Chiiruaajatka karaloʼuta nüshajalaka Pedro 2:1-22
2 Eepuʼushii naʼaka na israelitakana waneinnua wayuu nünüikimaajanayaakana Maleiwa, akaweenaʼaya neʼe jaʼaka, eejeena na ekirajayaakana jia. Nekirajeena neʼe jia sünain alawaa süpüla namalajeʼerüin tü junoulakat otta nayouteechi achiki chi nalaamain ayaʼlajakai naya, asakajapejeʼe neʼe naya wayuukana outaa nooʼomüin, ajaʼttinnamaateena.
2 Eejeenaʼaya waneinnua wayuu ashatakana nakuwaʼipa naya wayuukana, maapülinjeena naya sünain aaʼinraa kasa mojusü, nnojoleetka anain sünüiki wayuu sünainjee tia süchiki tü pütchi shiimain ekirajünakalü anain.
3 Sutuma suchuntaain naaʼin naya wayuukana naata kakorotshi, nemeejeena jia sükajee naküjain alawaa jümüin. Anteetpejeʼe tü kaʼi aneekünatüjütkalia paala süpüla kasalajanainjatüin naainjala naya wayuukana namüin, nnojoleerü kamaʼakuʼu müin shia, ajaʼttinneena naya.
4 Nnojotsü nülatirüin sooʼopünaa naaʼin Maleiwa tü kasa mojusü naaʼinrakat na aapiee kaainjalakana, nujutakalaka naya suluʼumüin tü kanüliakat «Tártaro»,* müshii kaleenaluʼukai naaʼin nutuma saʼaka piʼyuushi kojokot maʼin süpülaleʼeya tü kaʼi kasalajaneetkalü oʼu naainjala namüin.
5 Nnojotsiaʼaya nülatirüin Maleiwa sooʼopünaa naaʼin tü kasa mojusü saaʼinrakat wayuu sümaiwa paala. Oʼtteʼennapejeʼe Noé nutuma, chi wayuu aküjakai süchiki kasa eekai lotuin sukuwaʼipa, nuʼtteʼerüin nia namaa akaratshishii wayuu wanaa sümaa nüʼitirüin Maleiwa wanee juya miyoʼu maʼin naaʼu na wayuu mojutukana amüin nia.
6 Kasalajanapa nutuma Maleiwa naainjala na wayuu chajanakana Sodoma sümaa Gomorra, ajaʼttaleesia tia mmakat nutuma. Naaʼinrüin tia süpüla nayaawatajatüin saaʼu na wayuu mojutukana amüin nia tü kasa alatajatkat namüin.
7 Oʼtteʼennüshiaʼaya Lot nutuma Maleiwa, wayuu loto akuwaʼipachi nia otta shapaasiaʼaya naaʼin sutuma niʼrüin maapülin sünain aaʼinraa kasa mojusü na wayuu mojulaashiikana.
8 Wayuu loto akuwaʼipachi Lot, shapaasüjeseʼe naaʼin sutuma niʼrüin jee sutuma naapüin süchiki tü kasa mojusü naaʼinrakat na wayuu kepiakana aʼaka nia.
9 Nuʼtteʼerüin Jehová* na wayuu anoujakana nünain suulia tü kasa mojusü ooʼulakünakalü akajee naaʼin, najaʼttireenapejeʼe na wayuu nnojoliikana lotuin akuwaʼipa soʼu tü kaʼi kasalajaneetkalü oʼu saainjala wayuu sümüin.
10 Nayeenapejeʼe ajaʼttinnaleeinña na wayuu aʼyarülajakana nakuwaʼipa na waneinnua jee na mojutukana amüin na laülaakana naaʼu.
Süka neʼrüliin wayumüin naya wayuukana jee ichein naya süchiirua tü namakat, nnojotsü mmoluwaain naaʼin sünain airuʼuluin nanüiki nachiki na wayuu kojutukana nümüin Maleiwa.
11 Mayaainjeʼe katchin jee pülain maʼin na aapiee nümaʼanajeejanakana Maleiwa, nnojotsü airuʼuluin nanüiki namüin na wayuu ekirajakana sünain alawaa, jama kojutuin Jehová* namüin.
12 Airuʼutpejeʼe neʼe nanüiki naya wayuukana süchiki wanee kasa nnojotka natüjaain aaʼu. Ajaʼttinneena naya sünainjee tü kasa mojusü naainjakat, müshii naya maʼaka saaʼin wüchii mayaawatüinka saaʼu sukuwaʼipa, joʼuusü süpüla ataʼünnaa jee oʼutunaa aaʼin
13 otta kasalajaneeriaʼaya namüin tü kasa mojusü naaʼinrakat. Talatüsü naaʼin sünain aaʼinraa tü suchuntaakat neʼiruku, naaʼinrüin tia kaleʼu. Müshii naya maʼaka saaʼin yarütshii icheka maʼin sünain kuluulu, müshii naya maʼaka saaʼin wanee kasa eʼikaajaka atuma nuʼupünaa wanee wayuu.
Talatüsü maʼin naaʼin sünain emeejaa wayuu sükajee tü alawaa nekirajakalü anain sümaʼainruʼu nekaain jümaa.
14 Suchuntaain maʼin naaʼin* kawalaʼatainjatüin naʼwayuuse* natuma, icheshii maʼin naya süchiirua tü kasa mojusü naaʼinrakat otta naya nemeejaka na matchinkana anoula, suchuntaain maʼin naaʼin naata kakorotshi,* kasalajaneetpejeʼe nutuma Maleiwa tü kasa mojusü naaʼinrakat naya wayuukana.
15 Akayalaashii naya suulia aaʼinraa tü kasa eekai lotuin sukuwaʼipa, nia neʼe nashataka akuwaʼipa Balaam chi nüchonkai Beor, aaʼinrüshi nia kasa mojusü shiiʼiree walaainjachin nia saaʼu tia.
16 Achiaanapejeʼe nia sutuma nnojoluin anain tü naaʼinrakat. Saaʼujee maaʼin naaʼin chi nünüikimaajachikai Maleiwa, ataʼüna akuwaʼipachi nia sutuma wanee püliikü, kanüisü nümüin maʼaka kanüikin wanee wayuu.
17 Müshii naya maʼaka saaʼin shikii wüin eekai josoin jee müshii naya maʼaka saaʼin wanee mannuuya eekai yalejewaain sümüin sutuma wawai eekai miyoʼu maʼin. Keraaitpa napüla kojoinjatüin maʼin piʼyuushi naaʼu.
18 Naküjain wanee pütchi nnojotka kasain anain apüla jee yaletüsü naaʼin sünain aaʼinraa tia. Nemeʼejüin naaʼin na wayuu isajakana noulia na aaʼinrakana kasa mojusü, nemeʼejüin naaʼin na wayuukana sükajee tü kasa suchuntaakat neʼiruku jee sükajee maapülin naya sünain aaʼinraa kasa mojusü.
19 Mayaainjeʼe naküjain sümüin wayuu taasheerüin sukuwaʼipa, süchepchiashii neʼe kasa mojusü na ekirajüliikana alawaa. Jamüshijaʼa chi wayuu akanajuukai nutuma chi niʼipolokai, nüchepchiashi nia.
20 Isajüle paala wanee wayuu suulia shiʼyarülajaain nukuwaʼipa natuma na manoujainsaliikana süka nütüjaain saaʼu tü pütchi shiimainkat nüchiki Jesucristo, chi Señotkai jee chi Oʼtteʼerakai wayuu jee naaʼinrataale chia wayuukai tü kasa mojusü naaʼinrapuʼukat paala sümaa sajapuluʼujain nukuwaʼipa, mojuleejeeria maʼin nukuwaʼipa chia wayuukai suulia tü nukuwaʼipapuʼukat paala nnojoluiwaʼaya nütüjaain saaʼu tü pütchi shiimainkat.
21 Shiaje anaka aluʼu nnojorüle nütüjaain saaʼu tü kasa lotokalü akuwaʼipa, suulialeʼeya nütüjaain saaʼu sümaa nükayalaain suulia tü nuluwataakalü anain Maleiwa, tü naapaakalü amaa paala.
22 Shia alataka namüin tü pütchi shiimain makat mayaa: «Chi erü eetakai paala, aleʼejaashi nüchikuaʼa sünain ekaa tü neenüinkat otta müsia tü püülükü oʼoojiruushikat, aleʼejaasü sünain apalasirawaa saʼaka pootshi».
Noota
^ Pünaʼla tia suluʼu tü kanüliakat «Jamaluʼulu pütchikat».
^ Pünaʼla tia suluʼu tü kanüliakat «Sooʼomüin pütchi A5».
^ Pünaʼla tia suluʼu tü kanüliakat «Sooʼomüin pütchi A5».
^ «Piratüsü noʼu sutuma kawalaʼatain naʼwayuuse natuma» maluʼulu tia suluʼu griego.
^ Pünaʼla tia suluʼu tü kanüliakat «Jamaluʼulu pütchikat».
^ Jee shiale «nekirajüin naaʼin süpüla suchuntaain naaʼin naata kakorotshi».
