Naʼyataain na Aluwataaushikana 4:1-37
-
Ataʼünnüshi Pedro nümaa Juan (1-4)
-
Eetaashii maʼaka naaʼin 5.000 tooloyuu anoujakana (4)
-
-
Asakiijünüshi Pedro nümaa Juan natuma na sulujunakana tü kanüliakat Sanedrín (5-22)
-
«Nnojoliireejaʼa süpüla wooʼulaainjanain suulia aashajawaa» (20)
-
-
Achuntushii kaalinwaa na nikirajüinkana Jesús süpüla yalayalain naaʼin (23-31)
-
Napaajiraain na nikirajüinkana Jesús tü kasa namaʼanakat (32-37)
4 Yalaiwaʼaya Pedro nümaa Juan sünain aashajawaa namaa na wayuukana, narütkaakalaka na sacerdotekana nanainmüin nümaʼaleeya chi sülaülajanakai tü aʼwaajüleekat otta müshiʼiya na saduceokana.
2 Jashichishii naya süka nekirajüin wayuu na aluwataaushikana jee naküjain sümüin wayuu nüsoʼireʼennüin aaʼin Jesús.
3 Nütaʼünakalaka Pedro nümaa Juan, motsosü kaʼikat soʼu tia, nasürünnaka waneemüinreeya kaʼi.
4 Anoujayaa mapajeʼe na wayuu wattakana naalii aapajakana tü pütchikat, eetaashii maʼaka naaʼin 5.000 tooloyuu.
5 Waneemüin kaʼi noutkajaakalaka chaa Jerusalén na aluwataashiikana. Eejana na laülaashiikana namaʼaleeya na karaloʼutamaajanakana.
6 Eejachijaʼaya Anás, chi nekiipüʼükai na sacerdotekana jee eejachi Caifás, Juan, Alejandro jee müshiʼiya napüshuaʼa na kasayuukana nünain nekiipüʼü na sacerdotekana.
7 Nüshaʼwaleʼennakalaka Pedro nümaa Juan pasanain nanain jee nasakinnaka natuma: «¿Jarai aapaka laülawaa jümüin süpüla jaaʼinrüin tia?».
8 Niasaʼa Pedro, süka eein tü nüpülainkat Maleiwa naaʼu, nümakalaka:
«Jia aluwataashiikana jümaʼaleeya jiakana laülaashiikana,
9 jüsakirülejeʼeya waya soʼukai süchiirua wanee kasa anasü waaʼinraka nüpüleerua chi wayuu masaʼasaikai jee jütüjaweerejeʼe saaʼu jaralin anain atuma nia,
10 jütüjaʼaleeya saaʼu jüpüshuaʼa jiakana namaʼaleeya napüshuaʼa na wayuu yaakana Israel, anain nia saaʼu nünülia Jesucristo chi Nazaretjeʼewaikai, chi wayuu jükacherakai sünain wanee wunuʼu, chi anii joo nüsoʼireʼerüin aaʼin Maleiwa süchikijee outaa. Nükajee Jesucristo anaichipa wayuukai chii.
11 Jesús müshi aka saaʼin tü ipa jiyoutakat. Jiakana müshii aka naaʼin na akumajüliikana miichi, mojutusai nia jutuma, mapejeʼe nia maʼaka saaʼin tü ipa choʼujaakat maʼin.
12 Jee nnojoishi eein wanee wayuu yaa mmapaʼa aapünakai amüin laülawaa nutuma Maleiwa kanoulainjanaka anain waya süpüla woʼtteʼennajanain».
13 Neʼrapa na aluwataashiikana namaa na laülaashiikana yalayalain naaʼin Pedro otta müshia Juan, nayaawatakalaka saaʼu wayuuin neʼe naya jee nnojoluin natüjain maʼin sünüiki karaloʼuta, ponoko maʼin naya naaʼin. Nayaawataka saaʼu nümaatalapuʼuin naya Jesús.
14 Nnojotkalaka jamüin nanüiki namüin, jama eejachin namaa chi wayuu naawaleʼerakai.
15 Nojuʼitinnakalaka na apünüinshiikana wayuu suluʼujee tü kanüliakat Sanedrín, shiasaʼa nachikiruʼu naashajaajiraakalaka na laülaashiikana namaa na aluwataashiikana.
16 Majiraashii naya: «¿Kasa waaʼinrajatka naka na wayuukana? Sütüjaa aaʼulu wayuu maʼleekalia yaa Jerusalén naaʼinrüin kasa pülasü nala wayuukana. Nnojotsü süpüla wounjulajüin süchiki tia.
17 Suulia suʼwalakajaain tia saʼakapünaa wayuu, anakajaʼa weimmolojule naya jee wapülaja noulia nnojoliinjanain naashajaain sümaa wayuu nüchiki chia wayuukai».
18 Neenajünakalaka nachikuaʼa jee süpülajünakalaka noulia naashajaain sümaa wayuu nüchiki Jesús jee nekirajüin nüchiki.
19 Nusoutakalaka Pedro nümaa Juan namüin: «Jiajaʼa atüjaaka saaʼu jiakana analejeʼeya nümüin Maleiwa woonooin sümaa jünüiki suulialeʼeya woonooin sümaa nünüiki niakai.
20 Eekajasaʼa wayakana nnojoliireejaʼa süpüla wooʼulaainjanain suulia aashajawaa süchiki tü kasa weʼrakat otta tü waapakalü achiki».
21 Neimmolojoko naya nachikuaʼa jee süchikijee tia, najütirakalaka nachiki, süka nnojoluin eein wanee kasa jamajüinjanaka aaʼujee naya natuma jee mmotshii naya neema na wayuukana, jama suʼwaajüin Maleiwa wayuu maʼleekalia saaʼujee tü kasa alatakat.
22 Alatüsü suulia pienchi shikii juya nuuyase chi wayuu aaʼinnakai apüleerua kasa pülasü.
23 Süchikijee najütünüin achiki, noʼunakalaka eemüin na wane nikirajüinkana Jesús. Naküjakalaka süchiki tü namakat nekiipüʼü na sacerdotekana jee nanüiki na laülaashiikana.
24 Naapaiwaʼaya tia, noʼuraajakalaka napüshuaʼa nümüin Maleiwa sünain maa:
«Señotkai, Laülaashikai saaʼu kasa süpüshuaʼa, pia kakumalakai tü sirumatuʼukat sümaa süpüshuaʼa tü kasa eekat chaa iipünaa, tü mmakat sümaa tü kasa eekat süpaʼa otta tü palaakat sümaa tü kasa eekat shiroku.
25 Pia chi aapakai püpülain süpüla müinjatüin nünüiki chi watuushikai David, chi aʼyataapuʼukai pümüin: ‹¿Jamüshii naashichijaaka na wayuu sainküinkana mma? ¿Jamüsü süsakireʼeraka saaʼin wayuu süpüshuaʼa sünain kasa nnojotka kasain anain apüla?
26 Yapajüshii süpüla atkawaa na sülaülakana mma jee müshiʼiya na aluwataashiikana, outkajaashii nooʼomüin Jehová* jee nooʼomüin chi nüneekalakai›.
27 Shiajaʼaya alataka tia. Jamüshijaʼa Herodes nümaa Poncio Pilato namaʼaleeya na wayuu sainküinjeejanakana mma jee müshiʼiya na wayuu yaajanakana Israel, paaʼinwashii naya suluʼu mmakat tüü nikiira Jesús, chi püchepchia akatannakai pümüin, chi püneekajalakai.
28 Outkajaashii naya süpüla naaʼinrüinjatüin tü püküjatüjütkalia achiki paala. Alatüsü tia süka pülashinjaʼaya maʼin pia jee wanaapünaasü shia sümaa tü kasa püchekakat.
29 Jehovákalee,* jülüjataa paaʼin nanüiki sünain eimmolojoo waya jee pükaalinja waya püchepchiakana süpüla yalayalain waaʼin sünain aküjaa tü pünüikikat.
30 Sükajee püpülain, anasü putuma wayuu eekai ayuulin jee aaʼinrüshi pia kasa pülasü maʼin saaʼu nünülia Jesús, chi püchepchia akatannakai pümüin».
31 Mayaasü keraain nanüiki sünain achuntaa maʼin nümüin Maleiwa, sukutkujaakalaka tü miichi eejanale naya jutkatüin. Süntakalaka naaʼumüin napüshuaʼa tü nüpülainkat Maleiwa jee yalayalaka naaʼin sünain aküjaa tü nünüikikat Maleiwa.
32 Paaʼinwashii maʼin na anoujashiikana, nnojoishi eein wanee eekai jeʼiyein saaʼu tü kasa nümaʼanakat. Napaajiraain süpüshuaʼa tü kasa namaʼanakat.
33 Ayatakalaka na aluwataaushikana naküjain süsoʼireʼennüin naaʼin chi Señotkai Jesús, naküjain tia sümaa yalayalain naaʼin. Neʼrakalaka kasa anasü napüshuaʼa saaʼujee kamaneein chi Maleiwakai namüin.
34 Nnojoishi eein wanee wayuu eekai müliain naʼaka, süka jamüin, na eekai koumain jee na eekai kepiain, noiküin shia. Neʼikajaa namüsia tü süliakat
35 namüin na aluwataaushikana. Eitajüna müsüjaʼa shia wanaapünaa sümaa tü choʼujaakat namüin na wayuukana.
36 Eejachikalaka wanee wayuu nülüin Leví kanüliashi José, chejeʼewai nia Chipre. Bernabé, münüshi nia natuma na aluwataaushikana, «amüliajüi wayuu» maluʼulu tia.
37 Nuiküin wanee mma eejatkat nümaʼana. Niʼikajaakalaka tü süliakat namüin na aluwataaushikana.
Noota
^ Pünaʼla tia suluʼu tü kanüliakat «Sooʼomüin pütchi A5».
^ Pünaʼla tia suluʼu tü kanüliakat «Sooʼomüin pütchi A5».
