Naʼyataain na Aluwataaushikana 10:1-48
-
Tü niʼrakat Cornelio (1-8)
-
Tü niʼrakat Pedro süchiki tü kasa wulekat nutuma Maleiwa (9-16)
-
Antüshi Pedro nümaʼanamüin Cornelio (17-33)
-
Nüküjain Pedro tü pütchi anakat maʼin namüin na wayuu nnojoliikana judíoin (34-43)
-
«Tayaawatüitpa aaʼu nnojoluin koʼuin nukuwaʼipa Maleiwa sümüin wayuu» (34, 35)
-
-
Antüsü tü nüpülainkat Maleiwa naaʼu na wayuu nnojoliikana judíoin jee woutiisashii naya (44-48)
10 Eejachi wanee wayuu chaa Cesarea, Cornelio nünülia, sülaülajana nia surulaat, shiajaʼa tü kanüliakat «regimiento italiano».*
2 Kanoulashi maʼin wayuukai chia nünain Maleiwa jee kojutushi nia nümüin. Müsüjaʼaya neʼe nakuwaʼipa na kasayuukana nünain. Nükaalinjain na maʼletsekana jee oʼuraajawaishi nia waneepia nümüin Maleiwa.
3 Maʼaka saaʼin las tres* aliika, niʼrakalaka wanee aapiee nümaʼanajeejachi Maleiwa arütkaakai nünainmüin jee makai nümüin: «¡Cornelio!».
4 Mmotkalaka maʼin Cornelio sümaa niʼrajawaain nümüin nia, anuujeseʼe nünüiki nümüin: «Anii taya Señotkalee». Nusoutakalaka chi aapieekai nümüin: «Naapüin Maleiwa pünüiki wanaa sümaa puʼuraajüin otta niʼrüin tü kasa paainjakat napüleerua na wayuu maʼletsekana, nnojotsü motuin naaʼin tia.
5 Anakajaʼa püjütüle waneinnua wayuu chaa Jopemüin süpüla nasaajüinjachin pümüin wanee wayuu Simónkai anülia, eʼraajünüshi maʼin nia suluʼu Pedro nümünüin sutuma wayuu.
6 Ichaasa nia nipialuʼu Simón, chi akuttiirajüikai, chi kepiakai sotpaʼa palaa».
7 Mayaashi nuʼunuin chi aapiee yootokai amaa nia, neenajiraka piamashii nüchepchia nümaʼaleeya wanee surulaat kanoulashi nünain Maleiwa naʼakajee na wayuu aʼyataakana nümüin.
8 Nüküjainjeseʼe namüin süpüshuaʼa tü alatakat namüin sümaa nüjütüin naya Jopemüin.
9 Waneemüin kaʼi süchikijee tia, wopuluʼupa na wayuukana jee nalüʼülaapa sünainmüin tü pueulokot, nüʼliikajaakalaka Pedro sünain oʼuraajaa saaʼu tü miichikat maʼaka las doce* kaleʼu.
10 Outakalaka nia jamü sümaa nikeetaain saaʼin wanee kasa. Shiasaʼa sujuuna süʼlakajaanüin eküütkat, makaʼa niʼrakai saaʼin wanee kasa sümaa wattalaʼa sümüin naaʼin.
11 Müsüjaʼa niʼrakai saaʼin seerulaain tü sirumatuʼukat sümaa niʼrüin wanee saawana miyoʼu aainjuushi süka lino, ajapuluʼujunusü shia süka tü pienchisükat sücheʼe, müsü süshakatakai aaʼin mmoluʼumüin.
12 Eejatkalaka seʼe mma saaʼu tia saawanakat. Eejatü tü wüchii wünaʼapüjatü, eejatü tü wüchii lemütüsükat otta eejatü tü wüchii waawatakat iipünaapünaa.
13 Naapüinjeseʼe wanee pütchi sünain maa: «Pütamaa Pedro, puʼuta saaʼin pikaiwa».
14 Nusoutakalaka Pedro nümüin: «Señotkalee, nnojoireejaʼa süpüla teküinjachin türa. Matüjainsai taya ekaa wanee kasa yarüttaka noʼuluʼu Maleiwa».
15 Naapakalaka Pedro tü pütchikat sünain maa: «Yarüttüsü pümajayaai sümüin tü kasa wulekat nutuma Maleiwa».
16 Apünüintuapa naapüin Pedro tia, süsaajaanaka iipünaamüin tü kasa niʼrakat.
17 Jiwaʼatakalaka naaʼin Pedro jee jülüjaa müsü naaʼin jamaluʼuluin tü kasa niʼrakat. Eekajasaʼa na wayuu nüjünalakana Cornelio, asakitshii naya jalain kepiain Simón, nantaka soʼuluʼumüin miichikat.
18 Neenajaka chi wayuu nipiajachikai jee nasakiraka yalajachire katunkulein Simón, chi Pedro münakai.
19 Yalaiwaʼaya jülüjain naaʼin Pedro tü kasa niʼrakat, anuukalaka nünüiki Maleiwa nümüin sükajee tü nüpülainkat: «Nnaasaʼa apünüinshii wayuu asakitshii pünain.
20 Anashi yapajüle pia, püshakata jee puʼuna namaa nala wayuukana sümaa nnojoluin wainmajüin paaʼin, jama taluwanaajalain naya».
21 Nüshakatakalaka Pedro eemüin na wayuukana jee nümakalaka namüin: «Anii taya, taya chi jüchajaakai achiki, ¿kasajaʼa teʼiyouka amüin jia?».
22 Anuujeseʼe nanüiki nümüin: «Nüjünalasaʼa waya Cornelio, chi sülaülajanakai surulaat, wayuu loto akuwaʼipachi jee kojutushi Maleiwa nümüin, anasü maʼin nanüiki na judíokana nüchiki. Yootushi nia nümaa wanee aapiee jee nüküjakalaka nümüin nüsaajirüinjachin pia süpüla puʼunajachin chaa nipialuʼumüin otta naapajüinjatüin pünüiki».
23 Nikerotitkalaka naya Pedro paülüʼümüin jee natunkaakalaka nümaʼana.
Waneemüin kaʼi, nütamaakalaka Pedro jee nuʼunakalaka namaa naya wayuukana otta müshiʼiya waneinnua anoujashii chejeʼewalii Jope.
24 Nüntakalaka Pedro Cesareamüin waneemüin kaʼi. Nuutkajeʼeraka Cornelio na kasayuukana nünain otta müshiʼiya na nütünajunnuukana süpüla naʼatapajüinjanain naya.
25 Nikerotoko Pedro suluʼumüin miichikat, nüpanapaka nia Cornelio, nüsapainkaka nia nümülatuʼu süpüla niiʼiyatüinjatüin nujutu nümüin.
26 Nütameʼeraka nia Pedro sünain maa: «Püshaʼwalaa, wayuʼulaa neʼe taya wanaa pümaa».
27 Sümaʼainruʼu naashajaain Pedro nümaa, nikerotokoloko jee niʼrakalaka watta saalii wayuu jutkatüin.
28 Anuujeseʼe nünüiki Pedro namüin: «Nnojotsü anain namüin na judíokana naʼaleewajaainjanain namaa na wayuu naatakana oumain jee narütkaainjanain nanainmüin, tayaawatapejeʼe nutuma Maleiwa nnojoluinjatüin jülüjain taaʼin eein wayuu yarüttaka akuwaʼipa noʼuluʼu Maleiwa.
29 Müshijeseʼe nnojolin tayoutuin süchiki wanaa sümaa jüsaajirüin taya. Jüküja jümaala tamüin kasapülajachin jüsaajiraka taya».
30 Nusoutakalaka Cornelio nümüin: «Pienchiirü kaʼi süchikijee toʼuraajüin, maaʼulujatü yaa maʼaka saaʼin las tres aliika.* Niiʼiyalaʼalaa nümaka tamüin wanee wayuu jorottokai asheʼin.
31 Anuujeseʼe nünüiki tamüin: ‹Cornelio, naapüin Maleiwa pünüiki wanaa sümaa puʼuraajüin nümüin otta nnojotsü motuin naaʼin Maleiwa tü kasa paainjakat napüleerua na wayuu maʼletsekana.
32 Anakajaʼa püjütüle waneinnua wayuu chaa Jopemüin süpüla nasaajüinjachin pümüin wanee wayuu Simónkai anülia, eʼraajünüshi maʼin nia suluʼu Pedro nümünüin sutuma wayuu. Ichaasa nia nipialuʼu Simón, chi akuttiirajüikai, chi kepiakai sotpaʼa palaa›.
33 Tasaajiramaatüinjeseʼe pia, anashia müin pia antüin. Anaasaʼa joo waya jutkatüin nuʼupala Maleiwa süpüla püküjainjatüin wamüin tü nümakat Jehová».*
34 Anuujeseʼe nünüiki Pedro naapapa nünüiki Cornelio: «Tayaawatüitpa aaʼu nnojoluin koʼuin nukuwaʼipa Maleiwa sümüin wayuu.
35 Anashiisü nakuwaʼipa nümüin na wayuu kojutukana amüin nia otta na aainjakana kasa anasü jaʼitasü naatain noumain.
36 Aluwataashi nia nünüiki namüin na nüchonniikana Israel, shiajaʼa tü pütchi anakat maʼin, aküjaka anajiraainjanain naya nümaa Maleiwa nükajee Jesucristo. Nia Jesús laülaashikai saaʼu* wayuu süpüshuaʼa.
37 Jaapa achikirüjaʼaya tü pütchi naashajaakalü achiki na wayuukana sainküinpünaa Judea, alatüsü tia süchikijee nüküjain Juan woutiisainjatüin wayuu, oʼttusü tia chejee Galileajee.
38 Nia nüküjaka achiki Jesús, chi chejeʼewaikai Nazaret. Nüneeküin nia Maleiwa sükajee tü nüpülainkat jee naapakalaka pülaa nümüin. Suluʼujee tia waraittakalaka nia sünain aainjaa kasa anasü sümüin wayuu. Naawaleʼerüin na wayuu müliakana nutuma chi Yolujaakai, jama eein Maleiwa nümaa.
39 Woʼupalajatü süpüshuaʼa tü kasa naainjakat chaa noumainpaʼa na judíokana otta chaa Jerusalén, nakachetpejeʼe nia sünain wanee wunuʼu süpüla outajachin nia.
40 Nüsoʼireʼennaka aaʼin nutuma Maleiwa süchikijee tü apünüinkat kaʼi. Nuuʼulaakalaka nia Maleiwa süpüla niiʼiyalaainjachin sümüin wayuu.
41 Nnojoipejeʼe nia eeʼiyalaawalain sümüin wayuu süpüshuaʼa, wayaʼala neʼe niiʼiyalaaka amüin, na ekakana jee asakana wanee kasa nümaa süchikijee nüsoʼireʼennüin aaʼin. Nüneekatüjülii waya Maleiwa süpüla weʼrüinjachin Jesús otta wekirajüin nüchiki.
42 Nuluwataain waya Jesús süpüla waküjain pütchi namüin na wayuu woumainpaʼajeejanakana jee pansaainjatüin tü wamakat süchiki niain nüneekajalain Maleiwa süpüla süsalainjatüin saainjala wayuu nutuma, jaʼitasü türa eekai katüin soʼu jee türa eekai outuin.
43 Napüshuaʼa na nünüikimaajanakana Maleiwa ekirajüshii nüchiki Jesús. Nashajüin süchiki sülatinneerüin naainjala wanee wayuu nuulia nünülialuʼu Jesús kanoulale nia nünain».
44 Yalaiwaʼaya naashajaain Pedro süchiki süpüshuaʼa tia, süntalaa sümakalaka tü nüpülainkat Maleiwa naaʼu napüshuaʼa na wayuu aapajakana tü pütchikat.
45 Ponokoloko maʼin naaʼin na anoujashii judío* nümaajanakana Pedro, naapüin Maleiwa nüpülain namüin na wayuu naatakana oumain,
46 jama neʼrüin na wayuukana sünain aashajawaa suluʼu anüikii naatajatü jee sünain naʼwaajüin Maleiwa. Nusoutakalaka Pedro sünain maa:
47 «Aapünüsü namüin wayuukana naainnua tü nüpülainkat Maleiwa maʼaka saapünüin wamüin, ¿jaraikaʼa apülajüinjachin noulia woutiisainjanain naya atumawaa shiroku wüin?».
48 Nuluwataakalaka Pedro waneinnua wayuu süpüla nawoutisaajüinjanain naya wayuukana nünülialuʼu Jesucristo. Süchikijee tia, nachuntaka nümüin Pedro makatüinjachin nia namaa maʼaka jeʼra kaʼi.
Noota
^ 600 surulaat na eejanakana suluʼu tia, susurulaatse naya Roma.
^ «Maʼaka mekietsat oora süchikijee nujuʼitaain kaʼikai» maluʼulu tia suluʼu griego.
^ «Maʼaka aipirua oora süchikijee nujuʼitaain kaʼikai» maluʼulu tia suluʼu griego.
^ «Maʼaka mekietsat oora süchikijee nujuʼitaain kaʼikai» maluʼulu tia suluʼu griego.
^ Pünaʼla tia suluʼu tü kanüliakat «Sooʼomüin pütchi A5».
^ Jee niale «Süseñotsekai».
^ «Anoujashii achotoonokana süta nakorolo» maluʼulu tia suluʼu griego.
