Naʼyataain na Aluwataaushikana 28:1-31
28 Wantapa wapüshuaʼa süka anakalü akuwaʼipa sotpaʼamüin palaakat, süküjünakalaka wamüin Maltain sünülia tü mma woʼotokalü aluʼumüin, pasanainsü shia sünain palaa.
2 Amülialaasü naaʼin waalin na wayuu chajanakana suluʼu tia mmakat. Kamaneeshii maʼin naya wamüin müsüjeseʼe nachuwajaain wanee siki, jama süʼitüin maʼin tü juyakat sümaa alin maʼin tü jemiaikat.
3 Nukolochojoko Pablo sütüna wunuʼu sümaa nujutuin shia soʼu sikikat, sujuʼitakalaka wanee wüi yalejee sutuma saaʼayula sikikat, sükacheraaka sünain najapü Pablo.
4 Neʼraiwaʼaya na wayuu nepiajanakana sükacheraain tü wüi outasiroʼukat sünain najapü Pablo, namajiraakalaka: «Wayuukai chii oʼunui saaʼin wayuu, mayaapejeʼe nnojoluin wüinsirüin nia, outajachia neʼe sutuma tü maleiwa kasalajanakalü* atuma saainjala wayuu».
5 Noʼotojooko najapü Pablo jee sujutuukalaka tü wüikat soʼu sikikat, nnojoipejeʼe jamajawalain nia sutuma.
6 Naʼatapajaka na wayuukana nushushujunuin Pablo jee outuinjachin nia. Shiasaʼa mapa maʼin nnojotkalaka kasain alatüin nümüin. Naataitpaka neʼe tü kasa naküjakat nüchiki Pablo, maleiwayaakalaka nia naaʼinruʼu.
7 Peje sünain eejanale waya, kepiashi wanee wayuu kojutushi maʼin nia atumawaa, Publio nünülia, kamaneeshi maʼin nia wamüin jee makatüshii waya nipialuʼu soʼu apünüin kaʼi.
8 Juʼletaka neʼe chi nüshikai Publio sutuma tuttaa* sümaa niʼiijain maüi. Nikerotokoloko Pablo eejachire nia jee süchikijee niʼitaain najapü jee nuʼuraajüin naaʼu naawalaakalaka.
9 Nayasaʼa na wayuu chajanakana suluʼu tia mmakat, na eekai ayuulin, oʼunushii eemüin Pablo naawaleʼerakalaka naya.
10 Kojutushii waya namüin naya wayuukana müsüjeseʼe nasülajüin wamüin wainma kasa jee wanaa sümaa woʼunajanain naapüin wamüin tü kasa choʼujaakat wamüin.
11 Süchikijee chajanain waya apünüin kashi suluʼu tia mmakat, woʼunakalaka suluʼu wanee anuwa jee sünain shiʼichi tia anuwakat eejatü nayaakua na nuchonniikana Zeus. Chejeʼewat tia anuwakat suluʼujee tü mmakat Alejandría jee oʼotopünaasü shia suluʼu tü mma eejanale waya, jama juyapoʼujatüin soʼu tia.
12 Wantakalaka suluʼumüin tü mmakat Siracusa eejanale makatüin waya apünüin kaʼi.
13 Woʼunakalaka yalejee jee wantaka suluʼumüin tü mmakat Regio. Wanee kaʼi süchikijee tia, suwawatkalaka wanee joutai uuchejeekuat, wantüinnakalaka suluʼumüin tü mmakat Puteoli piama kaʼi süchikijee tia.
14 Wantiraaka namaa waneinnua wawalayuu chajanakana suluʼu tia mmakat, nachuntakalaka maʼin wamüin makatajanain waya namaa soʼu akaratshi kaʼi. Jee süchikijee tia woʼunakalaka Romamüin.
15 Naapapa na wawalayuukana süchiki wopuluʼuin waya, napanapaka waya. Eeshii na antakana eemüin tü kanüliakat Plaza del Mercado de Apio jee eeshii na antakana eemüin tü kanüliakat Tres Tabernas. Naapakalaka Pablo analuʼulu nümüin Maleiwa niʼraiwaʼaya na wawalayuukana jee sütütülaakalaka naaʼin.
16 Wantapa Romamüin, kepiakalaka Pablo nümüiwaʼa suluʼu wanee miichi jee waneeshia neʼe chi surulaat eʼrajakai naaʼu.
17 Apünüin kaʼi süchikijee tia, neenajirakalaka Pablo na judío kojutukana atumawaa, nümakalaka namüin jutkatapa naya napüshuaʼa: «Tawalayuwaa, nnojoishi taya kaainjalain namüin na judíokana jee nnojotsü mojutuin tamüin tü nakuwaʼipapalakat na watuushinuukana, aapünapejeʼe tekii natuma na wayuu chajanakana Jerusalén süpüla püreesainjachin taya natuma na romanokana.
18 Süchikijee nasakirüin taya, najüteekalaka tachiki, jama nnojoluin eein wanee kasa outajachika anainjee taya.
19 Mojushiipejeʼe namüin na judíokana tajütünüinjachin achiki, achuntushijeseʼe taya oʼunaa nümaʼanamüin ‹César›, nnojotpejeʼe taaʼinrüin tia süpüla mojuinjatüin tanüiki nachiki na wayuu toumainpaʼajeʼewaliikana.
20 Müshiijeseʼe teenajirüin jia süpüla taashajaainjanain jümaa, jama kapüin taya kaleena süka tanoujain sünain tü kasa naʼatapajakat na israelitakana».
21 Anuujeseʼe nanüiki nümüin: «Nnojotsü aluwataanüin wamüin karaloʼuta püchikimaajatü chejee Judeajee. Jaʼitakajaʼa na wawalayuu antakana yaamüin, nnojotsü jamüin nanüiki püchiki jee nnojotsü mojuin nanüiki püchiki.
22 Anapejeʼe saaʼin wamüin waapajüle pünüiki, jama mojuin maʼin pütchi süchiki türa sukuwaʼipakat anoujaa puʼunakalü achiirua».
23 Yaawaka maʼin natuma tü kaʼi noʼunajanakalü oʼu nümaʼanamüin Pablo, wattakalaka naalii na wayuu antakana nümaʼanamüin. Nüküjaka pütchi namüin wattaʼajee maalü sünainmüinreʼeya aliika süchiki süpüshuaʼa tü pütchi aashajaakat süchiki nuluwataainjachin chi Maleiwakai. Naainjain tia shiiʼiree nanoujainjanain nünain Jesús jee shia nikirajaka anain naya tü Pütchi Aapünakat nümüin Moisés* jee tü namakat na Nünüikimaajanakana Maleiwa.
24 Eeshii na wayuu anoujakana sünain tü nümakat Pablo, eepejeʼe na ayoutakana shia.
25 Oʼunayaa müshiijeseʼe naya, jama nnojoluin paaʼinwain naya sünain tia. Anuujeseʼe nünüiki Pablo namüin:
«Shiajaʼa nümaka Maleiwa sükajee tü nüpülainkat namüin na jutuushinuukana tü pütchi nümakalü Isaías, chi nünüikimaajachikai Maleiwa
26 sünain maa: ‹Puʼuna eemüin wayuukana naainnua jee püma namüin: «Nnojoleerü kasain jiyaawatüin aaʼu mayaainjeʼe kacheʼein jia, nnojoleerü kasain jiʼrüin mayaainjeʼe koʼuin jia.
27 Wayuu iche aaʼinchii jia, jüsürülüin tü jücheʼekat sümaa tü joʼukot süpüla nnojoluinjatüin jiʼrüin wanee kasa, süpüla nnojoluinjatüin jaapüin shia, süpüla nnojoluinjatüin jiyaawatüin saaʼu jee süpüla nnojoliinjanain jüleʼejüin nünainmüin Maleiwa shiiʼiree anainjanain jia tatuma»›.
28 Anasü jütüjaale saaʼu süküjinnüitpain tü pütchi nümaʼanajeejatkat Maleiwa namüin na wayuu nnojoliikana judíoin, tü oʼtteʼereenakat naya. Naapaajeerü amaa tia pütchikat».
29 *
30 Kepiakalaka Pablo piama juya suluʼu tü miichi aʼanapajuushikat nüpüla, kamaneeshi nia namüin na wayuu awaraijaakana naaʼu.
31 Aküjashi nia pütchi namüin süchiki nuluwataainjachin Maleiwa jee nikirajüin naya nüchiki chi Señotkai Jesucristo sümaa yalayalain maʼin naaʼin, nnojotsü eein wanee kasa ataʼülaka nukuwaʼipa suulia tia.
Noota
^ «Díkē» maluʼulu tia suluʼu griego.
^ Jee shiale «poloonaa, oushuwaa, aapuwaa».
^ Pünaʼla tia suluʼu tü kanüliakat «Jamaluʼulu pütchikat».
^ Ashajünüsü wetsiikulokot tüü suluʼu waneirua Biblia, nnojotpejeʼe shia eʼitaanüin suluʼu waneirua karaloʼuta sümaiwajatü ashajuushikat suluʼu griego. Pünaʼla tia suluʼu tü kanüliakat «Sooʼomüin pütchi A3».
