Naʼyataain na Aluwataaushikana 25:1-27
25 Apünüinpa kaʼi Festo suluʼu tü mma nuluwataainjatkalü aaʼu otta nüikalaapa sünain aluwatawaa, oʼunushi nia Cesareajee chaa Jerusalénmüin.
2 Nayasaʼa nekiipüʼü na sacerdotekana jee müshiʼiya na judío kojutukana atumawaa, naküjain süchiki tü naainjalakat Pablo naashin jee nachuntaka maʼin nümüin Festo
3 nüsaajirüinjachin Pablo namüin Jerusalénmüin, aashajaajiraapejeʼe naya süpüla noukajüinjanain nüpüla Pablo shiiʼiree noʼutajachin naaʼin wopuluʼu.
4 Nüküjapejeʼe Festo namüin chainjachin Pablo püreesain Cesarea jee nüleʼejamaatüinjachin Festo chamüin soʼu palit kaʼi.
5 Anuujeseʼe sooʼomüin nünüiki namüin: «Anashii juʼunule tamaa juʼutku jiakana kojutukana atumawaa, kaainjalalejeʼeya wayuukai chia jüküjeerü tamüin kasain wayu naainjalain».
6 Eepa nia namaa maʼaka saaʼin mekiisat jee poloo kaʼi shiale, nuʼunakalaka Cesareamüin. Waneemüin kaʼi süchikijee nüntüin, nüikalaaka saaʼu tü einasee naikalaapuʼukat aaʼu na laülaashiikana süpüla kasalajanainjatüin saainjala wayuu natuma. Nüsaajitkalaka Pablo süpüla nüntinnajachin nümüin.
7 Nüntinnaiwaʼaya Pablo, nuutkajaanaka natuma na judío sejenakana Jerusalénjee jee wattaka saalii kasa nalirajaka aaʼujee nia sümaa nnojoluin naküjain shiimainrejeʼeya maʼin tü namakat.
8 Asoutushijeseʼe Pablo naaʼujiraa sünain maa: «Nnojoishi aainjain taya wanee kasa mojutuka anainjee tü Pütchi Aapünakat namüin na judíokana, nnojoishi taya aainjain wanee kasa mojutuka anainjee tü aʼwaajüleekat Maleiwa jee nnojoishi taya aainjain wanee kasa mojutuka anainjee ‹César› tatuma».
9 Niasaʼa Festo shiiʼiree talateein na judíokana nümaa, nüsakiraka Pablo sünain maa: «¿Oʼuneeshi pia Jerusalénmüin süpüla süsalainjachin pia tatuma tü kasa alirajünakalü aaʼujee pia?».
10 Anuujeseʼe nünüiki Pablo niʼipajee: «Anii taya müinmaʼa yaa shaʼwatüin sümülatuʼu tü einasee nüikalaaka aaʼu ‹César› süpüla süsalainjatüin saainjala wayuu nutuma, yaainjachijaʼaya taya süsalain atumawaa tü kasa taainjakat. Nnojotsüsa kasain taainjalain namüin na judíokana, pütüjaa aaʼu tia.
11 Wayuule kaainjarai taya jee eerejeʼeya wanee kasa outajachikai anainjee taya, nnojotsüjaʼamata tayoutuin süchiki outajachin taya. Alawaalejeʼeya tü namakat wayuukana naainnua süchiki tü kasa neʼitaakalü aaʼu taya, nnojoishi eein wanee wayuu aapajachikai tekii namüin shiiʼiree talatüinjanain naya atumawaa, anashijaʼa tajütünüle nümaʼanamüin ‹César›».
12 Nüsakiraka Festo na wayuu aküjakana nümüin tü anakat süpüla naaʼinrüin, süchikijee tia nümakalaka nümüin Pablo: «Cheechijaʼaya pia nümaʼanamüin ‹César›, jama puchuntuichipain oʼunaa nümaʼanamüin».
13 Maʼaka jeʼra kaʼi süchikijee tia, nüntakalaka Cesareamüin Agripa, chi aluwataashikai. Antüsüjaʼaya Berenice nümaa, antüshii naya sünain asakaa Festo.
14 Süka eeinjatüin nakalia chaa Cesarea, nüküjakalaka Festo nüchiki Pablo nümüin Agripa, anuu nünüiki nümüin:
«Aniisa wanee wayuu püreesashi, nüpünala Félix.
15 Soʼu chajachin taya Jerusalén, naküjain tamüin na nekiipüʼükana na sacerdotekana jee müshiʼiya na laülaashiikana napüleerua na judíokana tü naainjalakat Pablo jee nachuntaka tamüin süsalainjachin nia naainjala tatuma.
16 Taküjakalaka namüin nnojoluin anain naashin na romanokana naapünüle ekii wanee wayuu namüin na alirajakana nia. Asakinnajachi palajana süchiirua tü makalü aaʼujee nia noʼupala na alirajakana nia.
17 Mayaashii nantüin na wayuukana eemaatüsü taaʼin, müshijeseʼe taikalaain waneemüin kaʼi saaʼu tü einasee naikalaapuʼukat aaʼu na laülaashiikana süpüla kasalajanainjatüin saainjala wayuu natuma. Tasaajiraka chi wayuukai süpüla nüntinnajachin tamüin.
18 Nayasaʼa na wayuu eʼitaakana naaʼu kaainjalain nia, naata neʼe tü kasa naküjakat nüchiki, nnojotsü neweetirüin süchiki tü naainjalakat taküjainruʼu.
19 Shia neʼe mojujiraaka aaʼujee naya naatain natuma nuʼwaajia chi namaleiwasekai otta mojujiraashii naya naaʼu wanee wayuu Jesús münüshi, katoʼuchi chia wayuukai naashin Pablo.
20 Süka isain tachiki akumajaa sukuwaʼipa tia mojujirawaakat, tasakirüin Pablo nuʼuneere Jerusalénmüin süpüla süsalainjachin nia atumawaa chamüin.
21 Achuntapejeʼe Pablo oʼunaʼairee eemüin ‹César›* jee nuchuntuin makatajachin nia püreesain waneʼereeya sütüjaanapa aaʼu tü naaʼinrajatkat ‹Augusto› nüka. Iraakalaka püreesain nia tatuma süpülaleʼeya tajütapa nia nümaʼanamüin ‹César›».
22 Anuujeseʼe nünüiki Agripa nümüin Festo: «Taapajee amüinrü nünüiki chi wayuukai». «Paapajeechi anüiki wattaʼa» nümakalaka Festo nümüin.
23 Waneemüin kaʼi, nüntakalaka Agripa sümaa Berenice, yaletayaasü maʼin naaʼin sünain antaa. Ekerotushiijeseʼe naya suluʼumüin tü miichi eere nüsakinnüin wanee wayuu süchiirua wanee kasa eekai naainjalain jee ekerotushii na sülaülashiikana surulaat namaʼaleeya na wayuu kojutukana atumawaa suluʼu tia pueulokot. Asaajinnüshijeseʼe Pablo nutuma Festo, nüntinnakalaka nümüin.
24 Anuujeseʼe nünüiki Festo: «Agripa, laülaashikalee otta müshiʼiya jiakana yaakana soʼukai, jiirakaa nümüin wayuukai chii. Napüshuaʼa na judíokana chaa Jerusalén jee müsia yaʼayaa nachuntuin tamüin nekiiseruʼu nuʼutunajachin aaʼin wayuukai chii.
25 Tayaawatapejeʼe saaʼu nnojoluin kasain naainjalain wayuukai chii outajachikalü aaʼujee nia. Nuchuntapa tamüin oʼunaʼairee eemüin Augusto, tajüteekalaka nia chamüin.
26 Nnojotpejeʼe kasain tashajüinjatüin nüchiki nümüin ‹César›, chi laülaashikai taaʼu. Tasaajirüinjeseʼe nia jümüin jee pümüin piakai Agripa, laülaashikalee süpüla püsakiijüinjachin nia, tatüjaweetkalaka saaʼu tü tashajüinjatkat nüchiki.
27 Nnojotsüleʼe müin anakai saaʼin tamüin tajütüinjachin wanee wayuu püreesashi sümaa nnojoluin taküjain kasain püreesain aaʼujee nia».
Noota
^ Pünaʼla tia suluʼu tü kanüliakat «Jamaluʼulu pütchikat».
