Naʼyataain na Aluwataaushikana 18:1-28
18 Süchikijee tia, nuʼunakalaka Atenasjee chai nukua Corintomüin.
2 Nüntapa chamüin, eejachika nüpüla wanee wayuu judío kanüliashi Áquila. Chejeʼewai nia suluʼu tü mmakat Ponto, antüshi nia Italiajee sümaa Priscila, tü nuʼwayuusekat, jama najünajaanüin napüshuaʼa na judíokana nutuma Claudio chejee Romajee. Nuʼunakalaka Pablo chaa eejanale naya.
3 Makataka nia nepialuʼu, jama wanaawain tü kasa naʼyanaajiraakalü anain. Aʼyapüjashii naya loona süpüla miichinjatüin shia.
4 Aküjawaishi nia wanee pütchi suluʼu tü ekirajüleekat nüchiki Maleiwa. Naaʼinrawalin tia soʼu sükalia eemerawaa. Nunoujiraka wayuu eekai judíoin sümaa eekai griegoin.
5 Niʼyataaka maʼin Pablo sünain aküjaa tü nünüikikat Maleiwa wanaa sümaa nüntüin Silas nümaa Timoteo chejee Macedoniajee. Aküjashi nia pütchi namüin na judíokana jee nüpansaajüin namüin niain Jesús chi Cristo münakai.
6 Nnojoliipejeʼe ojoʼlooin naya wayuukana suulia peʼipaain naya nümaa Pablo, mojusü nanüiki nümüin. Noʼotojooinjeseʼe nüsheʼin Pablo noʼupala jee nümakalaka namüin: «Jüsirüjiraa neʼe outule jia, nnojoishi tayain kasirüin. Soʼujeʼereeya kaʼikat tüü, oʼuneechi taya sünain aküjaa pütchi namüin na wayuu nnojoliikana judíoin».
7 Oʼunushijeseʼe nia chejee, nüntakalaka nipialuʼumüin Ticio Justo, wanee wayuu aʼwaajakai Maleiwa jee kepiakai saʼatoʼu tü ekirajüleekat nüchiki Maleiwa.
8 Niasaʼa Crispo, chi laülaashikai suluʼu tü ekirajüleekat nüchiki Maleiwa, anoujashi nia nünain chi Señotkai namaʼaleeya na wayuu chajanakana nipialuʼu. Watta naalii na wayuu chejeʼewaliikana Corinto anoujayaa makana sutuma naapüin tü pütchikat jee woutiisashii naya.
9 Niiʼiyalaaka chi Señotkai aipaʼa nümüin Pablo jee nümakalaka nümüin: «Nnojo mmoluin pia, ayataʼaya pia sünain aashajawaa. Nnojo puuʼulaain suulia,
10 eeshi taya pümaa jee nnojoleechi jamajüin pia sutuma wayuu. Wattayüliʼiya naalii na wayuu anoujainjanakana tanain yaa suluʼu pueulokot tüü».
11 Makataka nia suluʼu tia pueulokot soʼu wanee juya shiatapünaamüin. Nikirajawalin wayuu sünain tü nünüikikat Maleiwa.
12 Wanaa sümaa nuluwataain Galión saaʼu Acaya, aashajaajiraashii na judíokana nikiira Pablo süpüla jamajüin nia natuma. Amaanüshijeseʼe nia laülaapialuʼumüin natuma.
13 Anuukalaka nanüiki nüchiki: «Eekajasaʼa wayuukai chii nüpüleerua aaʼinrü wayuu süpüla suʼwaajüinjachin chi Maleiwakai wanaapünaa sümaa wanee kasa naata maʼin suulia tü aluwataanakalü anain waya natuma na sülaülakana mma».
14 Naashajaainjachipa Pablo, nusoutakalaka Galión namüin na judíokana: «Eerejeʼeya wanee kasa nnojotka lotuin akuwaʼipa nutuma wayuukai chii jee kaainjalalejeʼeya nia, taapajayülejeʼe tü jünüikikat.
15 Akaajasaʼa süka jüʼülüjiraain nümaa süchiirua pütchi neʼe, süchiirua sünülia wayuu jee süchiirua tü pütchi aluwataanakalü anain jia, anashii jiale anoutuin sukuwaʼipa tia. Nnojoishi taya anouteein sukuwaʼipa wanee kasa eekai müin aka saaʼin tia».
16 Nüjünajaainjeseʼe naya suluʼujee tü laülaapiakat.
17 Nayasaʼa na wayuukana nataʼülakalaka Sóstenes, chi laülaashikai suluʼu tü ekirajüleekat nüchiki Maleiwa. Naʼyaajakalaka nia soʼuluʼu tü laülaapiakat, nnojoipejeʼe ekerotuin Galión sünainpünaa tia.
18 Makataka Pablo chayaa maʼaka jeʼra kaʼi. Süchikijee tia, nüpütaakalaka nüpüla na wawalayuukana. Anuwaluʼukalaka nia Siriamüin sümaa Priscila jee müshia Áquila. Nüntapa Cencreasmüin, nüüjirakalalaka nuʼwala, jama naapüin paala nünüiki nümüin Maleiwa.
19 Nantapa Éfesomüin, niʼipünaakalaka naya yala. Niakalaka ekeroluin suluʼumüin tü ekirajüleekat nüchiki Maleiwa jee nüchajaakalaka sukuwaʼipa süpüla nayaawatüinjatüin saaʼu na judíokana tü nünüikikat Maleiwa.
20 Niyouta achikit Pablo makatüinjachin nia maʼaka jeʼra kaʼi mayaapejeʼe suchuntunuin nümüin.
21 Apütaashijeseʼe nia napüla jee nümakalaka namüin: «Nüchekülejeʼeya Jehová,* teʼreena jia jüchikuaʼa». Anuwaluʼuka nia Éfesojee,
22 nüntakalaka Cesareamüin, yalejee yala nuʼunaka Jerusalénmüin sünain asakaa na anoujashii chajanakana chayaa. Süchikijee tia, nuʼunakalaka Antioquíamüin.
23 Makataka nia yala maʼaka jeʼra kaʼi, oʼunushijeseʼe nia mapa suluʼupünaa tü pueulo chajatkat Galacia otta Frigia. Oʼunushi nia sainküinpünaa tia mmakat süpüla nütütüleʼerüinjatüin naaʼin na anoujashiikana.
24 Nüntakalaka Éfesomüin wanee wayuu judío kanüliashi Apolos, chejeʼewai nia Alejandría. Atüjashi maʼin nia süpüleerua nünüiki jee süpüleerua tü sümakat tü Karaloʼuta Nüchikimaajatkat Maleiwa.
25 Ekirajünüshi nia nüchiki Jehová,* kanoulashi maʼin nia süka eein tü nüpülainkat Maleiwa naaʼu. Pansaasü tü naashajaakalü achiki jee tü nikirajakat nüchiki Jesús, shiapejeʼe neʼe nütüjain apüleerua tü nikirajapuʼukalü anain Juan süchiki woutiisainjatüin wayuu.
26 Yalayalaka maʼin naaʼin sünain aashajawaa suluʼu tü ekirajüleekat nüchiki Maleiwa. Saapapa Priscila nümaa Áquila tü nikirajakalü anain, namaakalaka nia nümüiwaʼa jee napansaajaka nümüin tü ekirajünakat nüchiki Maleiwa.
27 Shiasaʼa süka nuchuntuin Apolos oʼunaʼairee Acayamüin, nashajakalaka na wawalayuu chajanakana Éfeso wanee karaloʼuta namüin na wawalayuu chajanakana Acaya süpüla kamaneeinjanain naya nümüin Apolos nüntapa chaa namaʼanamüin. Nüntapa chamüin nükaalinjaka maʼin na anoujashiikana, nayajaʼa na ountakana anoujaa süka kamaneein maʼin chi Maleiwakai namüin.
28 Nüküjain suʼupala wayuu jee jaʼyasü naaʼu shiimain tü nümakat süchiki nnojoluin pansaain tü namakat na judíokana. Nüküjain namüin sükajee tü Karaloʼuta Nüchikimaajatkat Maleiwa niain Jesús chi Cristokai.
Noota
^ Pünaʼla tia suluʼu tü kanüliakat «Sooʼomüin pütchi A5».
^ Pünaʼla tia suluʼu tü kanüliakat «Sooʼomüin pütchi A5».
