Naʼyataain na Aluwataaushikana 16:1-40
-
Amaanüshi Timoteo nutuma Pablo (1-5)
-
«Müshi niʼrakai naaʼin Pablo wanee wayuu Macedoniajeʼewai» (6-10)
-
Anoujasü Lidia chaa Filipos (11-15)
-
Püreesashi Pablo nümaa Silas (16-24)
-
Woutiisashi chi kaatsetpüʼükai namaʼaleeya na wayuu chajanakana nipialuʼu (25-34)
-
Nüküjain Pablo namüin na sülaülakana mma nachuntajanain nümüin otta nümüin Silas motuinjatüin naaʼin tü naaʼinrakat namüin (35-40)
16 Nüntaka Pablo chaa Derbemüin jee nülataka chaa Listramüin. Eejachijaʼa wanee nikirajüin Jesús chayaa kanüliashi Timoteo. Anoujasü tü niikat, wayuu judío shia, griegopejeʼe chi nüshikai.
2 Na anoujashii chajanakana Listra jee Iconio, anasü maʼin nanüiki nüchiki Timoteo.
3 Nüküjakalaka Pablo nümaweein Timoteo, nümaashijeseʼe nia jee nüchoteʼeraka süta nükorolo Timoteo suulia mojujain nanüiki na judío kepiakana suluʼu tia pueulokot, jama natüjaain saaʼu napüshuaʼa wayuuin griego chi nüshikai Timoteo.
4 Sümaʼainruʼu noʼunuin sainküinpünaa pueulo, naküjawalin namüin na anoujashiikana tü kasa naneekakat na aluwataaushikana namaʼaleeya na laülaashii chakana Jerusalén süpüla naaʼinrajatüin tü münakat namüin.
5 Suluʼujee tia, katsüinsü maʼin nanoula na anoujashiikana jee akooʼomüinraashii maʼin naya weinshi.
6 Alatüshii naya suluʼupünaa tü mmakat Frigia jee suluʼupünaa tü mmakat Galacia, jama nütaʼülüin Maleiwa nakuwaʼipa sükajee tü nüpülainkat suulia naküjaʼalüin pütchi suluʼu tü mmakat Asia.*
7 Jaʼitakajeʼe neʼe wanaa sümaa nantüin chaa Misia, alatapünaweeshii naya chaa Bitiniapünaa. Nütaʼülapejeʼe Jesús nakuwaʼipa sükajee tü nüpülainkat Maleiwa.
8 Alatapünaashiijeseʼe naya Misiapünaa jee nantakalaka Troasmüin.
9 Shiasaʼa aipaʼa, müshi niʼrakai naaʼin Pablo wanee wayuu Macedoniajeʼewai, shaʼwatüshi nia nümülatuʼu sünain achuntaa nümüin: «Püntaʼaya yaamüin Macedoniamüin, pükaalinjaʼaya waya».
10 Süchikijee niʼrüin Pablo tia, wachajaain sukuwaʼipa süpüla woʼunajanain Macedoniamüin süka wayaawatüin saaʼu nüjünalain waya Maleiwa chamüin süpüla waküjainjanain tü pütchi anakat maʼin.
11 Oʼunushiijeseʼe waya suluʼu anuwa chejee Troasjee chai wakua suluʼumüin tü mmakat Samotracia. Shiasaʼa waneemüin kaʼi woʼunaka suluʼumüin tü mmakat Neápolis.
12 Jee yalejee yala, woʼunakalaka chaa Filiposmüin, tü mma noumainkat na romanokana, shiajaʼa tü pueulo miyoʼukat maʼin chaa suluʼu tü mmakat Macedonia. Eekalaka wakalia chayaa.
13 Shiasaʼa soʼu tü sükaliakalü eemerawaa, wojuʼitakalaka soʼuluʼupünaa tü pueulokot. Wantakalaka sotpaʼamüin wanee süchi eere eein waküjainruʼu wanee oʼuraajülee. Waikaajaaka chamüin jee waashajaaka namaa na jieyuu chajanakana jutkatüin.
14 Eejatkalaka wanee wayuu kanüliasü Lidia, oikaasü shia wanee kuluulu jepisiiyaa soʼu. Chejeʼewat shia suluʼujee tü mmakat Tiatira, suʼwaajüin Maleiwa tia wayuukat, yalajatü sünain aapajaa. Nükaalinjaka shia Jehová* süpüla kacheʼejüinjatüin shia sümüin nünüiki Pablo.
15 Woutiisakalaka Lidia namaa na wayuu chajanakana shipialuʼu otta süchikijee tia sümakalaka wamüin: «Wayuulejeʼeya anoujasü taya nünain Jehová* saaʼin jümüin, shia anakaʼaya aluʼu juʼunule tepialuʼumüin». Suchuntaka maʼin wamüin woʼunajanain sümaa.
16 Soʼu wanee kaʼi, wanaa sümaa woʼunuin suluʼumüin tü aʼwaajüleekat, antiraashii waya sümaa wanee majayüt, achepchiee. Kaleʼeruʼusü shia yolujaa, süküjawalin tü yolujaakat sümüin tü kasa alatajatkat. Wainmawai nneerü nakanajawaika na sülaamainkana sünainjee, saaʼujee süküjain sümüin wayuu tü kasa alatajatkat.
17 Suʼunawaika tia majayütkat nüchiirua Pablo jee wachiirua wayakana, woottüsü shia sünain maa: «Wayuukana naainnua nüchepchia chi Maleiwa Miyoʼushikai maʼin. Shia naküjaka jümüin jamüinjatüin jukuwaʼipa süpüla juʼttaainjanain».
18 Eesü sükalia tia wayuukat sünain saaʼinrüin tia. Nukulajaaka aaʼin Pablo sünainjee, nuuyantaaka jee nümakalaka sümüin tü yolujaa süleʼerujutkat: «Saaʼu nünülia Jesucristo taluwataain pia süpüla pujuʼittajatüin süleʼeruʼujee tü wayuukat». Sujuʼittalaa sümaka tü yolujaakat süleʼeruʼujee tü wayuukat.
19 Nayaawatapa saaʼu na sülaamainkana nnojoliinnapain süpüla nakanajüin nneerü, nataʼülaka Pablo nümaa Silas jee najaraijaka naya chaa metkaaraluʼumüin, namaʼanamüin na aluwataashiikana.
20 Nantirapa naya namaʼanamüin na aluwataashiikana saaʼu tü mmakat Filipos, namakalaka: «Eekajasaʼa wayuukana naainnua, nekeʼeja aaʼinrü wayuu yaa suluʼu tü pueulokot. Wayuusa judío naya
21 jee nekirajüin wayuu sünain akuwaʼipaa ayoutunakat wapüleerua süpüla wakuwaʼipainjatüin jee nnojotkat waaʼinrajatüin, jama wayuuin romano waya».
22 Napashajaanaka sutuma wayuu. Nayasaʼa na sülaülakana mma, nachatajaain nüsheʼin Pablo nümaa Silas jee nootoko wayuu nooʼomüin süpüla naʼyaajüinjanain naya süka wunuʼu.
23 Jee süchikijee naʼyaajüin maʼin naya, napüreesajitka naya otta naluwataain chi kaatsetpüʼükai süpüla niʼrajüinjanain naaʼu.
24 Mayaashi nuluwataanüin chi kaatsetpüʼükai sünain aaʼinraa tia, nikerotirüin naya shiinaluʼu tü kaatsetkat sümaa nuuʼuttuin nasaʼa süʼlatiraluʼupünaa piamasü taapüla* jawajawatka maʼin.
25 Maʼaka süseʼeruʼu aikat, oʼuraajüshi Pablo nümaa Silas jee naʼwaajüin Maleiwa sükajee neeʼirajüin nümüin. Naapajaka na püreesashiikana tü nanüikikat.
26 Sukutkujaʼalaa sümaka tü mmakat, emetutsü maʼin, sülianajaaka suuʼui tü kaatsetkat sutuma. Sujutajaaya sümaka tü puettoʼu eejatkat suluʼu tü kaatsetkat jee süpüttayaa sümaka tü kaleena eejatkat nanain na püreesashiikana.
27 Mayaashi nüchijiraain chi kaatsetpüʼükai, niʼraka jutatayaa sümüin tü puettoʼu eejatkat suluʼu tü kaatsetkat. Niyuʼluinjeseʼe tü nüchajaruutsekat, oʼuniraainjachi nia naaʼin, süka isajayaain naaʼinruʼu na püreesashiikana.
28 Nuʼwaataka Pablo sünain maa: «Nnojo puʼuniraain paaʼin, anaa waya wapüshuaʼa».
29 Nuchuntaka chi kaatsetpüʼükai süntinnajatüin nümüin kojuyasü ranpara. Nuwataaka paülüʼümüin jee nüsapainkaka nia nümülatuʼu Pablo otta Silas, kutkuttaʼalaka neʼe nia.
30 Niyuʼlaka naya suluʼujee tü kaatsetkat jee nümakalaka namüin: «Waʼlemuñuwaa, ¿kasa taaʼinrajatka süpüla toʼtteʼennajachin?».
31 Nasoutaka nümüin: «Punouja nünain chi Señotkai Jesús, puʼtteʼenneechika wanaa namaa na wayuu kepiakana pümaa».
32 Naküjakalaka nünüiki Jehová* nümüin jee namüin na wayuu yalajanakana nipialuʼu.
33 Nümaanaka Pablo nümaa Silas nutuma chi kaatsetpüʼükai soʼuleʼeya aikat tia jee nuʼlojuin nalioʼu. Woutiisaka nia namaʼaleeya na wayuu chajanakana nipialuʼu.
34 Nikerotiraka naya nipialuʼumüin jee nüʼlakajeʼeraka neküin. Talatakalaka maʼin naaʼin chi kaatsetpüʼükai namaʼaleeya na yalajanakana nipialuʼu, jama nanoujainnapain nünain Maleiwa.
35 Jaʼipa kaʼi, naluwataakalaka nawaariase na sülaülajanakana mma nümaʼanamüin chi kaatsetpüʼükai sünain maa: «Püjüta nachiki na wayuukana».
36 Niasaʼa chi kaatsetpüʼükai nüküja achikit tia nümüin Pablo jee nümakalaka nümüin: «Na sülaülajanakana mma, naluwataain waneinnua wayuu süpüla jüjütünajanain achiki. Anashii jujuʼittüle, juʼuna jümaala».
37 Asoutapejeʼe Pablo namüin sünain maa: «Naʼyaajüin waya suʼupala wayuu sümaa nnojoluin süsalain waya wanee kasa natuma, eerejeʼe wayuuin romano waya jee napüreesajirüin joo wayayaa. Anaataaka joo waya najüteein achiki ojuunaa, nnojoliireejaʼa waya ojuʼitajanain. Anashii nayale antüin sünain ojuʼitiraa waya».
38 Nayasaʼa na waariakana naküjaka nünüiki Pablo namüin na sülaülakana mma. Eimmolojooshiijeseʼe naya natüjaapa saaʼu wayuuin romano Pablo nümaa Silas.
39 Oʼunushiijeseʼe naya namaʼanamüin süpüla nachuntajatüin namüin motuinjatüin naaʼin tü naaʼinrakat namüin. Nayuʼlaka naya jee süchikijee nachuntaka namüin noʼunajanain suluʼujee tü pueulokot.
40 Nujuʼitapa Pablo nümaa Silas suluʼujee tü kaatsetkat, oʼunushii naya shipialuʼumüin Lidia, eejanakalaka na anoujashiikana napüla. Nakatsüinrüinjeseʼe nanoula jee noʼunakalaka süchikijee tia.
Noota
^ Pünaʼla tia suluʼu tü kanüliakat «Jamaluʼulu pütchikat».
^ Pünaʼla tia suluʼu tü kanüliakat «Sooʼomüin pütchi A5».
^ Pünaʼla tia suluʼu tü kanüliakat «Sooʼomüin pütchi A5».
^ «Cepo» eesü sümünüle. Pünaʼla tia suluʼu tü kanüliakat «Jamaluʼulu pütchikat».
^ Pünaʼla tia suluʼu tü kanüliakat «Sooʼomüin pütchi A5».
