Chiiruaajatka karaloʼuta nümüinjatka Timoteo 2:1-26
-
Püküja shia namüin na wayuu eʼraajünakana sünain aaʼinraa waneepia tü kasa aluwataanakalü anain naya (1-7)
-
Eʼrüinjana waya müliaa saalin waküjain tü pütchi anakat maʼin (8-13)
-
«Atüjakai maʼin süpüleerua nünüiki Maleiwa» (14-19)
-
«Nnojo puʼunuin süchiirua tü kasa suchuntaakat naaʼin wanee jimaʼai jee tü suchuntaakat saaʼin wanee majayüt» (20-22)
-
Tü nukuwaʼipainjatkat wanee wayuu niʼipajee wanee eekai niʼrüin wayumüin nümüin (23-26)
2 Tachonchee, ayataʼaya puchuntuin nümüin Maleiwa nükatchinrajatüin paaʼin sükajee kamaneein pümüin Cristo Jesús.
2 Tü kasa taküjakat pümüin suʼupala wainma wayuu, anasü püküjale shia namüin na wayuu eʼraajünakana sünain aaʼinraa waneepia tü kasa aluwataanakalü anain naya, natüjeenakalaka ekirajaa wayuu.
3 Saaʼujee nusurulaatsein pia Cristo Jesús, shia anaka aluʼu pücheküle süchiki müliainjachin pia.
4 Nnojotsü naaʼinrüin wanee surulaat tü kasa saaʼinrawaikat wayuu, jama shiain nücheküin anainjatüin nukuwaʼipa noʼuluʼu chi wayuu surulaatkai atuma nia.
5 Jamüsüjaʼa sünain wanee ayoujirawaa, nnojotsü eʼitaanüin kotse sünain nikii wanee wayuu, aluʼujasaʼa naaʼinrüle süpüshuaʼa tü achuntunakat nümüin sünain wanee ayoujirawaa.
6 Chi wayuu aʼyataakai maʼin sünain apünajaa, niainjachi ekaka palajana süchon tü nüʼttiakat.
7 Jülüja paaʼin waneepia tü tamakat pümüin, piyaawateerü aaʼu kasa süpüshuaʼa nutuma chi Señotkai.
8 Soto paaʼin nüsoʼireʼennüin aaʼin Jesucristo süchikijee outaa, nülüin nia David, maʼaka süküjünüin suluʼu tü pütchi anakat maʼin, tü teʼikajakat sümüin wayuu.
9 Müliashi maʼin taya atumawaa sünainjee teʼikajüin tia pütchikat jee püreesashi taya atumawaa maʼaka püreesain atumawaa wanee wayuu eekai kaainjaralin. Nnojotpejeʼe kasain ataʼülüin sukuwaʼipa nünüiki chi Maleiwakai.
10 Ayatüsia tachecherüin taaʼin soʼunnaa tü müliaa teʼrakat naaʼujee na aneekuushikana shiiʼiree noʼttaainjanain nükajee Cristo Jesús jee shiiʼiree kojutuinjanain naya atumawaa süpüla kaʼikat süpüshuaʼa.
11 Anuu wanee pütchi anoujunuinjatka anain: outulejeʼeya waya wanaa nümaa, kateeriaʼaya woʼu wanaa nümaa.
12 Ayatüleʼeya wachecherüin waaʼin aluwataajeenaʼaya waya wanaa nümaa, waküjale nnojolin weʼraajüin nia nüküjeeriaʼaya nnojoliin niʼraajüin waya.
13 Mayaainjeʼe nnojoluin watüjaain saaʼu tü nümakat, ayatüsia naaʼinrüin tü kasa nüküjakalü achiki, jama nnojoluin süpüla naaʼinrüin wanee kasa naata suulia tü nümakat.
14 Ayataʼaya püsoʼirüin naaʼin sünain tü kasa taküjaitpakat pümüin jee pikiraja naya sünain nuʼupala Maleiwa süpüla nnojoliinjanain natkaain saaʼujee pütchi neʼe, wanee kasa nnojotka kasain anain apüla, jama sumojujaain neʼe nakuwaʼipa na wayuu aapajakana shia.
15 Püchajaa maʼin sukuwaʼipa süpüla talatajachin Maleiwa pümaa otta müinjatü pukuwaʼipa maʼaka naaʼin wanee aʼyataai nnojoikai aaʼinrüin wanee kasa shiyoujainjachika anainjee nia wayuu, atüjakai maʼin süpüleerua nünüiki Maleiwa.*
16 Nnojo poonooin sümaa nanüiki na wayuu peʼipaakana nümaa Maleiwa, jama naaʼinraleejeerüin tü kasa mojukat noʼuluʼu Maleiwa.
17 Aʼwalakalaajeerü tü nanüikikat maʼaka suʼwalakalaain tü ayuulii ittakalü atuma süta wayuu. Müsia neʼe tü pütchi nuʼwalakajakat Himeneo otta müshia Fileto.
18 Wayuukana naainnua nnojotsü naküjain tü pütchi shiimain nümaʼanajeejatkat Maleiwa, naküjain süsoʼiraaitpain naaʼin na outushiikana otta eeshii na namalajeʼerakana anoula.
19 Mayaainjeʼe müin tia, ayatüsia tü pütchi nüikaleʼerakalü ekii Maleiwa jee anuu tü pütchi ashajuushi ayaawatünakalü akajee shiimain tia: «Niʼraajüin Jehová* na wayuu aʼyataakana nümüin» jee anuu wane pütchi: «Anashi nuuʼulaale suulia aaʼinraa kasa mojusü chi wayuu achuntakai nünülia Jehová».*
20 Jamüsüjaʼa suluʼu wanee miichi miyoʼu, nnojotsü shiain neʼe eein iita akumajuushika süka ooro jee süka pülaata, eesia iita eekai sukumajuushin süka wunuʼu otta eekai sütüküüshin süka pootshi. Eesü iita eekai anain maʼin otta eesü eekai sumojulain iita.
21 Chi wayuu akayalaakai suulia tü makalü aka saaʼin sumojula iita, meechi nia maʼaka saaʼin tü iita eekai anain maʼin, wuleerü nukuwaʼipa, jalouijeechi nia nümüin chi nülaamainkai otta yapeechi nia süpüla aaʼinraa kasa eekai anain.
22 Nnojo puʼunuin süchiirua tü kasa suchuntaakat naaʼin wanee jimaʼai jee tü suchuntaakat saaʼin wanee majayüt, shia anaka aluʼu puʼunule süchiirua paaʼinrüin kasa eekai lotuin, kanoulainjachi pia, alinjatü wayuu püpüla, jimatajatü paaʼin, anajiraainjachi pia namaa na wayuu achuntakana nünülia chi Señotkai sümaa wulein naaʼin.
23 Nnojo püʼülüjiraain süchiirua kasa eekai eein, jama nnojoluin kasain anain apüla tia, atkaasü neʼe wayuu sünainjee.
24 Chi wayuu nüchepchiakai chi Señotkai nnojoishi atkaainjachin saaʼujee wanee kasa, kamaneeinjachi sümüin wayuu süpüshuaʼa, atüjainjachi nia ekirajaa wayuu otta nüchecherüinjatü naaʼin wanaa sümaa müliain nia atumawaa.
25 Kamaneeinjachi nia namüin na wayuu ayoutakana süchiki tü kasa nikirajakalü anain. Eeshiijaʼa nayaawajaajeenale naya wayuukana nutuma Maleiwa suulia naainjala, nayaawateetka maʼin saaʼu tü pütchi shiimainkat,
26 naʼlaülereetka naaʼin süpüla isainjanain naya suulia tü kasa nimeejakalü aka naya chi Yolujaakai, jama müin nataʼünnakai aaʼin nutuma süpüla naaʼinrajatüin tü kasa keeʼireekat naaʼin chi Yolujaakai.
Noota
^ «Sünüiki tü shiimainkat» maluʼulu tia suluʼu griego.
^ Pünaʼla tia suluʼu tü kanüliakat «Sooʼomüin pütchi A5».
^ Pünaʼla tia suluʼu tü kanüliakat «Sooʼomüin pütchi A5».
