Karaloʼuta nümüinjatka Filemón 1:1-25
1 Karaloʼutakat tüü, tashajala tayakai Pablo. Püreesashi taya saaʼujee tanoujain nünain Cristo Jesús. Anii tamaa chi wawalakai Timoteo. Karaloʼutakat tüü pümüinjatü piakai Filemón, chi wawala aishikai wapüla
2 jee sümüinjatü shia tü wawalakat Apfia, müshia chi wawalakai Arquipo, chi aʼyataajiraakai wamaa maʼaka niʼyataajiraain wanee surulaat nümaa waneʼeya otta namüinjatü shia na anoujashii chakana outkajaain pipialuʼu.
3 Kasataalejeseʼe kamaneein jümüin chi Washikai Maleiwa jee jimatüin jaaʼin nutuma jee nutuma chi Señotkai Jesucristo.
4 Taapawalin analuʼutkat paaʼu toʼuraajapa nümüin chi Tamaleiwasekai.
5 Taapa achikit anain tü punoulakat sümaa alin püpüla chi Señotkai Jesús namaʼaleeya na anoujashii aneekuushikana nutuma Maleiwa.
6 Achuntushi taya nümüin Maleiwa püpüleerua maʼaka tachuntuin napüleerua na anoujashiikana wanaa pümaa, piyaawateetka saaʼu süpüshuaʼa tü kasa anasü aapünakat wamüin nükajee Cristo.
7 Tawalachee, atalatalaasü taaʼin otta akatchinraasü taaʼin sutuma taapüin süchiki alin püpüla na anoujashiikana. Süka paaʼinrüin tia, akatchinraasia naaʼin na anoujashii aneekuushikana nutuma Maleiwa.
8 Saaʼujee alin püpüla puwalayuu tachunteein pümüin wanee kasa, eesiaajeʼe süpüla taküjain pümüin tü paaʼinrajatkat jama taneekuushin nutuma Cristo,
9 nnojotpejeʼe taainjeerüin tia süka tatüjaain saaʼu aipüralin pia wayuu. Wayuu laülaaichi taya otta püreesashi taya saaʼujee tanoujain nünain Cristo Jesús.
10 Kamanee pia nümüin chi tachonkai Onésimo nüntapa chamüin, jama nüntawalin sünain akaalinjaa taya yaa eere püreesain taya, müshi nia maʼaka naaʼin wanee tachon tamüin.
11 Nnojoipuʼushi nia jaloulin pümüin, eekajasaʼa jooluʼu jaloulichipa nia wamüin.
12 Aishi nia tapüla, aniipejeʼe nia tajütüin nüchikuaʼa pümaʼanamüin.
13 Kasataalejeseʼe makatüin nia tamaa süpüla nükaalinjainjachin taya püchikumüin. Meechi yaakaijaʼa neʼe paaʼin sünain akaalinjaa taya. Püreesashi taya saaʼujee taküjain tü pütchi anakat maʼin.*
14 Nnojoishi taluwataweein pia sünain wanee kasa nnojotka anashiin pümüin suulia paainjain shia mojusheeka. Anasü paainjale shia süka paaʼin pümüiwaʼa.
15 Eeshijaʼa nükaaʼinjaale paala Onésimo süpüla nüleʼejüinjachin nüchikuaʼa pümaʼanamüin.
16 Alinjachi nia püpüla süka puwalaichipain nia. Nnojoishi müinjachin nia maʼaka naaʼin wanee püchepchia pümüin. Aishiaʼaya nia tapüla. Aʼireepejeʼe nia püpüla, jama chainjachin nia pümaa otta nunoujiraaichipain wanaa pümaa.
17 Shiimainrejeʼe alin taya püpüla, kamanee pia nümüin Onésimo, müinjachi tayakaijaʼa antüin pipialuʼumüin.
18 Tawalaajeerü pümüin kaainjarale nia puulia, jaʼitakajeʼe kojuyaarale nia puulia tawalaajeeriaʼaya pümüin.
19 Tayakai Pablo, taya kashajalakai karaloʼutakat tüü, tawalaajeeriaʼaya pümüin süpüshuaʼa tü nujuyaalakat Onésimo. Mapajeʼe kojuyaalakai paaʼin toulia süka tekirajanain pia paala nüchiki Jesús.
20 Tawalachee, paaʼinraʼaya maa tü tamakat pümüin naaʼujee chi Señotkai. Anakajaʼa pükatchinrüle taaʼin nükajee Cristo.
21 Tatüjaa aaʼu paainjeerüin tü tamakat pümüin. Aniisa taya ashajüin pümüin, jama tatüjaain saaʼu anaʼleejeerüin putuma tü taluwataakalü anain pia.
22 Wane kasa tachuntajatka pümüin shia yapain putuma eeinjachire tantapünaain. Kasataalejeseʼe tajütünüin achiki süpüla chamaatüin taya jümaʼanamüin, süka jamüin, juʼuraajawalin tapüleerua.
23 Nüsaküin pia Epafras chi püreesajiraakai wanaa tamaa saaʼujee nunoujain nünain Cristo Jesús.
24 Nüsaküinña pia Marcos, Aristarco, Demas otta Lucas, aʼyataajiraashii naya wanaa tamaa.
25 Kasataalejeseʼe kamaneein maʼin jümüin chi Señotkai Jesucristo saaʼu wayuuin kamaneeshii jia.
Noota
^ Pünaʼla tia suluʼu tü kanüliakat «Jamaluʼulu pütchikat».
