Chiiruaajatka karaloʼuta namüinjatka na chajanakana Corinto 5:1-21
5 Watüjaa aaʼu sajaʼttinneerüin tü weʼirukukat, tü makalü aka saaʼin miichi. Naapeetpejeʼe wamüin Maleiwa wanee miichi chaa iipünaa eejeetka süpüla kaʼikat süpüshuaʼa, nnojotsü sukumalain wayuu tia.
2 Aʼyalajüshii waya saalinjee suluʼuin waya miichikat tüü, tia shia tü weʼirukukat. Kasataalejeseʼe saapünüin wamüin tü wepiainjatkat chaa iipünaa.
3 Meerü waʼatakai saaʼin wanain maʼaka waʼatüin wanain kuluulu. Nnojoleena masheʼinkuʼu müin waya waʼatapeena shia wanain.
4 Waya kepiakana suluʼu miichikat tüü, aʼyalajüshii maʼin waya suluʼu waaʼin jee shapaasü maʼin waaʼin, nnojotpejeʼe shiain shiiʼiree waakateein shia woulia maʼaka waakatüin washeʼin, shia süka keeʼireein waaʼin kepieein waya chaa iipünaa. Kateetkalaka woʼu süpüla kaʼikat süpüshuaʼa shiiʼirakaluʼu tü weʼirukukat.
5 Nia Maleiwa yapaka atuma waya süpüla müinjatüin wakuwaʼipa otta süka naapüin wamüin tü nüpülainkat, nüpansaajüin wamüin tü kasa naapüinjatkat wamüin.
6 Watüjaa aaʼu shiimainjeerüin saapünüin wamüin tia otta watüjaa aaʼu wattaluʼujeenain waya nuulia chi Señotkai sümaʼainruʼu müin kepiakai waya suluʼu tü weʼirukukat.
7 Watüjaa aaʼu tia sünainjee kanoulain waya, nnojotsü shiain sünainjee tü kasa shiʼrakat wayuu.
8 Shiimain saapüneerüin wamüin tia, nnojoliipejeʼe waya kepieein suluʼu tü weʼirukukat süpüla kepiainjanain waya nümaa chi Señotkai.
9 Jaʼitainna nümaain waya jee wattaluʼuin waya nuulia, shia wachekaka talatüinjachin nia wamaa.
10 Waaʼinrüle kasa anasü jee kasa mojusü suluʼuiwaʼaya waya tü weʼirukukat, ashaʼwaleʼenneena waya nümülatuʼu Cristo süpüla süsalainjanain waya nutuma tü kasa waainjakat.*
11 Kojutushi wamüin chi Señotkai müshiijeseʼe wemeʼejüin naaʼin na wayuukana süpüla naapaainjanain sümaa tü pütchi wekirajakalü anain naya. Nütüjaa aaʼu Maleiwa tü suluʼukat waaʼin, müsüjeseʼe shiain wacheküin jiyaawatüin saaʼu* jamüin maʼin wakuwaʼipa.
12 Nnojotsü choʼujaain waküjainjatüin jümüin wachikuaʼa lotuin sukuwaʼipa tü kasa waaʼinrakat, aluʼu wayainjanainjaʼa juʼwaataain aluʼu noʼupala na wayuu aʼwaataakana suluʼu nakuwaʼipa, na nnojoliikana aʼwaataain sünainjee tü suluʼukat naaʼin.
13 Waainjale wanee kasa maʼaka naainjain shia wanee wayuu eekai mamainnain, waainjain shia nüpüleerua Maleiwa jee waainjalejeʼeya tia sümaa pansaain wakuwaʼipa, anasüje maʼin jukuwaʼipa sünainjee.
14 Sutuma naapajiraain nikii Cristo waaʼu, waaʼinrajatü tü nuluwataakalü anain waya, anuu tü kasa watüjakat sünainjee tia makat: outushi waneeshia wayuu saaʼu wayuu süpüshuaʼa, jama müin outakai naaʼin napüshuaʼa.
15 Outushi nia napüleerua napüshuaʼa na wayuu katakana oʼu süpüla nnojoluinjatüin naaʼinrüin tü suchuntaakat neʼe naaʼin, shia naaʼinrajatka tü nuluwataakalü anain chi outakai napüleerua jee asoʼireʼennakai aaʼin süchikijee outaa.
16 Sutuma watüjaaitpain saaʼu tia, naataitpa tü jülüjakat waaʼin süchiki nukuwaʼipa wanee wayuu. Mapuʼule tü jülüjakat waaʼin nüchiki Cristo, nnojoleerü joo jülüjain waaʼin tia.
17 Chi wayuu paaʼinwakai nümaa Cristo, müshi jekechikai naaʼin akumajuushin nutuma Maleiwa. Alatüitpa tü kasa sümaiwajatkat, jeketüitpa tü kasa shiiʼirakakat.
18 Nukumala Maleiwa kasa süpüshuaʼa jee anajiraashii waya nümaa wachikuaʼa nünainjee Cristo otta niʼitaain wajapuluʼu wakaalinjainjanain na wayuukana süpüla anajiraainjanain naya nümaa nachikuaʼa.
19 Anajiraasü wayuu süpüshuaʼa nünainjee Cristo jee nülatirüin sooʼopünaa naaʼin saainjala wayuu. Niʼitaain wajapuluʼu wakaalinjainjanain na wayuukana süpüla anajiraainjanain naya nümaa nachikuaʼa.
20 Nünüikimaajana waya Maleiwa niiʼirakaluʼu Cristo, müshijaʼa nuchuntakai aaʼin Maleiwa sümüin wayuu wakajee. Sutuma niiʼirakaluʼuin waya Cristo, anuu tü wachuntakat maʼin jümüin: «Anajiraa jia jüchikuaʼa nümaa Maleiwa».
21 Maainjalasai Cristo, naapüinjeseʼe nia Maleiwa süpüla outajachin nia saaʼu waainjala, lotuitpakalaka wakuwaʼipa noʼuluʼu chi Maleiwakai nünainjee.
Noota
^ «Tü niinasekat Jesús süpüla kasalajanainjatüin saainjala wayuu nutuma» maluʼulu tia suluʼu griego.
^ «Jaaʼin» maluʼulu tia suluʼu griego.
