Chiiruaajatka karaloʼuta namüinjatka na chajanakana Corinto 7:1-16
7 Tawalayuu aishiikana tapüla, süka süpansaajünüitpain pütchikat tüü shia anaka aluʼu wasünneʼerüle tü kasa yarüttakalü atuma weʼiruku jee tü yarüttakalü atuma tü jülüjakat waaʼin,* wuleetkalaka wakuwaʼipa noʼuluʼu Maleiwa süka kojutuin maʼin nia wamüin.
2 Tawalayuwaa, anashii aire waya jüpüla, nnojotsü müliain wayuu watuma, nnojotsü waaʼinrüin wanee kasa amojujeʼereetka sukuwaʼipa wayuu jee nnojotsü wamaʼülapalain shia.
3 Nnojotpejeʼe taküjain tüü jümüin süpüla tayoujainjanain jia, jama taküjaitpain jümüin alin jia wapüla. Jaʼitainnakalaka outuin waya wanaa jümaa jee katülejeʼeya woʼu wanaa jümaa.
4 Nnojotsü kapüleein tamüin yootoo jümaa, aʼwaataashi taya suluʼu jukuwaʼipa, anasü taaʼin otta talatüshi taya mayaainjeʼe wainmain tü müliaa weʼrakat.
5 Nnojotsü anain waaʼin wantapa Macedoniamüin, watta maʼin saalii tü müliaa weʼrakat. Eʼrüshii waya wamüliala sutuma wayuu chayaa otta shapaasia waaʼin naaʼu na wawalayuukana.
6 Niasaʼa chi Maleiwa amülialakai naaʼin na mojukana aaʼin, nümülialüin waaʼin nükajee Tito.
7 Nnojotpejeʼe neʼe talatüin waaʼin süka weʼrüin nia, talatüsü waaʼin süka jümülialüin naaʼin. Nüküjain wamüin jiʼreein maʼin taya, mojuin maʼin jaaʼin jee shapaain maʼin jaaʼin taaʼu. Talataleeka maʼin taaʼin sutuma taapüin tia.
8 Mojulejeʼeya jaaʼin sutuma tü karaloʼuta tashajakat jümüin, nnojotsü mojuin taaʼin sutuma tia. Mojusü taaʼin paalajee süka mojuin jaaʼin tatuma, motsomüinpejeʼe neʼe mojuin jaaʼin.
9 Talatüsü taaʼin, nnojotpejeʼe shiain saaʼujee mojuin jaaʼin tatuma, talatüshi taya süka jiyaawajaain suulia jaainjala. Mojusü jaaʼin wanaapünaa sümaa tü mojushiikat nümüin Maleiwa, nnojoliikalaka jia eʼrüin müliaa wanainjee.
10 Oʼttaajeechi chi wayuu mojukai aaʼin wanaapünaa sümaa tü anashiikat nümüin Maleiwa otta nnojoleerü mojuin naaʼin saalinjee tia. Nieechipejeʼe outuin chi wayuu mojukai aaʼin maʼaka mojuin naaʼin na manoujainsaliikana.
11 Mojusü jaaʼin wanaapünaa sümaa tü anashiikat nümüin Maleiwa, müshiijeseʼe jaaʼinreein maʼin tü kasa eekai lotuin sukuwaʼipa. Sütüjaaitpa aaʼu wayuu lotuin jukuwaʼipa, nnojotsü talatüin jaaʼin sutuma tü kasa mojusü jaaʼinrakat, kojutushi Maleiwa jümüin, ayaawajaashii jia suulia jaainjala, aʼyataashii jia nümüin Maleiwa süka süpüshuaʼa jaaʼin otta juuʼulaa ouliat tü kasa mojusü jaaʼinrakat. Anasü sukuwaʼipa süpüshuaʼaleʼeya tü kasa jaaʼinrakat süpüla junoutajatüin sukuwaʼipa tia makat.
12 Nnojoipejeʼe taya ashajüin jümüin niyaaluʼu chi wayuu aaʼinrakai kasa mojusü jee niyaaluʼu chi aainjünakai amüin kasa mojusü. Ashajüshi taya jümüin süpüla jütüjaainjatüin saaʼu jee nütüjaainjachin Maleiwa saaʼu, jaaʼinrülejeʼeya tü waluwataakalü anain jia.
13 Amülialaasü waaʼin sutuma tia.
Nnojotpejeʼe shiain neʼe talatüin atuma waaʼin tia, talataleesia maʼin waaʼin süka talatüin naaʼin Tito, jama jütütüleʼerüin naaʼin.
14 Aʼwaataashi taya jaaʼu nuʼupala Tito, nnojoipejeʼe taya eʼrüin japülii jutuma. Maʼaka shiimain süpüshuaʼa tü kasa waküjakat jümüin, shiimainña tü kasa waʼwaataakalü aaʼu nuʼupala Tito.
15 Akooʼomüinraʼaleesia jaalin nüpüla Tito sotopa naaʼin joonooin sümaa tü aluwataanakalü anain jia otta kojutuin maʼin nia jümüin.
16 Talatüshi maʼin taya süka tatüjaain saaʼu jaaʼinreerüin süpüshuaʼa tü tamakat jümüin.
Noota
^ Jee shiale «tü jülüjakat waaʼin waneepia». Pünaʼla tü pütchikat «Espíritu» suluʼu tü kanüliakat «Jamaluʼulu pütchikat».
