Chiiruaajatka karaloʼuta namüinjatka na chajanakana Corinto 8:1-24
8 Tawalayuwaa, waküjeein jümüin kamaneein maʼin Maleiwa namüin na wawalayuu chakana Macedonia.
2 Soʼunnaa müliain maʼin naya, talatüsü maʼin naaʼin sünain asülajaa mayaainjeʼe maʼletsein naya, sütüjaanaka aaʼu wayuuin kamaneeshii maʼin naya.
3 Tatüjaa aaʼu naapüin tü kasa eejatkat namaʼana, alanaʼaleesia tü naapakat suulia tü eejatkat namaʼana.
4 Nachuntuin maʼin wamüin wooʼulaainjanain nasülajüin namüin na anoujashiikana jee nakaalinjain naya.
5 Aʼyataashii naya nümüin chi Señotkai süka süpüshuaʼa naaʼin jee nakaalinjain waya wanaapünaa sümaa tü nüchekakat chi Maleiwakai.
6 Waluwataainjeseʼe Tito süpüla niain akotchojüin tü choʼujaakat sünainjee tü jüsülajüinjatkat, jama niain akotchojüin paala tü jüsülajüinkat.
7 Anasü maʼin süpüshuaʼa tü kasa jaaʼinrakat, kanoulashii maʼin jia, atüjashii maʼin jia aashajawaa, wainma kasa jütüjaka apüleerua otta jaaʼinmaasü maʼin tü jiʼyataainkat. Aishii maʼin jüpüla na waneinnua maʼaka alin jia wapüla, shia anaka aluʼu ayatüle jüsülajüin.
8 Tü tamakat jümüin nnojotsü süpülajatüin toʼotuin jaaʼu wanee kasa, süpülajatü jütüjaain saaʼu tü naaʼinrakat na waneinnua sünain akaalinjaa wayuu otta süpülajatü sütüjaanüin aaʼu shiimainre alin wayuu jüpüla.
9 Jütüjaa aaʼu kamaneein maʼin jümüin chi Waseñotsekai Jesucristo. Mayaainjeʼe washitpuʼuin nia, maʼletsesai nia jiyaaluʼu, naaʼinrüin tia süpüla washirüinjanain jia sünainjee maʼletsein nia.
10 Anuu jooluʼu tanüiki jümüin süchiki tia: aneerü jukuwaʼipa jikeraajüle tü jiʼyataainkat napüleerua na juwalayuukana, jama sülatüitpain wanee juya süchikijee tia. Jaʼyatüjülia neʼe jaaʼu jaaʼinreein tia napüleerua na wawalayuukana.
11 Jikeraaja tia aʼyatawaakat wanaapünaa sümaa tü juuntakat jüsülajüin, jama shiain jaainjeein amüin paala tia.
12 Nüsülajüle wanee wayuu wanee kasa süka süpüshuaʼa naaʼin, talatüsü naaʼin Maleiwa nümaa, jama shiain nücheküin Maleiwa nüsülajüinjachin wanee wayuu tü kasa eekat nümaʼana, nnojotsü nüsülajüinjatüin wanee kasa nnojotka eein nümaʼana.
13 Nnojotpejeʼe taküjain jümüin tia shiiʼiree toʼoteein jaaʼu wanee kasa kapüleejeetka jümüin sümaa mapüleetaalain shia tatuma napüleerua na waneinnua.
14 Wainma tü kasa eekat jümaʼana maaʼulu yaa, kettaajeerü tia sümaa tü kasa choʼujaakat namüin na juwalayuukana. Akaataajaʼa neʼe choʼujaale jümüin wanee kasa, nakaalinjeenaʼaya jia. Müle sukuwaʼipa jutuma tia, wanaaweerü jukuwaʼipa.
15 Anuu sünüiki tü Karaloʼuta Nüchikimaajatkat Maleiwa: «Chi wayuu wainmakai akotchojüin, nnojotsü wainmaleeinña nükotchojüin otta chi palitkai akotchojüin, nnojotsü paliʼirüleeinña nükotchojüin».
16 Waapüin analuʼulu nümüin chi Maleiwakai saaʼujee niʼitaain suluʼu naaʼin Tito kapülainjanain jia naaʼin maʼaka kapülain jia waaʼin.
17 Nnojoishi oʼuneein neʼe sutuma wamajalain shia nümüin, oʼuneeshiaʼaya nia jümaʼanamüin süpüla nuwaraijaainjachin jaaʼu.
18 Wajüteechi nümaa Tito chi wawala eʼnnaajünakai maʼin natuma na wawalayuukana, eʼnnaajünüshi nia sünainjee tü kasa naaʼinrakat süpüla süküjünüin tü pütchi anakat maʼin.*
19 Aneekünüshi nia natuma na anoujashiikana* süpüla nukumajüin sukuwaʼipa wamaa tü jüsülajakat, nuʼwaajüneechika chi Señotkai sünainjee tia jee sütüjaaneetka aaʼu wakaalinjain wayuu.
20 Sükajee tia, nnojoleena waya shiyoujuin wayuu sünainjee tü waaʼinrakat süka tü asülajuushikat.
21 Shia ‹waaʼinmaaka maʼin lotuinjatüin sukuwaʼipa süpüshuaʼa tü kasa waainjakat nuʼupala Jehová* jee suʼupala wayuu›.
22 Wajütüinña namaa wanee wawala watüjaakai aaʼu jüüjüüin maʼin jee tütükai maʼin sünain süpüshuaʼa tü kasa naainjakat. Tütüleejeechipejeʼe nia süka nütüjaain saaʼu jaaʼinreerüin tü kasa lotokalü akuwaʼipa.
23 Eere wanee wayuu nnojoikai eʼraajüin Tito, anakajaʼa nütüjaale saaʼu teʼipajanain nia sünain tü aʼyatawaakat jee akaalinjashi nia süpüla anainjatüin jukuwaʼipa. Eerejeʼe wanee wayuu nnojoikai eʼraajüin na wawalayuukana, anakajaʼa nütüjaale saaʼu naneekuushin naʼakajee na anoujashiikana süpüla aluwataaushinjanain naya jee kojutushi Cristo nanainjee.
24 Jaʼyainjatü jaaʼu alin naya jüpüla, natüjaajeetkalaka saaʼu na wawalayuukana jamüin waʼwaataaka jaaʼu.
Noota
^ Pünaʼla tia suluʼu tü kanüliakat «Jamaluʼulu pütchikat».
^ «Aneekünüshi nia natuma na laülaakana napüleerua na anoujashiikana» maluʼulu tia.
^ Pünaʼla tia suluʼu tü kanüliakat «Sooʼomüin pütchi A5».
