Naʼyataain na Aluwataaushikana 27:1-44
27 Nüküjaka Festo wajütünajanain suluʼu anuwa chaa Italiamüin. Ajütünüshijeseʼe Pablo otta waneinnua püreesashii nümaa wanee sülaüla surulaat kanüliashi Julio, naʼakajachi nia na surulaat kanüliakana Augusto.
2 Woʼotooko suluʼu wanee anuwa chejeʼewat suluʼu tü mmakat Adramitio. Yapajüsü süpüla oʼunaa tia anuwakat eemüin waneirua soʼonule anuwa chaa sotpünaa tü mmakat Asia,* oʼunushiijeseʼe waya suluʼu. Eejachia wamaa wanee wayuu kanüliashi Aristarco, chejeʼewai suluʼu tü pueulokot Tesalónica, tü chakat suluʼu tü mmakat Macedonia.
3 Waneemüin kaʼi woʼotoko chaa Sidónmüin, kamaneekalaka Julio nümüin Pablo jee nuuʼulaaka nuwaraijaain naaʼu na nütünajunnuukana jee nükaalinjünajachin natuma.
4 Oʼunushiijeseʼe waya chejee. Walataka süʼütpünaa tü mmakat Chipre suulia jamajüin waya sutuma tü joutaikat, jama wapanapajeein shia.
5 Anuwaluʼukalaka waya pasanainpünaa sünain palaakat, walataka süʼütpünaa Cilicia jee süʼütpünaa Panfilia. Wantapünaaka eemüin tü pueulo kanüliakat Mira, tü chakat Licia.
6 Shiasaʼa chayaa, nünta anainrü chi sülaülashikai surulaat wanee anuwa chejeʼewat Alejandría, chaʼwat Italiamüin, noʼoteʼerüinjeseʼe waya suluʼumüin.
7 Kakaliaka anuwaluʼuin waya, wantaka eemüin tü mmakat Cnido mayaapejeʼe kapüleein wamüin antaa chamüin. Walataka süʼütpünaa tü mmakat Creta suulia jamajüin waya sutuma tü joutaikat, jama wapanapajeein shia jee walataka süʼütpünaa tü mmakat Salmone.
8 Woʼunakalaka sotpünaa tia palaakat mayaainjeʼe kapüleein shia wamüin, wantakalaka suluʼumüin tü mma kanüliakat Bellos Puertos, pejesü tia mmakat sünain tü pueulo kanüliakat Lasea.
9 Kakaliaka waya chayaa jee mojushiikalaka oʼunaa suluʼu anuwa. Tia süchikijeejatü tü Kaʼi Alatinnakalü oʼu Naainjala na Israelitakana. Anuukalaka nünüiki Pablo namüin na wayuukana:
10 «Waʼlemuñuwaa, mojusüsa saaʼin tamüin oʼunaa, eesü amülouijeerüle süchise tü anuwakat, shiale eewaain tü anuwakat jee wayalejeʼeya outuin».
11 Nnojoipejeʼe jaa müin chi sülaülashikai surulaat sümüin nünüiki Pablo, nia neʼe jaa nümaka amüin chi suchupeetsekai tü anuwakat jee müshia nümüin chi kaʼanuwainshikai.
12 Süka nnojoluin anain tü soʼonulekat anuwa süpüla yalainjanain waya juyapoʼu, paaʼinwaka na wayuukana sünain aküjaa wooʼulaküinjanain woʼunuin chaa Fenicemüin, soʼonule anuwa tia makat chaa Creta. Kaanüküsü tü palaakat chayaa, wanee saʼata palaamüin wüinpümüinruʼu saaʼin otta tü wane saʼatakat uuchumüinsü wüinpümüinruʼu saaʼin. Wasaʼwateein tia mmakat shiiʼiree juyapoʼuluin waaʼu chamüin.
13 Nainküinjatiaa naaʼinruʼu tü namakat süka suwawalüin jiatta wanee joutai uuchejeekuat. Nayuʼluinjeseʼe tü karapinkat shirokujee tü palaakat jee noʼunirakalaka tü anuwakat sotpünaa tü palaakat, süʼütpünaa tü mmakat Creta.
14 Eejaʼalaa sümakalaka wanee joutai katchinsü maʼin, euroaquilón münüsü.
15 Sajarattünaka neʼe tü anuwakat sutuma tü joutaikat. Isasü wachiki chain watuma shiʼichi tü anuwakat süpanapejee tü joutaikat, wooʼulaaka neʼe sülüʼüjain shia tü joutaikat wamaa.
16 Walataka süʼütpünaa wanee mma joʼuuchon suulia jamajüin waya sutuma tü joutaikat. Pasanainsü sünain palaa tia mmakat, Cauda sünülia. Wainmapejeʼe wamüliala sümaa tü anuwachon kapükat süchiiruajee tü anuwakat.
17 Soʼotünaka tü anuwachonkot, süchikijee tia sükaülajünaka tü anuwakat suupünaapünaa, nasiwatüinjeseʼe süpüshi süülaja tü uniakat süpüla namoulirüin shia, jama mmoluin naya seema sütükaʼalaain tü anuwakat sünain tü jasai kanüliakat Sirte. Nooʼulaakalaka unatüin neʼe tü anuwakat.
18 Waneemüin kaʼi ayatüsia aʼyaatuuin maʼin tü anuwakat sutuma tü joutaikat, müsüjeseʼe sujutünüin süpüshi tü chisoouikat shirokumüin tü palaakat süpüla jamaamainjatüin tü anuwakat.
19 Apünüinpa kaʼi waya, sujunnakalaka tü jiiku saalajasükat tü uniakat.
20 Eepa wakalia sümaa nnojolin weʼrüin chi kaʼikai jee nnojoluin weʼrüin tü shüliwalakat sümaa shiʼyaatuuin maʼin tü anuwakat sutuma tü joutaikat, wayaawataka saaʼu nnojoleenain walatüin süchikumüin tia.
21 Eesü nakalia na wayuu sulujunakana tü anuwakat sümaa meküin naya, ashaʼwalaashijeseʼe Pablo pasanain nanain jee nümakalaka namüin: «Waʼlemuñuwaa, jaapaatüjürülejeʼeya sümaa tanüiki jee nnojoliirejeʼe wojuʼitüin chejee Creta nnojoishiije waya eʼrüin wamüliala otta nnojotsüjeʼe wojutuin süchise tü anuwakat shirokumüin tü palaakat.
22 Shia anaka aluʼu yalayarüle jaaʼin. Nnojoleechi eein wanee wayuu eekai outuin jaʼakajee, shieerü amülouikat neʼe tü anuwakat.
23 Eeʼiyalaashi tamüin aipaʼainka wanee aapiee nümaʼanajeejachi chi Maleiwa taʼwaajakai jee taʼyataakai amüin.
24 Anuu nünüiki tamüin: ‹Nnojo mmoluin pia Pablo, antajachiaʼaya neʼe pia nümaʼanamüin «César», kateechi oʼu pia nutuma Maleiwa jee kateena oʼu nutuma na wayuu yaakana pümaa suluʼu tü anuwakat›.
25 Waʼlemuñuwaa, shiakalaka anain aluʼu yalayarüle jaaʼin. Anoujashi taya nünain Maleiwa, tatüjaakalaka saaʼu sülateerüinjaʼaya tü nümakat tamüin.
26 Asaichijaweetpejeʼe tü anuwakat wamaa sotpaʼa wanee mma pasanainka sünain palaa».
27 Polooka pienchimüin ai waya sünain yalejewaain wamüin shirokupünaa tü palaa kanüliakat Adria. Shiasaʼa süseʼeruʼu aikat nayaawataka saaʼu na anuwapuʼukana pejein waya sünain sot tü palaakat.
28 Nooʼulaküinjeseʼe oʼutule tü palaakat, eekalaka piama shikii braza* wünapümüin. Noʼuniraka tü anuwakat mamüin aka tüsa jee nooʼulakaka süchikuaʼa oʼutule tü palaakat, eekalaka poloo jaʼralimüin braza* wünapümüin.
29 Süshakatinnaka pienchisü karapin shirokumüin tü palaakat yala süchiiruajee tü anuwakat, jama mmoluin na wayuukana seema soʼonoojoʼolüin tü anuwakat saaʼu tü ipakat. Suchuntaaka maʼin naaʼin niweetamaatüin chi kaʼikai.
30 Naʼluwataweeka na anuwapuʼukana, nashakatirüinjeseʼe tü anuwachonkot sümaa naküjayaain nasiwatüinjatüin süülaja tü karapinkat chaa shiʼichinainjee tü anuwakat.
31 Anuujeseʼe nünüiki Pablo nümüin chi sülaülashikai surulaat jee namüin na surulaatkana: «Nnojoliire makatüin nala wayuukana suluʼu tü anuwakat, nnojoleerü katüin joʼu».
32 Noʼyotooko na surulaatkana süpü tü anuwachonkot, nojutitkalaka shia shirokumüin tü palaakat.
33 Shiasaʼa süpülatuʼu suwasajaain aikat, naashajaakalaka Pablo namaa na wayuukana süpüla neküinjanain, anuukalaka nünüiki namüin: «Polooinna maʼin pienchimüin kaʼi jia sünain jaʼatapüin süntajatüin wayuu sünain akaalinjaa jia jee meküinsalii jia soʼunnaa tia.
34 Shiakalaka anain jiküle wanee kasa, aneena jia sutuma tia, süka jamüin, nnojoleechi eein wanee wayuu eekai jamajüin jaʼakajee».
35 Süchikijee nüküjain tia, naapaakalaka wanee pan noʼupala napüshuaʼa na wayuukana, naapaka analuʼut nümüin Maleiwa saaʼu, nüshaletakalaka shia sümaa niküin shia.
36 Atütülaasüjeseʼe naaʼin na wayuukana, nekayaa namakalaka.
37 Eeshii waya wapüshuaʼa 276 suluʼu tü anuwakat.
38 Emirapa na wayuukana, nojutakalaka tü trigokot shirokumüin tü palaakat süpüla jamaamainjatüin tü anuwakat.
39 Suwasajaapa aikat, nnojotkalaka nayaawatüin tü mma eejanale naya, neʼrapajeʼe wanee saanükü palaa, anashiikalaka namüin noʼunirüin tü anuwakat chaa eemüin tü sotkat palaa.
40 Noʼyotooinjeseʼe süpü tü karapinkat jee nooʼulaaka sujutuuin shirokumüin tü palaakat, nasiwatakalaka tü ojununtiakat sunut tü anuwakat sümaa neeruluin tü uniakat süpanapejee tü joutaikat, suʼunakalaka tü anuwakat namaa sotpaʼamüin tü palaakat.
41 Sütükaaka tü anuwakat namaa sünain wanee jasai shiinaluʼusü tü palaakat, kettaleeka shiʼichi tü anuwakat sünain tü jasaikat, jimataka neʼe yalaʼaya shia. Shiapejeʼe asaichijaain süsi tü anuwakat sutuma shiʼyaatuuin maʼin sutuma tü palaakat.
42 Nayasaʼa na surulaatkana, noʼuteekalaka naaʼin na püreesashiikana suulia nuʼluwanajüin waneeshia naʼakajee shirokupünaa tü palaakat.
43 Kateepejeʼe noʼu Pablo nutuma chi sülaülakai surulaat, nnojotkalaka nuuʼulaain noʼutunuin aaʼin na püreesashiikana. Nayaka nuluwataain na atüjakana katünaa shirokupünaa tü palaakat süpüla nantajanain palajana chaa sotpaʼamüin.
44 Jee müshiʼiya na waneinnua, oʼunajana saaʼu tapüla jee saaʼu wanee kasa eekai sujutuuin suluʼujee tü anuwakat. Nantakalaka napüshuaʼa süka anaka akuwaʼipa chaa sotpaʼamüin tü palaakat.
Noota
^ Pünaʼla tia suluʼu tü kanüliakat «Jamaluʼulu pütchikat».
^ Jee shiale «tüna». Eesü maʼaka saaʼin 36 metro. Pünaʼla tia suluʼu tü kanüliakat «Sooʼomüin pütchi B14».
^ Alatüsü tia suulia 27 metro. Pünaʼla tia suluʼu tü kanüliakat «Sooʼomüin pütchi B14».
