Naʼyataain na Aluwataaushikana 7:1-60
7 Anuujeseʼe nünüiki chi laülaashikai napüleerua na sacerdotekana nümüin Esteban: «¿Shiimainchejeʼe tü naküjakat nala wayuukana püchiki?».
2 Anuujeseʼe nünüiki Esteban: «Tawalayuwaa jee jiakana laülaashiikana, jaapaja tanüiki. Chi Maleiwa Miyoʼushikai, eeʼiyalaashi nia nümüin chi watuushikai Abrahán wanaa sümaa nuʼunuin chaa Mesopotamiamüin süpülapünaa nukolojooin chaa Haránmüin.
3 Anuujeseʼe nünüiki Maleiwa nümüin: ‹Puʼuna suluʼujee puumain, puʼuna namaʼanajee na kasayuukana pünain, puʼuna suluʼumüin tü mma teeʼiyatüinjatkat pümüin›.
4 Nukolojookalaka suluʼujee noumain na caldeokana, nüntakalaka suluʼumüin tü mmakat Harán. Jee süchikijee outuin chi nüshikai, nuluwataain nia Maleiwa suluʼumüin mmakat tüü, tü kepiakalü aluʼu jia maaʼulu.
5 Nnojoishi nia eʼipünaain wanee kasa nüpüla, nnojotsü naapüin nümüin wanee saʼatayaakaije mma. Nüküjapejeʼe nümüin nuumainjeerüin shia jee sülateerüin namüin na nüikeyuukana, mayaapejeʼe nnojoluin kachooin Abrahán wanaa sümaa tia.
6 Jee nüküjain Maleiwa nümüin kepiainjanain na nüikeyuukana suluʼu wanee mma naatajatü, wanee mma nnojotka noumain. Piuunainjana naya atumawaa suluʼu tia mmakat otta müliainjana naya atumawaa soʼu 400 juya.
7 Anuukalaka nünüiki Maleiwa nümüin: ‹Süsaleena tatuma naainjala na wayuu kepiuunaseenakana naya›. Anuu sooʼomüin nünüiki Maleiwa: ‹Süchikijee tia, ojuʼiteena naya suluʼujee tia mmakat jee naʼwaajeechi taya suluʼu mmakat tüü›.
8 »Nüpansaajüin nünüiki Maleiwa nümaa Abrahán süchiki nüchoteʼerajatüin süta nükorolo* namaʼaleeya na nüchonniikana. Nia Isaac nüchonkai Abrahán jee nüchoteʼerüin süta nükorolo mekiisat kaʼi süchikijee joʼuuin nia jee müshia Isaac, nüshi Jacob. Niasaʼa Jacob, nashi na polookana piamamüin watuushinuu.
9 Aʼürülaanüshi José natuma na watuushinuukana. Noiküichika nia namüin na wayuu chejeʼewaliikana Egipto, nnojoipejeʼe nia nüpütawalain Maleiwa nümüiwaʼa.
10 Niyuʼlaka nia Maleiwa saʼakajee nümüliala. Naapakalaka kekiwaa nümüin jee nükaalinjain nia süpüla talatajachin Faraón nümaa, chi aluwataakai saaʼu Egipto. Nüneekakalaka nia süpüla aluwatawaa saaʼu Egipto jee niʼitaakalaka najapuluʼu tü kasa eekat nipialuʼu.
11 Eejaʼalaa sümakalaka wanee jamü sainküinpünaa tü mmakat Egipto jee müsia chaa Canaán. Eʼrüsü maʼin sümüliala wayuu jee müshiʼiya na watuushinuukana nnojotsü kasain nekajatiaain.
12 Naapakalaka Jacob süchiki eejatüin eküülü chaa Egipto, nuluwataainjeseʼe na watuushinuukana chai nakua. Shia palajatka nakua tia chamüin.
13 Piantuapa nakua chamüin, nüküjaka José namüin na nuwalayuukana jaralin nia. Saapünakalaka nutuma Faraón nachiki na nüpüshikana José.
14 Nuluwataakalaka nünüiki José süpüla nüntinnajachin chi nüshikai nümüin, chi kanüliakai Jacob. Antinnajachi nia nümüin suluʼujee tü mmakat Canaán namaʼaleeya na kasayuukana nünain, akaratshi shikii jaʼralimüin naya napüshuaʼa.
15 Nuʼunakalaka Jacob Egiptomüin, eemüinre outuin joo nia mapa, mataajaʼaya joo nakuwaʼipa na watuushinuukana.
16 Neʼikünaka suluʼumüin tü mmakat Siquem jee neʼitaanaka suluʼu naamaka Abrahán, tü niyaʼlajakat chaa Siquem saaʼu nneerü noulia na nüchonniikana Hamor.
17 »Sülüʼülaapa sükalia süpüla shikeraajüin tü nümakat Maleiwa paala nümüin Abrahán, akooʼomüinraashii na israelitakana jee wattakalaka naalii chaa Egipto.
18 Nüikalaakalaka sünain aluwatawaa chaa Egipto wanee aluwataai nnojoikai eʼraajüin José.
19 Niasaʼa chi aluwataashikai, nukumajaka sukuwaʼipa süpüla nümaʼülapalain na watuushinuukana, nüpüleeruaka naaʼin shiiʼiree napütajanain nachonnii süpüla outaa.
20 Wanaapünaa sümaa tia, joʼuushi Moisés, anachonshi maʼin chia joʼuukai. Nipijünakalaka soʼu apünüin kashi nipialuʼu chi nüshikai.
21 Napüleeruaanaka aaʼin na kachonniikana nia süpüla napütajachin nia. Naaʼinrapa tia, shipijakalaka nia tü nüchonkat Faraón maʼaka naaʼin wanee süchon.
22 Nikirajünaka Moisés sünain süpüshuaʼa tü kasa natüjakalü apüleerua na egiptojeʼewaliikana. Atüjashi nia süpüleerua nünüiki jee anasü maʼin tü kasa naaʼinrakat.
23 »Pienchipa shikii juya nuuyase Moisés nuʼunakalaka sünain anaʼlawaa namüin nuwalayuukana, na israelitakana.
24 Niʼraiwaʼaya Moisés müliain atumawaa wanee israelita, nuwataakalaka naalin jee nuʼutakalaka naaʼin chi egipcio müliakai atuma nia.
25 Eekajasaʼa naaʼinruʼu Moisés, nayaawatajatiaa aaʼu na nuwalayuukana nakaalinjünüin nutuma Maleiwa nükajee niakai, nnojotpejeʼe nayaawatüin saaʼu tia.
26 Waneemüin kaʼi, niʼrakalaka natkaain piamashii israelita. Nüchiaaka naya süpüla anajiraainjanain naya. Anuu nünüiki namüin: ‹Waʼlemuñuwaa, aashin pawalaawain jia. ¿Jamüshii jütkaakaʼa?›.
27 Niasaʼa chi wayuu müliakai atuma chi wane, nujununtaaka nooʼomüin Moisés jee nujutaka nüchiki sümaa nümüin nümüin: ‹¿Jarai eʼitaaka pia süpüla puluwataainjachin waaʼu? ¿Jarai aikaleʼeraka pia süpüla punoutuin wanee mojujirawaa waʼaka?
28 ¿Puʼutajaitaale aaʼin taya maʼaka puʼutuin naaʼin chi egipciokai soʼukalinka?›.
29 Naapaiwaʼaya tia Moisés, nuʼluwataakalaka suluʼumüin tü mmakat Madián. Piamashiikalaka nüchooin chamüin.
30 »Pienchi shikii juya süchikijee tia, niiʼiyalaaka wanee aapiee nümaʼanajeejachi Maleiwa nümüin Moisés chaa isashiipaʼa eekai tü uuchi kanüliakat Sinaí, eeʼiyalaashi chia aapieekai saʼaka suchuwala wanee wunuʼu keipüsesü, chuwatüsü maʼin.
31 Ponoko naaʼin Moisés tü kasa niʼrakat. Shiasaʼa nünaʼlaapa süpüla niʼrüinjatüin kasain maʼin wayuu tü niʼrakat, naapakalaka nünüiki Jehová* sünain maa:
32 ‹Taya chi Namaleiwasekai na putuushinuukana, chi Nümaleiwasekai Abrahán, Isaac otta Jacob›. Kutkuttaʼalaka neʼe Moisés, nnojoishi eirakaweein.
33 Anuukalaka nünüiki Jehová* nümüin: ‹Paakata tü pukoʼusüinkat* yaapa pia shaʼwatüin saaʼu mmakat tüü süka yaain taya saaʼu.
34 Shiimain sünain teʼrüin namüliala na tachonniikana, na israelitakana jee taapüin neʼira, müshijeseʼe tantüin süpüla tayuʼlajanain naya saʼakajee namüliala. Anakalaka piale tajütüin chaa Egiptomüin›.
35 Eekajasaʼa Moisés nia chi ayoutunakai achiki paala sutuma wayuu soʼu nümünüin amüin: ‹¿Jarai eʼitaaka pia süpüla puluwataainjachin waaʼu? ¿Jarai aikaleʼeraka pia süpüla punoutuin wanee mojujirawaa waʼaka?›. Niapejeʼeya neʼe ajütünüin Moisés nutuma Maleiwa süpüla niainjachin aluwataain jee süpüla niainjachin ayuʼluin na israelitakana saʼakajee namüliala. Ajütünüshi nia nükajee chi aapiee nümaʼanajeejachikai Maleiwa, chi eeʼiyalaakai nümüin saʼaka tü wunuʼu keipüsesükat.
36 Ayuʼnnushii na israelitakana nutuma Moisés sükajee naaʼinrüin kasa pülasü napüleerua chaa Egipto, chaa shiroku tü palaa Ishosükat jee müsia chaa isashiipaʼa soʼu pienchi shikii juya.
37 »Chi Moisés taküjakai achiki jümüin, nia chi makai anüiki namüin na israelitakana: ‹Nüneeküinjachi Maleiwa wanee wayuu nünüikimaainjachikai maʼaka taaʼin tayakai, nüneeküinjachi nia naʼakajee na juwalayuukana›.
38 Niaʼaya neʼe chi eejachikai namaa na israelitakana chayaa isashiipaʼa, nia chi chajachikai aashajaain nümaa chi aapieekai saaʼu tü uuchikat Sinaí otta nia chi eejachikajaʼaya namaa na watuushinuukana. Aküjashi Maleiwa nümüin wanee pütchi kaawainsü maʼin wapülajatü wapüshuaʼa wayakana.
39 Nnojoishii jaa müin na watuushinuukana nümüin. Nayoutajaa amaalü tü nüküjakat namüin otta chasü neʼe naaʼin na watuushinuukana chaa Egipto.
40 Müshiijeseʼe namüin nümüin Aarón: ‹Paainja wamüin shiyaakua kasa wamaleiwaseinjatka jee oʼunirajatka wakuwaʼipa, jama nnojoluin watüjaain saaʼu kasain alatüin nümüin Moisés, chi wayuu ayuʼlakai waya Egiptojee›.
41 Soʼu kaʼikat tia, nakumajakalaka na israelitakana niyaakua wanee paaʼachon namaleiwaseinjachika. Noʼutakalaka saaʼin mürüt nümüin süpüla naʼwaajüinjachin nia jee naainjakalaka wanee miʼiraa shikiira tia kasa nakumajakat.
42 Niyüülajakalaka naya Maleiwa jee nuuʼulaakalaka naʼwaajüinjatüin tü kasa akumajünakat chaa iipünaa, maʼaka süküjünüin suluʼu tü karaloʼuta nashajakat na Nünüikimaajanakana Maleiwa, tü makat mayaa: ‹Jiakana nüchonniikana Israel, ¿aashin nnojolin tayain jüsülajüin amüin wanee kasa jee juʼutuin amüin mürüt soʼu tü pienchikat shikii juya chajanakalü oʼu jia isashiipaʼa?
43 Jülüʼüjaakuʼu jümapuʼusü tü miichi nipiayaakat Moloc otta shiyaakua tü jolotsü niyaluʼuyaakat chi maleiwakai Refán, tü ayaakuaa jaainjakat süpüla juʼwaajüinjanain naya. Suluʼujee tia, tajünajaajeena jia chaa wattamüin sünain Babilonia›.
44 »Chaa isashiipaʼa, eeinjatü wanee miichi namaʼana na watuushinuukana ayaawatünakalü akajee eein chi Maleiwakai namaa. Saainjünakalajaʼaya tia miichikat wanaapünaa sümaa tü nümakat Maleiwa nümüin Moisés.
45 Süpütüükalaka tia miichikat napüla na watuushinuukana jee nalüʼüjakalaka tia miichikat nümaa Josué suluʼumüin tü mma noumainpuʼukat paala na wayuu nüjünajaakana Maleiwa napüleerua na watuushinuukana. Eejatü tia miichikat nükalioʼu David.
46 Talatakalaka naaʼin Maleiwa nümaa David. Nuchuntuinjeseʼe David nukumajüinjatüin wanee miichi nipiainjatkat chi Nümaleiwasekai Jacob.
47 Niapejeʼe akumajüin Salomón tia miichikat.
48 Eekajasaʼa chi Maleiwa Miyoʼushikai nnojoishi kepiain suluʼu miichi sukumala wayuu. Pansaasü tia wanaapünaa sümaa tü nümakat chi nünüikimaajachikai Maleiwa wanaa sümaa nümüin mayaa:
49 ‹Anuu nünüiki Jehová:* «Tü sirumatuʼukat shia tü teinasekat sünain aluwatawaa otta tü mmakat shia tooʼuipalajanaka. ¿Jeʼtsü maʼin tü miichi jaainjainjatkat tapüla? ¿Jalasü maʼin tü miichi teemeraayainjatkat?
50 ¿Aashin tayayaain kakumalain kasa süpüshuaʼa?»›.
51 »Wayuu iche aaʼinchii jia, nnojoishii jia aapaweein sümaa pütchi, macheʼesalii jia. Nnojotsü jaaʼinreein tü nümakat Maleiwa sükajee tü nüpülainkat, shia neʼe jüshataka nakuwaʼipa na jutuushinuukana.
52 Müliashii natuma na jutuushinuukana napüshuaʼa na nünüikimaajanakana Maleiwa. Noʼuta aaʼinchii napüshuaʼa na wayuu aküjakana nüntajachin chi wayuu lotokoi akuwaʼipa, chi wayuu jaapakai ekii, chi juʼutakai aaʼin.
53 Aashin aapünayaain jümüin tü Pütchi Aapünakat nümüin Moisés, tü naküjakat na aapiee nümaʼanajeejanakana Maleiwa, nnojotpejeʼe jaapaain sümaa tia pütchikat».
54 Naapapa na wayuukana tia pütchikat, naashichijaakalaka jee nawataweekalaka maʼin nooʼomüin Esteban.
55 Niirakaaka Esteban chaa sirumatuʼumüin, niʼrakalaka Maleiwa sümaa jorottuin maʼin nia jee müshia Jesús yaa nikialuʼujee Maleiwa. Niʼrüin tia süka eejatüin tü nüpülainkat Maleiwa naaʼu.
56 Anuujeseʼe nünüiki Esteban: «Teʼrüin tü sirumatuʼukat müinmaʼa yaa jutatüin otta müshia chi Süchonkai Wayuu* shaʼwatüshi nikialuʼujee Maleiwa».
57 Nasürütkalaka nacheʼe suulia naapüin tü nümakalü Esteban, emetutkalaka maʼin nekiisa sümaa nawataain nooʼomüin Esteban.
58 Süchikijee nayuʼluin nia suluʼujee tü pueulokot, naʼinaʼalakalaka nia süka ipa. Nayasaʼa na wayuu aküjakana alawaa nüchiki, neʼitaain tü saajunakat nasheʼin nümülatuʼu wanee jimaʼai kanüliakai Saulo.
59 Anuujeseʼe tü nuchuntakat maʼin Esteban wanaa sümaa nüʼinaʼannüin: «Señotkai Jesús, teʼitaain pajapuluʼu sütchin taaʼin».
60 Nüsapainkakalaka nia, emetutka maʼin nikiisa sünain maa: «Jehová,* nnojo jülüjain paaʼin tü naainjalakat». Süchikijee nüküjain tia, outalaa* nümaka.
Noota
^ Pünaʼla tü pütchikat «Circuncisión» suluʼu tü kanüliakat «Jamaluʼulu pütchikat».
^ Pünaʼla tia suluʼu tü kanüliakat «Sooʼomüin pütchi A5».
^ Pünaʼla tia suluʼu tü kanüliakat «Sooʼomüin pütchi A5».
^ Jee shiale «tü püsapaatsekat».
^ Pünaʼla tia suluʼu tü kanüliakat «Sooʼomüin pütchi A5».
^ Pünaʼla tia suluʼu tü kanüliakat «Jamaluʼulu pütchikat».
^ Pünaʼla tia suluʼu tü kanüliakat «Sooʼomüin pütchi A5».
^ «Atunkalaʼa müshi» maluʼulu tia suluʼu griego.
