Chiiruaajatka karaloʼuta nümüinjatka Timoteo 4:1-22
4 Anuu tü taluwataakalü anain pia nuʼupala chi Maleiwakai jee nuʼupala Cristo Jesús, chi kasalajaneechikai atuma naainjala na wayuu katakana oʼu jee na outuinnapakana. Naaʼinreerü tia niiʼiyalaapeena jee nuluwataapeena:
2 piʼikaja pütchi nüchiki Maleiwa, paainjamaata tia anale mmapaʼakat jee sülatüle kasa eekai mojuin, püchiaa, paapira wayuu jee pükatchinra saaʼin. Paaʼinrajatü tia sümaa nnojolin paashichijaamaatüin jee anainjatü shikirajia putuma.
3 Eejeerü kaʼi eere nayoutajaajeenain na wayuukana sümaa tü pütchi anasü ekirajünakalü anain, shieerü neʼe naaʼinraka tü kasa suchuntaakat naaʼin jee nayeena naapaaka amaa anüiki na wayuu ekirajakana naya sünain tü pütchi kamalainkat neʼe namüin.*
4 Nayoutajaajeerü amaa tü pütchi shiimainkat jee kacheʼejeena neʼe sümüin alawaa.
5 Eekajasaʼa piakai laülaainjatü paaʼin sünain kasa süpüshuaʼa, püchechera paaʼin soʼunnaa müliaa, ayataʼaya püküjain tü pütchi anakat maʼin* jee ana putuma süpüshuaʼa tü piʼyataainkat nümüin Maleiwa.
6 Müshi taya maʼaka saaʼin tü asüüshi oʼyotunakat süpüla saapünüin nümüin Maleiwa jee alüʼütsü maʼin tü kaʼi taashinjachikalü oʼu taya.
7 Müshi tatkaakai aaʼin süchiirua tü kasa tanoujakalü anain nüchiki Maleiwa, tekeraajüitpa tü aʼyatawaa eʼitaanakat tapüleerua jee ayatüshi taya sünain anoujaa.
8 Nükatalüitpa wanee kotse tapüla chi Señotkai, chi kasalajaneechikai atuma saainjala wayuu, tia kotsekat napülajatü na wayuu lotokana akuwaʼipa, naapeerü tamüin tia saaʼu tü taʼyataainkat, nnojoipejeʼe neʼe tayeechin naapüin amüin tia tamüiwaʼa, naapeeriaʼaya shia namüin na wayuu aʼatapajakana niiʼiyalaainjachin.
9 Anashi püntamaatüle sünain anaʼlawaa tamüin.
10 Nüpünaain taya Demas tamüiwaʼa, jama shiain kachiiruain maʼin naaʼin tü kasa eekat maaʼulu,* oʼunushi nia chaa Tesalónicamüin. Crescente oʼunushi chaa Galaciamüin jee müshia Tito oʼunushi Dalmaciamüin.
11 Niaʼala neʼe Lucas yaaka tamaa. Pümaajeechi Marcos, jama jaloulin nia tamüin sünain tü aʼyatawaakat nümüin Maleiwa.
12 Nia tajütaka Tíquico chaa Éfesomüin.
13 Püntapeena yaamüin, püsaapünaai maa tamüin tü tasheʼin chakat Troas, tü chakat nipialuʼu Carpo jee müsia tü rooyokot, shiapejeʼe püntirüinjatüin maʼin tamüin tü rooyo aainjuushikat süka süta mürüt.
14 Müliashi maʼin taya nutuma Alejandro, chi akumajakai wanee kasa süka cobre, niʼreetpejeʼe noʼukajatü nutuma Jehová.*
15 Eeja paaʼin nuulia, jama niyoutuin maʼin süchiki tü pütchi waküjakat.
16 Soʼu tü palajatkat takua tasoutuin neʼipajee na sülaülakana mma nnojoishi jaralin eejachin tamaa, kasataalejeseʼe nülatirüin Maleiwa sooʼopünaa naaʼin tü kasa naainjakat.
17 Aluʼu niainjaʼa eejachin tamaa chi Señotkai jee nükatchinrüin taaʼin süpüla süküjünüin pütchi sümüin wayuu sainküin mma jee akaalinjünüshi taya nutuma chi Señotkai suulia shiküin taya león.
18 Nükaalinjeechi taya chi Señotkai süpüla talatüin süchikumüin kasa eekai mojuin jee nuʼtteʼereechi taya süpüla nümaainjachin taya chaa eere nuluwataain. Kasataalejeseʼe nuʼwaajünüin süpüla kaʼikat süpüshuaʼa. Amén.*
19 Püsaka tamüin Prisca otta müshia Áquila jee püsaka tamüin na nipialujunakana Onesíforo.
20 Makatüshi Erasto chaa Corinto otta müshia Trófimo ichaa tapütüin Mileto, jama ayuulin nia.
21 Anashi püntamaatüle süpülapünaa jouluin juya.
Nüsaküin pia Eubulo jee müshia Pudente, Lino, Claudia jee müshiʼiya napüshuaʼa na wawalayuukana.
22 Kasataalejeseʼe kamaneein jümüin chi Señotkai saaʼu wayuuin kamaneeshii jia.
Noota
^ Jee shiale «naapajeekat neʼe amüin».
^ Pünaʼla tia suluʼu tü kanüliakat «Jamaluʼulu pütchikat».
^ Pünaʼla tü pütchikat «Tü kasa alatakat sainküin mma» suluʼu tü kanüliakat «Jamaluʼulu pütchikat».
^ Pünaʼla tia suluʼu tü kanüliakat «Sooʼomüin pütchi A5».
^ Pünaʼla tia suluʼu tü kanüliakat «Jamaluʼulu pütchikat».
