Naʼyataain na Aluwataaushikana 19:1-41
19 Soʼu chajachin Apolos suluʼu tü pueulokot Corinto, alatapünaashi Pablo suluʼupünaa tü pueulo wattaluʼukat suulia palaa, nüntakalaka Éfesomüin. Shiasaʼa chamüin, nüntiraaka namaa waneinnua anoujashii.
2 Asakinnüshiijeseʼe naya nutuma: «¿Antüsü jaaʼumüin tü nüpülainkat Maleiwa soʼu jikeroluin sünain anoujaa?». «Eetaayaai neʼe waapüin süchiki tü nüpülainkat Maleiwa», namakalaka nümüin.
3 Anuujeseʼe nünüiki namüin: «¿Jamakuwaʼipalii süpüla woutiisain jia?». «Woutiisashii waya sünainjee tü nikirajakalü anain Juan», namakalaka nümüin.
4 Nusoutakalaka Pablo namüin: «Woutiisasü wayuu nutuma Juan süpüla sülatinnajatüin saainjala suulia jee nüküjawalin sümüin sunoujainjatüin nünain chi antajachikai nüchikumüin, niajaʼa naashajaaka achiki Jesús».
5 Naapaiwaʼaya tia, woutiisakalaka naya saaʼu nünülia chi Señotkai Jesús.
6 Niʼitaapa najapü Pablo naaʼu naya anoujashiikana, antüsü tü nüpülainkat Maleiwa naaʼu. Naashajaaya namaka suluʼu anüikii naatajatü jee aküjashii naya tü pütchi nümaʼanajeejatkat Maleiwa.
7 Poloo piamamüin naya wayuukana.
8 Nikerotoko Pablo suluʼumüin tü ekirajüleekat nüchiki Maleiwa. Naashajaaka sümaa yalayalain naaʼin soʼu apünüin kashi. Ekirajüshi nia jee nüchajaain sukuwaʼipa süpüla nunoujirüin wayuu sünain niainjachin aluwataain Maleiwa.
9 Eepejeʼe na wayuu nnojoliikana aapaweein sümaa nünüiki, nnojoishii naya anoujeein. Mojusü nanüiki suʼupala wayuu nachiki na sulujunakana tü kanüliakat «Wopu». Akatalaashijeseʼe Pablo noulia jee nükatatkalaka na anoujashiikana noulia naya wayuukana. Nikirajawaika weinshi suluʼu tü nikirajülekat Tirano.
10 Naainjain tia soʼu piama juya. Saapünakalaka nünüiki chi Señotkai natuma napüshuaʼa na wayuu chajanakana kepiain suluʼu tü mmakat Asia.* Naapüin shia na judíokana namaa na griegokana.
11 Ayatakalaka naainjain Maleiwa kasa pülasü nükajee Pablo.
12 Alüʼüjünawaisü sümüin wayuu eekai ayuulin tü kuluulu oosojiakat nira Pablo sümaʼaleeya tü nüsheʼinkat. Saawalaaka wayuu sutuma shipettüin shia otta ojuʼitüsü yolujaa süleʼeruʼujee wayuu sutuma.
13 Eeshii waneinnua judío oʼunakana sainküin mma sümaa nooʼulaküin nayuʼleein yolujaa süleʼeruʼujee wayuu nünülialuʼu chi Señotkai Jesús. Maʼwaisü nanüiki mayaa: «Jujuʼita süleʼeruʼujee wayuu tamüshii jia nünülialuʼu Jesús, chi nikirajakai achiki Pablo».
14 Shia naaʼinrapuʼuka tia akaratshishii nüchooin wanee wayuu judío kanüliashi Esceva, nekiipüʼü nia na sacerdotekana.
15 Eepejeʼe wanee yolujaa eʼrüt wayumüin makalü anüiki namüin: «Teʼraajüinsa Jesús jee tatüjaa aaʼuchi jaralin Pablo, nnojoliipejeʼe teʼraajüin jia».
16 Numuttakalaka chi wayuu kaleʼerujuchikai yolujaa naaʼumüin na wayuukana. Nükanalaka naya waneʼewai nakua, nnojoishi eein wanee eekai eejiraain nümaa. Apantajaashiijeseʼe naya suluʼujee tia miichikat sümaa masheʼin naya jee eʼikaajüin nata.
17 Saapakalaka wayuu süpüshuaʼa süchiki tü kasa alatakat, naapüin tia na judíokana namaʼaleeya na griego chajanakana Éfeso. Eimmolojooshiijeseʼe naya jee ayataka kojutuin chi Señotkai Jesús atumawaa.
18 Watta naalii na wayuu ekerolokana sünain anoujaa, naküjain suʼupala wayuu süpüshuaʼa tü kasa mojusü naainjakat.
19 Jaʼitakajeʼe neʼe na wayuu ooʼulaküliipuʼukana namaiwa, napaʼawajiraain tü nakaraloʼutse sukuwaʼipamaajatkat ouutsü jee naʼajakalaka shia noʼupala na wayuu yalajanakana. Eekalaka 50.000 nneerü pülaata süliapala süpüshuaʼa tia karaloʼutakat.
20 Saapünakalaka süchiki tü nünüikikat Jehová* sainküinpünaa mma. Wattakalaka naalii na wayuu anoujakana sünain.
21 Süchikijee tia, jülüjakalaka naaʼin Pablo nuʼunajachin Jerusalénmüin, nülatapünaapa suluʼupünaa tü mmakat Macedonia otta müsia tü mmakat Acaya. Anuujeseʼe nünüiki: «Oʼuneechi taya Romamüin taleʼejapa Jerusalénjee».
22 Nüjütüinjeseʼe Pablo chaa Macedoniamüin piamashii wayuu niʼipajana, nia nüjütaka Timoteo nümaa Erasto. Niakalaka Pablo makatüin maʼaka jeʼra kaʼi suluʼu tü mmakat Asia.
23 Wanaapünaa sümaa tia, saashichijaakalaka wayuu nooʼomüin na wayuu sulujunakana tü kanüliakat «Wopu».
24 Eejachika wanee wayuu kanüliashi Demetrio, nukumajawalin süka pülaata shiyaakua tü miichi eere suʼwaajünüin tü maleiwa kanüliakat Ártemis. Wattawaika saalii tü nneerü nakanajakat na wayuu aʼyataakana nümaa.
25 Nuutkajeʼerüinjeseʼe na wayuu aʼyataakana nümaa jee müshiʼiya na wayuu aʼyataakana sünain wanee kasa eekai müin aka saaʼin tia jee nümakalaka namüin: «Waʼlemuñuwaa, jütüjaa aaʼu shiain wakanajüin anainjee nneerü tü makalü yaa.
26 Jiʼrüirüjaʼa jee jaapüirüjaʼa süchiki nuʼwanajeʼerüin Pablo saaʼin wayuu yaa Éfeso otta sainküinpünaa Asia, nunoujirüin naya sünain nnojoluin maleiwain tü kasa sukumalakat wayuu süpüla suʼwaajüin.
27 Nnojotsü anain tia, mojeerü sünüiki wayuu süchiki tü waʼyataainkat otta mojuteerü atumawaa tü miichi aʼwaajünakalü aluʼu Ártemis, tü maleiwa miyoʼusükalüjaʼa maʼin. Nnojoleetkalaka suʼwaajünüin sainküinpünaa Asia otta sainküinpünaa tü mmakat sünainjee tü nümakat Pablo».
28 Naapaiwaʼaya tia na wayuukana, naashichijaakalaka jee naʼwoolojooko sünain maa: «Shia miyoʼusükajaʼaya maʼin Ártemis, wamaleiwase waya yaajeʼewaliikana Éfeso».
29 Maaʼatshii jamakaijaʼa naaʼin na wayuu chajanakana suluʼu tia pueulokot. Nawanaajaayaa namaka napüshuaʼa eemüin noutkajaale na wayuu chajanakana Éfeso sümaa najaraijüin Gayo otta müshia Aristarco. Macedoniajeʼewalii naya wayuukana, nümaataralii naya Pablo.
30 Ekeroteeshiaaje Pablo naʼakamüin na wayuukana, naʼalijirapejeʼe nia na anoujashiikana.
31 Akaataajaʼa neʼe noʼutku na shikiipüʼükana miʼiraa, na kamaneekana nümüin Pablo, ajütitshii naya nanüiki nümüin süpüla nnojolinjachin nuʼunuin eemüin tü noutkajaaleekat na wayuu chajanakana Éfeso.
32 Matüjaajuka neʼe saaʼu tü namakat na wayuukana nekiiseruʼu. Na wayuu yalajanakana jutkatüin, nnojotsü natüjaain aaʼu kasain alatüin otta eeshii na nnojoliikana atüjaain saaʼu kasain noutkajaain apüla.
33 Niakalaka ayuʼnnuin Alejandro naʼakajee na wayuu wattakana naalii, jama niain ojunaanüin achiki natuma na judíokana. Niyaleraka najapü Alejandro süpüla nusoutajachin naaʼuwaa.
34 Natüjaapa saaʼu na wayuukana judíoin Alejandro, woottokoloko naya. Anuujeseʼe nanüiki nekiiseruʼu soʼu piama oora: «Shia miyoʼusükajaʼaya maʼin Ártemis, wamaleiwase waya yaajeʼewaliikana Éfeso».
35 Anuukalaka nünüiki chi laülaashikai saaʼu tia pueulokot niimaleʼerapa naaʼin na wayuukana: «Jia wayuu yaajeʼewaliikana Éfeso, ¿aashin sütüjaain saaʼu wayuu maʼleekalia wayain aaʼinmajüin tü miichi eere suʼwaajünüin Ártemis sümaʼaleeya tü shiyaakua ojutuukat chejee iipünaajee?
36 Nnojotsü jaralüin oʼttchejaain sümaa tia, shia anaka aluʼu jiimaleʼerüle jaaʼin, nnojo maaʼin jaaʼin sünain aaʼinraa wanee kasa.
37 Na wayuu yaakana jüntirüin nnojoishii ekeroluin sünain aʼluwajaa suluʼupünaa tü aʼwaajüleekat otta nnojotsü airuʼuluin nanüiki süchiki tü wamaleiwasekat.
38 Eerejeʼe wanee kasa mojushiika nümüin Demetrio jee namüin na wayuu aʼyataajiraakana nümaa, anasü naküjale süchiki tia soʼu tü kaʼi noutkajaakalü oʼu na laülaashiikana suluʼu tü laülaapiakat jee anasü naküjale shia namüin na aluwataashiikana. Naküjeetkalaka süchiki tü kasa mojujiraakalü anainjee naya.
39 Naainjülejeʼeya naya wayuukana wanee kasa eekai mojuin jaashin, outkajaajeena waya süpüla wanoutuin tia wanaapünaa sümaa tü aluwataanakalü anain waya.
40 Eʼitaaneerü waaʼu weʼrüliin wayumüin sünainjee tü alatakat soʼukai, jama nnojoluin eein wanee kasa müinjanaka aaʼujee waya».
41 Kettaapa nünüiki, nujuteʼeraka tü outkajawaakat.
Noota
^ Pünaʼla tia suluʼu tü kanüliakat «Jamaluʼulu pütchikat».
^ Pünaʼla tia suluʼu tü kanüliakat «Sooʼomüin pütchi A5».
