Naʼyataain na Aluwataaushikana 21:1-40
21 Mojukalaka maʼin waaʼin wapütaapa napüla na laülaashiikana. Anuwaluʼuka waya yalejee chai wakua suluʼumüin tü mmakat Cos. Waneemüin kaʼi, woʼotoko suluʼumüin tü mma kanüliakat Rodas jee yalejee yala, woʼotoko suluʼumüin tü pueulo kanüliakat Pátara.
2 Eejatka wapüla wanee anuwa chaʼwat suluʼumüin tü mmakat Fenicia. Oʼotooshiijeseʼe waya suluʼu jee woʼunakalaka.
3 Weʼrakalaka wattajee tü mmakat Chipre, palaapünaasü waaʼujee tia mmakat. Ayatakalaka woʼunuin suluʼumüin tü mmakat Siria. Woʼotopünaaka suluʼumüin tü mmakat Tiro eere süshakajinnüin süchise tü anuwakat.
4 Wantapa chamüin, wasakiraka nanain na anoujashiikana jee wantapa nanain, makatakalaka waya namaa soʼu akaratshi kaʼi. Aapinnapajaʼa Pablo natuma na anoujashiikana sükajee tü nüpülainkat Maleiwa nnojolinjachin nuʼunuin Jerusalénmüin.
5 Sülatapa tü akaratshikat kaʼi, yapajakalaka waya süpüla oʼunaa. Nayasaʼa napüshuaʼaleʼeya na anoujashiikana namaʼaleeya na jieyuukana jee na tepichikana, oʼunushii naya wamaa anooipaʼamüin sünain tü pueulokot. Chapa waya sotpaʼa tü palaakat, wasapainkaka waya sünain oʼuraajaa.
6 Apütaashiijeseʼe waya napüla na anoujashiikana. Woʼotookoloko suluʼu tü anuwakat, nayaka aleʼejaain na anoujashiikana nepialuʼumüin.
7 Anuwaluʼuka waya Tirojee. Woʼotoko suluʼumüin tü mmakat Tolemaida. Walatiraka wanee kaʼi namaa na wawalayuukana chayaa.
8 Oʼunushiijeseʼe waya waneemüin kaʼi chaa Cesareamüin. Wantakalaka nümaʼanamüin Felipe, chi wayuu eʼikajüikai tü pütchi anakat maʼin.* Napüshi nia na akaratshishii wayuu aneekünakana paala. Makatakalaka waya chaa nümaʼana.
9 Pienchisü majayünnüü nüchooin Felipe, nünüikimaajana naya Maleiwa.
10 Eepa wakalia chayaa, nüntakalaka wanee nünüikimaajachi Maleiwa kanüliashi Ágabo, chejeejachi nia Judeajee.
11 Nüntakalaka chaa eejanale waya. Naapaaka tü niyatapünaajanakat Pablo, nijinnajiraaka nuuʼui sümaa najapü süka jee nümakalaka: «Anuu nünüiki chi Maleiwakai sükajee tü nüpülainkat: ‹Meerü nukuwaʼipa chi wayuu kayatapünaajanakai tüü natuma na judíokana nüntapeena Jerusalénmüin jee aapüneechi ekii nia namüin na wayuu nnojoliikana judíoin›».
12 Waapaiwaʼaya tia, wachuntayaa wamaka wapüshuaʼa nümüin Pablo nnojolinjachin nuʼunuin Jerusalénmüin.
13 Anuujeseʼe nünüiki Pablo namüin: «¿Jamüshii jiʼyalajayaa jümaka jee jümalajeʼereeka taaʼin? Shiimain keraain taya süpüla ataʼünnaa jee süpüla toʼutunajachin aaʼin chaa Jerusalén saaʼujee nünülia chi Señotkai Jesús».
14 Süka nnojolin kasakain nia watuma, wooʼulaaka neʼe nia. «Nnaweerüjaʼa nukuwaʼipa nutuma Jehová»,* wamakalaka.
15 Maʼaka jeʼra kaʼi süchikijee tia, yapajakalaka waya süpüla oʼunaa jee oʼunaajaʼa wamüin Jerusalénmüin süchikijee tia.
16 Noʼunakalaka wamaa waneinnua anoujashii chejeʼewalii Cesarea chaa nipialuʼumüin Mnasón, chi wayuu chejeʼewaikai Chipre. Chainjana waya atunkuin nümaʼana, noʼutku nia na palajanakana anoujain.
17 Talataka naaʼin na wawalayuukana wamaa wantapa Jerusalénmüin.
18 Woʼunakalaka nümaa Pablo waneemüin kaʼi sünain anaʼlawaa nümüin Santiago. Eejanakalaka wapüla napüshuaʼa na laülaashiikana.
19 Nüsakaka naya Pablo jee nüküjaka namüin süpüshuaʼa tü kasa naainjakat Maleiwa nükajee saaʼujee nüküjain pütchi namüin na wayuu nnojoliikana judíoin.
20 Süchikijee naapüin tia, naʼwaajakalaka chi Maleiwakai jee namakalaka nümüin Pablo: «Wawalachee, pütüjaa aaʼulu wattain naalii na judío anoujakana jee icheshii naya süchiirua woonooinjanain sümaa tü Pütchi Aapünakat nümüin Moisés.*
21 Naapa achikit naya anoujashiikana, pikirajüin na judío chakana kepiain saʼaka wayuu nnojotka judíoin süpüla nnojoliinjanain naapaain sümaa tü Pütchi Aapünakat nümüin Moisés jee naapa achikit pikirajüin naya süpüla nnojoliinjanain nachoteʼerüin süta nakorolo nachonnii wanaapünaa sümaa tü pütchi aapünakat namüin.
22 ¿Kasache anajatka süpüla waaʼinrüin? Naapeetsa na wayuukana süchiki püntüichipain yaamüin.
23 Anasü shiale paaʼinrüin tü wamüinjatkat pümüin jooluʼu. Anaasaʼa pienchishii wayuu aapakana nanüiki paala nümüin Maleiwa.
24 Anashii pümaale naya, paaʼinra wanaa namaa tü wuleinjatkalü atuma jukuwaʼipa maʼakaapuʼu naaʼinrüin shia na judíokana. Puwalaajüinjatü wanee kasa eekai choʼujaain namüin süpüla naüjirüinjanain naʼwala. Suluʼujee tia, natüjaajeerü aaʼu na wayuukana alawaain neʼe tü aküjünakat püchiki, jama lotuin sukuwaʼipa tü paaʼinrakat otta shia poonooka amaa tü Pütchi Aapünakat nümüin Moisés.
25 Waluwataain wanüiki suluʼu karaloʼuta namüin na anoujashii nnojoliikana judíoin süpüla nayoutajatüin wanee kasa eekai saapuushin sümüin shiyaakua maleiwayaasü, nayoutajatüin isha, nayoutajatüin neküin mürüt eekai süülüüshin jee nayoutajatüin naʼluwajiraain nakuwaʼipa».*
26 Waneemüin kaʼi, nümaakalaka Pablo naya wayuukana jee wuleka nukuwaʼipa wanaa namaa maʼakaapuʼu naaʼinrüin shia na judíokana. Ekerotushijeseʼe nia mapa suluʼu tü aʼwaajüleekat süpüla nüküjainjatüin joujainjatüin shikeraajüin tü kaʼi wuleinjatkalü oʼu nakuwaʼipa otta joujainjatüin nüntirüin tü nüsülajüinjatkat nümüin Maleiwa naaʼu waneʼewai nakua.
27 Sülüʼütpa süpüla shikeraajüin tü akaratshikat kaʼi, niʼnnaka Pablo suluʼu tü aʼwaajüleekat natuma na judío chejeʼewaliikana Asia. Nashükajaka napüshuaʼa na wayuukana jee nataʼülakalaka nia
28 sümaa müin nanüiki nekiiseruʼu: «Jia wayuu yaajeʼewaliikana Israel, jükaaliinja waya. Wayuukai chii, oʼunushi sainküinpünaa tü mmakat sünain mojuin nünüiki wachiki. Mojusü nünüiki süchiki tü Pütchi Aapünakat nümüin Moisés otta mojusü nünüiki süchiki miichikat tüü. Akaʼaya joo nia, nikerotirüin wayuu griego suluʼumüin tü aʼwaajüleekat otta mojutusat nümüin miichikat tüü».
29 Müsüleʼe nanüiki mayaa süka neʼrüin paala Pablo chaa Jerusalén nümaa Trófimo, chi chejeʼewaikai Éfeso jee naaʼinruʼu nayakana amaanayaashi Trófimo nutuma Pablo suluʼumüin tü aʼwaajüleekat.
30 Nashükajaaka na wayuukana, awataashiijeseʼe naya sümaa nataʼülüin Pablo. Najaraijaka nia anooipaʼamüin sünain tü aʼwaajüleekat, nasülajaaka tü soʼukot.
31 Nuʼutunajachipa aaʼin Pablo natuma na wayuukana, naapinnakalaka chi sülaülashikai surulaat süchiki müin jamakai naaʼin na wayuukana chaa Jerusalén.
32 Niasaʼa chi sülaülashikai surulaat, nuutkajeʼerüin na nusurulaatsekana namaʼaleeya na nutujeejanakana. Awataashijeseʼe nia chaa eejanale na wayuukana. Niʼnnaiwaʼaya natuma na wayuukana chi sülaülashikai surulaat namaa na nusurulaatsekana, nooʼulaaka suulia naʼyaajüin Pablo.
33 Nürütkaakalaka chi sülaülashikai surulaat, nütaʼülakalaka Pablo sümaa nijitteʼerüin nia süka piamasü kaleena. Asakitshijeseʼe nia jaralin chi wayuu makai atumawaa otta kasain naainjalain.
34 Matüjaajuka neʼe saaʼu tü namakat waneinnua wayuu nekiiseruʼu. Shiasaʼa sutuma nnojolin nütüjaain saaʼu chi sülaülashikai surulaat kasain maʼin alatüin, niʼikajeʼerakalaka Pablo suluʼumüin tü shipiakat surulaat.
35 Nüntapa Pablo eemüin tü kaleera eejatkat soʼuluʼu tü shipiakat surulaat, nüpataanaka natuma na surulaatkana süka nashuteein maʼin na wayuukana naaʼu,
36 jama woottuin neʼe na wayuukana nachiirua sünain maa: «¡Puʼuta naaʼin!».
37 Wanaa maʼin sümaa nikerotinnajachin Pablo suluʼu tü shipiakat surulaat, nümakalaka nümüin chi sülaülashikai surulaat: «Yooteeshi taya pümaa motsomüin». Anuujeseʼe nünüiki chi sülaülashikai surulaat nümüin: «Atak, atüjashira pia griego.
38 ¿Nnojoishijasa piain chi egipcio ootokai wayuu sünain eʼraa wayumüin jee oʼunirakai 4.000 oʼunulii saaʼin wayuu chaa isashiipaʼamüin?».
39 Anuujeseʼe nünüiki Pablo nümüin: «Wayuusa judío taya, chejeʼewai taya Tarso, wanee pueulo kojutusü atumawaa chaa Cilicia. Tachuntuinjeseʼe pümüin puuʼulaainjachin taashajaain namaa nala wayuukana».
40 Nuuʼulaanaka naashajaain Pablo, ashaʼwalaashijeseʼe nia saaʼu tü kaleerakat. Nuchuntaka namüin na wayuukana süka najapü koʼutajanain naya, mayaashii koʼutuin naya, naashajaakalaka Pablo suluʼu hebreo. Anuu nünüiki namüin:
Noota
^ Pünaʼla tia suluʼu tü kanüliakat «Jamaluʼulu pütchikat».
^ Pünaʼla tia suluʼu tü kanüliakat «Sooʼomüin pütchi A5».
^ Pünaʼla tia suluʼu tü kanüliakat «Jamaluʼulu pütchikat».
^ Pünaʼla tia suluʼu tü kanüliakat «Jamaluʼulu pütchikat».
