Chiiruaajatka karaloʼuta namüinjatka na chajanakana Corinto 9:1-15
9 Nnojotsü choʼujaain tashajüin jümüin jükaalinjainjanain* na anoujashiikana,
2 jama tatüjaain saaʼu jaaʼinreerüinña tia. Aʼwaataashi taya noʼupala na chejeʼewaliikana Macedonia saaʼu tü jaaʼinrakat sümaa taküjain namüin kakaliainnain yapain na chakana Acaya süpüla akaalinjaa. Eeshiʼiya na ashateekana sukuwaʼipa tü kasa jaaʼinrakat.
3 Taluwataain jümüin na wawalayuukana süpüla yapainjanain maʼin jia maʼaka taküjain shia namüin, waaʼinrüin tia suulia amülain neʼe waʼwaataain jaaʼu.
4 Jamüshijaʼa tantataarale jümaʼanamüin namaa na chejeʼewaliikana Macedonia jee nnojoliitaale yapain jia, eʼrüshiije waya japülii wanaa jümaa.
5 Anasü saaʼin tamüin tajütamaatüle na wawalayuukana süpüla chamaatüin naya jümaʼanamüin jee yapeetkalaka natuma tü kasa jüsülajüinjatkat. Müle sukuwaʼipa tia atumawaa, wainmeerü maʼin tü jüsülajüinkat jee nnojoleerü jaapüin shia mojusheeka.
6 Anuu tü taküjeekalü achiki jümüin: chi palitkai apünajüin, paliʼireerü nükotchojüin jee chi wainmakai apünajüin wainmeerü nükotchojüin.
7 Anashi nüsülajüle wanee wayuu wanaapünaa sümaa tü suluʼukat naaʼin, nnojotsü naainjainjatüin tia mojusheeka jee süka münajalain shia nümüin, jama alin nüpüla Maleiwa chi wayuu talatakai aaʼin sünain asülajaa.
8 Nuuntuin Maleiwa kamaneein maʼin nia jümüin süpüla nnojoluinjatüin choʼujaain jümüin wanee kasa jee süpüla eeinjatüin wainma kasa jümaʼana jükaalinjainjatka aka wayuu.
9 (Shiaʼaya ashajünaka achiki tia suluʼu tü Karaloʼuta Nüchikimaajatkat Maleiwa eere sümüin: «Wainma tü kasa nüsülajakat sümüin wayuu, nüsülaja amüinchiʼiya na wayuu maʼletsekana. Loteerü nukuwaʼipa süpüla kaʼikat süpüshuaʼa».
10 Chi aapakai wainma waüyee nümüin chi apünajüikai jee chi asülajakai pan nümüin wanee wayuu, nüsülajeeriaʼaya wainma waüyee jümüin jee wainmaleejeeria maʼin shia süpüla jüpünajüinjatüin, wainmeetkalaka maʼin tü kasa eekat sutuma lotuin jukuwaʼipa).
11 Wainma maʼin tü kasa nüsülajakat Maleiwa jümüin süpüla wainmainjatüin maʼin tü jüsülajakat sümüin wayuu, saapeetkalaka analuʼulu wayuu nümüin Maleiwa saaʼujee tü kasa nüsülajakat namüin wakajee.
12 Tia waaʼinrakat süpüleerua wayuu, nnojotsü neʼe süpülajatüin wakaalinjain na aneekuushikana nutuma Maleiwa sünain wanee kasa eekai choʼujaain namüin. Waaʼinrüinña tia süpüla wattain naalii na wayuu aapakana analuʼulu nümüin Maleiwa saaʼu nakaalinjünüin.
13 Naʼwaajeechikalaka Maleiwa saaʼujee jükaalinjain wayuu, jaʼyasü jaaʼu jüüjüüin jia sümüin tü pütchi anakat maʼin nüchiki Cristo, tü jüküjakat suʼupala wayuu. Jee jaʼyeerü jaaʼu jüsülajüliin namüin jee sümüin wayuu maʼleekalia.
14 Nachuntapa nümüin Maleiwa jüpüleerua, naküjeerü alin jia napüla saaʼujee kamaneein maʼin chi Maleiwakai jümüin.
15 Waapüin analuʼutkat nümüin Maleiwa saaʼu anain maʼin tü kasa nüsülajakat wamüin.
Noota
^ Jee shiale «jiʼyataainjanain napüleerua».
