluin maʼin tanüiki).
6 Süsalaichipa naainjala chia wayuukai jutuma, keraweechi nia maaʼaya.
7 Kamaneeinjana jia sümaa motuin jaaʼin naainjala chia wayuukai, jümülialüinjatü naaʼin suulia suupünaajüin naaʼin tü mojuukalü aaʼin.
8 Anakalaka jüküjale nümüin alin nia jüpüla.
9 Ashajüshi taya jümüin süpüla tatüjaain saaʼu jaaʼinrülejeʼeya süpüshuaʼa tü aluwataanakalü anain jia.
10 Motule jaaʼin naainjala wanee wayuu, moteeriaʼaya shia taaʼin, (motulejeʼeya taaʼin wanee kasa mojusü aainjünaka tamüin) motusü taaʼin tia shiiʼiree aneein jukuwaʼipa nuʼupala Cristo.
11 Tia makat suuliajatü nimeejaʼalüin waya Satanás, jama watüjaain saaʼu tü nimeejakalü aka wayuu.
12 Tantapa suluʼumüin tü pueulo kanüliakat Troas süpüla taküjainjachin tü pütchi anakat maʼin* nüchiki Cristo, aapünüsü tamüin wanee aʼyatawaa* akooʼomüinraajeetka atuma taʼyataain nümüin chi Señotkai.
13 Shapaapejeʼe taaʼin süka nnojolin tapüla chi tawalakai Tito. Apütaashijeseʼe taya napüla na tawalayuukana, toʼunaka Macedoniamüin.
14 Waapüin analuʼut nümüin Maleiwa saaʼu nuʼunirüin wakuwaʼipa wanaa nümaa Cristo maʼaka naaʼin na surulaat aleʼejakana süchikijee akanajaa wanee atkawaa. Nükaalinjain waya süpüla shiʼraajüinjatüin wayuu maʼleekalia nüchiki, tia müsü aka saaʼin wanee kasa eekai jemetüin maʼin seejuu.
15 Wayakana aküjakana pütchi nüchiki Cristo, müshii waya maʼaka saaʼin wanee kasa eekai jemetüin eejuu nümüin Maleiwa. Antüsü seejuu tia nanainmüin na wayuu oʼtteʼennajanakana jee nanainmüin na wayuu ajaʼttinnajanakana.
16 Tia müsü aka seejuu wanee kasa kaluʼuka outaa namüin na wayuu ajaʼttinnajanakana jee müsü aka seejuu wanee kasa kaluʼuka kataa oʼuu namüin na wayuu oʼtteʼennajanakana. ¿Jaraiche keraaka süpüla aaʼinraa tia?
17 Waya keraaka süpüla aaʼinraa tia, jama nnojoliin wachuntuin nneerü saaʼu waküjain tü nünüikikat Maleiwa, watta naalii na wayuu makana aaʼinrala. Nüjünala waya Maleiwa süpüla waashajaainjanain tü pütchi shiimainkat nüchiki jee nüchiki Cristo.
Noota
^ Pünaʼla tia suluʼu tü kanüliakat «Jamaluʼulu pütchikat».
^ «Ojutalaasü tapüleerua wanee puettoʼu» maluʼulu tia suluʼu griego.
