Naʼyataain na Aluwataaushikana 11:1-30
-
Nüküjain Pedro namüin na aluwataaushikana süpüshuaʼa tü kasa alatakat (1-18)
-
Makatüshi Bernabé jee müshia Saulo chaa Antioquía, tü chakat Siria (19-26)
-
«Tü palajatkat mma eejanale neʼraajünüin na anoujashiikana suluʼu ‹na oushikajaakana süchiirua nukuwaʼipa Cristo› namünüin» (26)
-
-
Nüküjain Ágabo süntajatüin wanee jamü sainküin mmakat (27-30)
11 Nayasaʼa na aluwataaushikana namaʼaleeya na anoujashii chajanakana Judea, naapakalaka süchiki naapaain sümaa nünüiki Maleiwa na wayuu nnojoliikana judíoin.
2 Nüntapa Pedro Jerusalénmüin, eejana waneinnua wayuu anakana aashin süchotoonajatüin süta nükorolo* wanee wayuu nnojoikai judíoin, naʼülüjiraaka nümaa Pedro.
3 Anuujeseʼe nanüiki nümüin: «Antüshi pia nepialuʼumüin wayuu nnojoliikana achotoonuin süta nakorolo otta ekaashi pia namaʼaya».
4 Nüküjakalaka Pedro namüin süpüshuaʼa tü kasa alatakat, anuu nünüiki namüin:
5 «Chajachi taya sünain oʼuraajaa suluʼu tü mmakat Jope, makaʼa teʼrakai saaʼin wanee kasa sümaa wattalaʼa sümüin taaʼin. Teʼrataalaka saaʼin wanee saawana miyoʼu aainjuushi süka lino. Ajapuluʼujunusü shia süka tü pienchisükat sücheʼe. Süshakataka mmoluʼumüin wanaa maʼin sümaa eejachire taya.
6 Eejatkalaka saaʼu tia saawanakat wüchii seʼe mma, eejatü eekai pienchin süsaʼa, wüchii wünaʼapüjatü, eejatü türa eekai lemütüin otta tü wüchii waawatakat iipünaapünaa.
7 Taapataalaka saaʼin wanee pütchi sünain maa: ‹Pütamaa Pedro, puʼuta saaʼin pikaiwa›.
8 Tasoutaka shiʼipajee tia pütchikat sünain maa: ‹Nnojorüleejaʼa süpüla teküinjatüin türa Señotkalee. Matüjainsai taya ekaa wanee kasa eekai yarüttüin noʼuluʼu Maleiwa›.
9 Taapaka süchikuaʼa tü pütchikat sünain maa: ‹Yarüttüsü pümajayaai sümüin tü kasa wulekat nutuma Maleiwa›.
10 Taapaka apünüintua tia pütchikat, süsaajaanaka iipünaamüin tü kasa teʼrakat.
11 Wanaa maʼin sümaa tia, nantapaaka apünüinshii wayuu eemüin tü miichi eejanale waya. Ajütüüshii naya tanainmüin chejee Cesareajee.
12 Nüküjakalaka tamüin Maleiwa sükajee tü nüpülainkat, toʼunajachin namaa naya wayuukana sümaa nnojoluin wainmajüin taaʼin. Oʼunushiijaʼaya tamaa na aipiruashii wawalayuu yaakana jiʼrüin tamaa. Wantakalaka nipialuʼumüin Cornelio.
13 »Nüküjain wamüin niiʼiyalaain wanee aapiee nümüin chaa nipialuʼu jee naashajaaka nümaa sünain maa: ‹Anashii püjütüle waneinnua wayuu chaa Jopemüin süpüla nasaajüinjachin pümüin wanee wayuu Simónkai anülia, eʼraajünüshi maʼin nia sutuma wayuu suluʼu Pedro nümünüin.
14 Nüküjeetkalaka pümüin tü paaʼinrajatkat süpüla puʼttaainjachin namaʼaleeya na wayuu kepiakana pümaa›.
15 Mayaashi taashajaain, süntakalaka tü nüpülainkat Maleiwa naaʼumüin naya wayuukana maʼaka süntüin waaʼu sümaleeiwaʼaya.
16 Sotojooko taaʼin tü nümakat chi Señotkai wanaa sümaa nümüin: ‹Woutiisasü wayuu nutuma Juan shiroku wüin, woutiiseenapejeʼe jia sükajee tü nüpülainkat Maleiwa›.
17 Naapülejeʼeya Maleiwa namüin naya wayuukana tü kasa naapakat wamüin waya anoujakana nünain Jesucristo, ¿jaraikaʼa maʼin taya süpüla touküinjachin nüchiki Maleiwa?».
18 Naapapa süpüshuaʼa tia, nojoʼlooko suulia atkawaa nümaa Pedro jee naʼwaajakalaka Maleiwa sünain maa: «Anataʼaleeshijaʼa maʼin Maleiwa nuuʼulaaka na nnojoliikana judíoin nayaawajaainjanain suulia naainjala süpüla katüinjatüin noʼu».
19 Nayasaʼa na anoujashii aʼwalakajaakana paala suluʼujee nuʼutunuin aaʼin Esteban, antüshii suluʼumüin tü mmakat Fenicia, Chipre otta müsia Antioquía. Nayapejeʼe neʼe naküjain amüin pütchi na judíokana.
20 Eejanaka waneinnua anoujashii chejeʼewalii suluʼujee tü mmakat Chipre otta Cirene. Noʼunakalaka Antioquíamüin, naküjaka pütchi namüin na wayuu aashajaakana griego jee naküjainña namüin tü pütchi anakat maʼin nüchiki chi Señotkai Jesús.
21 Eejachikalaka Jehová* namaa naya anoujashiikana. Wattaka naalii na wayuu anoujayaa makana jee oushikajaaka süchiirua nukuwaʼipa chi Señotkai.
22 Saapünaka süchiki tia natuma na anoujashii chajanakana Jerusalén, najütüinjeseʼe Bernabé chai nukua Antioquíamüin.
23 Nüntapa chamüin, niyaawatakalaka kamaneein maʼin Maleiwa namüin naya anoujashiikana. Talatakalaka maʼin naaʼin jee nütütüleʼerüin naaʼin naya anoujashiikana süpüla ayatüinña naya jüüjüüin nümüin chi Señotkai süka süpüshuaʼa naaʼin.
24 Wayuu anashi Bernabé, eejatü tü nüpülainkat Maleiwa naaʼu otta kanoulashi maʼin nia. Wattaka naalii na wayuu anoujayaa makana nünain chi Señotkai.
25 Nuʼunakalaka suluʼumüin tü pueulo kanüliakat Tarso sünain achajawaa nüchiki Saulo nüntaleepa nünain.
26 Nüntapa nünain, nümaakalaka nia Antioquíamüin. Waneekalaka maʼin naya juya sünain outkajawaa namaa na anoujashii chajanakana, wattaka naalii na wayuu nekirajakana. Antioquía shia tü palajatkat mma eejanale neʼraajünüin na anoujashiikana suluʼu «na oushikajaakana süchiirua nukuwaʼipa Cristo»* namünüin, wanaapünaa sümaa tü keeʼireekat naaʼin Maleiwa.
27 Soʼu tia, nantapaaka Antioquíamüin waneinnua nünüikimaajana Maleiwa chejeejana Jerusalénjee.
28 Niasaʼa wanee napüshi naya nünüikimaajanakana Maleiwa, chi kanüliakai Ágabo, nüküjain sükajee tü nüpülainkat Maleiwa sülüʼülüin maʼin sükalia süpüla süntajatüin wanee jamü sainküin mmakat. Alatüsü tia wanaa sümaa niain aluwataain Claudio, chi «César»* münakai.
29 Nayasaʼa na nikirajüinkana Jesús, nakumajüin sukuwaʼipa süpüla naluwataainjatüin wanee kasa akaalinjiainjatka na nawalayuu chajanakana kepiain Judea. Naaʼinrüin tia wanaapünaa sümaa tü kasa eekat namaʼana.
30 Naaʼinrüinjaʼaya tia, najütirakalaka namüin na laülaashii chajanakana Judea tü nasülajalakat. Naluwataain tia nümaa Bernabé otta nümaa Saulo.
Noota
^ Pünaʼla tü pütchikat «Circuncisión» suluʼu tü kanüliakat «Jamaluʼulu pütchikat».
^ Pünaʼla tia suluʼu tü kanüliakat «Sooʼomüin pütchi A5».
^ «Cristianos» maluʼulu tia suluʼu griego.
^ Pünaʼla tia suluʼu tü kanüliakat «Jamaluʼulu pütchikat».
