Naʼyataain na Aluwataaushikana 9:1-43
-
Chashi Saulo suluʼupünaa tü wopu chaʼwatkat Damasco (1-9)
-
Ajütünüshi Ananías sünain akaalinjaa Saulo (10-19 1)
-
Ekirajüshi Saulo nüchiki Jesús chaa Damasco (19 2-25)
-
Antüshi Saulo Jerusalénmüin (26-31)
-
Aawaleʼennüshi Eneas nutuma Pedro (32-35)
-
Asoʼireʼenna aaʼinrü Dorcas süchikijee outaa, wayuu kamaneesü shia (36-43)
9 Müliaka maʼin nutuma Saulo na anoujashiikana nünain chi Señotkai jee nuʼutee aaʼinchii naya. Müshijeseʼe nuʼunuin nümaʼanamüin chi laülaashikai napüleerua na sacerdotekana,
2 nuchuntaka karaloʼuta nümüin süpüla niiʼiyatajatüin shia suluʼumüin tü ekirajüleekat nüchiki Maleiwa chajatkat Damasco. Suluʼujee tia saapüneetka nümüin nekii na sulujunakana tü kanüliakat «Wopu». Nüntirajana naya Jerusalénmüin suluʼu kapüin naya nutuma, jaʼitashi chira eekai tooloin jee türa eekai jierüin.
3 Shiasaʼa chapa nia suluʼupünaa tü wopu chaʼwatkat Damasco, nülüʼülaapa sünain tü pueulokot, suchuwajaaka naaʼu wanee luusa iipünaajeejatü.
4 Nujutuuka mmoluʼumüin, naapakalaka wanee pütchi sünain maa: «Sauloo, ¿jamüshikai müliaka maʼin taya putuma?».
5 Nusoutakalaka Saulo nümüin: «¿Jarai pia Señotkalee?». Anuujeseʼe pütchi nümüin: «Taya Jesús chi müliakai maʼin putuma.
6 Anashi pütamaale, puʼunaiwa suluʼumüin tü pueulokot, süküjüneetka pümüin samüin tü paaʼinrajatkat».
7 Jimataka neʼe na wayuu nümaajanakana, isasü nachiki aashajawaa, jama naapüin wanee pütchi sümaa nnojoluin neʼrüin jaralin kanüikin shia.
8 Nütamaakalaka Saulo mmoluʼujee, nnojotpejeʼe kasain niʼrüin mayaainjeʼe jutatüin noʼu. Müshijeseʼe najannajünüin Damascomüin.
9 Nnojotkalaka kasain niʼrüin, nnojotsü kasain niküin otta nnojotsü kasain nüsüin soʼu apünüin kaʼi.
10 Eejachikalaka wanee nikirajüin Jesús chaa Damasco, kanüliashi Ananías. Niʼrataalaka naaʼin chi Señotkai sünain maa nümüin: «¡Ananías!». Anuujeseʼe nünüiki Ananías niʼipajee: «Anii taya Señotkalee».
11 Nusoutakalaka chi Señotkai nümüin: «Pütamaa, anashi puʼunule suluʼumüin tü kaaye kanüliakat ‹Lotusü› otta püchajaa nüchiki wanee wayuu kanüliashi Saulo chejeʼewai nia Tarso, chashi nia nipialuʼu Judas. Oʼuraajüshi nia maaʼulu,
12 niʼrataalaka naaʼin wanee wayuu kanüliashi Ananías, ekerotushi nia nünainmüin jee niʼitaataalaka saaʼin najapü sünain noʼu Saulo süpüla koʼuinjachin nia nüchikuaʼa».
13 Nusoutakalaka Ananías nümüin: «Señotkalee, taapüinsaʼa süchiki müliain maʼin nutuma wayuukai chii, na wayuu pikirajüinkana, na chajanakana Jerusalén.
14 Aapünüsü laülawaa nümüin yaʼayaa natuma nekiipüʼü na sacerdotekana süpüla nütaʼülajanain napüshuaʼa na wayuu achuntakana pünülia».
15 Anuujeseʼe nünüiki chi Señotkai nümüin: «Anashi puʼunule, wayuukai chia taneekala süpüla saapajatüin wayuu tachiki, taapüneechikalaka achiki natuma na aluwataashiikana saaʼu mma jee natuma na nüchooinkana Israel.
16 Taküjeerü nümüin süpüshuaʼa tü müliaa niʼreetkat saalinjee tanüliamaain nia».
17 Nuʼunakalajaʼaya Ananías eemüin tia miichikat, niʼitaakalaka najapü sünain noʼu Saulo jee nümakalaka nümüin: «Tawala Saulo, nüjütüin taya chi Señotkai Jesús pünainmüin, chi eeʼiyalaakai pümüin suluʼupünaa tü wopukot. Nüjütüin taya süpüla koʼuinjachin pia püchikuaʼa otta süpüla süntajatüin paaʼumüin tü nüpülainkat Maleiwa».
18 Sujunuujaayaa sümaka sünainjee noʼu Saulo wanee kasa müsü aka saaʼin soi jime, koʼukalaka nia nüchikuaʼa. Nütamaakalaka jee woutiisaka nia.
19 Sükatchinraaka naaʼin süchikijee niküin.
Makataka nia maʼaka jeʼra kaʼi namaa na nikirajüinkana Jesús chajanakana Damasco.
20 Nikirajamaataka wayuu süchiki niain Jesús chi Nüchonkai Maleiwa. Naaʼinrüin tia suluʼupünaa tü ekirajüleekat nüchiki Maleiwa.
21 Ponokoloko maʼin nia naaʼin na wayuu aapajakana nünüiki jee majiraashii naya: «¿Nnojoishikai niain wayuukai chii, chi müliakai atuma na wayuu achuntakana nünülia Jesús chaa Jerusalén? ¿Aashin nüntüshin süpüla nütaʼülajanain naya jee nümaainjanain naya namaʼanamüin nekiipüʼü na sacerdotekana?».
22 Yalayalaka maʼin naaʼin Saulo sünain aküjaa pütchi. Isasü nachiki tü nanüikinjatkat niʼipajee Saulo na judío chajanakana Damasco süka pansaain maʼin süküjia nutuma Saulo niain Jesús, chi Cristo münakai.
23 Mapa maʼin naashajaajiraaka na judíokana nikiira Saulo shiiʼiree noʼuteein naaʼin.
24 Naapakalaka Saulo süchiki tü aaʼinneekat nüka. Oukajawaishii na judíokana nüpüla soʼuluʼu tü pueulokot shiiʼiree noʼuteein naaʼin. Naaʼinrawalin tia saʼwai jee soʼukai.
25 Nayasaʼa na anoujashiikana, nashakatitka Saulo suluʼu wanee kanaasüta soʼuluʼupünaa wanee wentaana eejatka sünain süsepü tü pueulokot. Saʼwaijatü tia makat.
26 Nüntapa Saulo Jerusalénmüin, nüchajaain maʼin sukuwaʼipa süpüla namaainjachin nia na anoujashiikana. Mmotpejeʼe naya neema, nnojotsü antapünaain suluʼu nekii nunoujaichipain nünain Jesús.
27 Nuʼunakalaka Bernabé sünain akaalinjaa Saulo jee nümaakalaka nia namaʼanamüin na aluwataaushikana. Nüküjaka Bernabé namüin na aluwataaushikana niiʼiyalaain chi Señotkai nümüin Saulo wopuluʼu jee naashajaʼainña nümaa otta nüküjainña yalayalain maʼin naaʼin Saulo sünain aküjaa pütchi chaa Damasco nünülialuʼu Jesús.
28 Makatüitchikalaka Saulo namaa, waraittüshi nia Jerusalénpünaa otta aküjashi nia pütchi nünülialuʼu chi Señotkai sümaa yalayalain maʼin naaʼin.
29 Aashajaashi jee aaʼayajiraashi nia namaa na judío aashajaakana griego. Najachajünaka kojuyatua natuma.
30 Naapapa süchiki tia na anoujashiikana, namaakalaka nia Cesareamüin jee najütaka nia yalejee Tarsomüin.
31 Nayasaʼa na anoujashii chajanakana Judea, Galilea otta na chajanakana Samaria, jimatüsü naaʼin süka nnojoliinnapain müliain naya atumawaa. Kojutushi maʼin Jehová* namüin otta katsüinsü naaʼin sutuma saapünüin namüin tü nüpülainkat Maleiwa.
32 Nuʼunajaakalaka Pedro suluʼupünaa tia mmakat, nünaʼlaaka namüin na nikirajüinkana Jesús, na chajanakana kepiain Lida.
33 Eejachikalaka suluʼu tia mmakat wanee wayuu kanüliashi Eneas. Makutulaainsai chia wayuukai sutuma ayuulii otta mekiisalüitchi nia juya sünain juʼletaa.
34 Anuujeseʼe nünüiki Pedro nümüin: «Eneas, aawaleʼennüichipa pia nutuma Jesucristo. Pütamaa otta pukotchojo türa pujuʼlejiakat». Nütamaamaataka chia wayuukai.
35 Niʼnnapa natuma na wayuu chajanakana kepiain Lida otta natuma na wayuu kepiakana süpaʼa tü patajatshii kanüliakat Sarón, nanoujayaa namaka nünain chi Señotkai.
36 Eejatkalaka chaa Jope wanee anoujasü kanüliasü Tabita, «Dorcas», maluʼulu tü sünüliakat. Aainjawaisü shia kasa anasü jee sükaalinjain na wayuu müliakana.
37 Soʼunnaa tia, ayuuijaaka shia jee outakalaka shia, müsüjeseʼe soʼoojinnüin sümaa sujulereʼennüin suluʼu wanee kuatta iipünaasü.
38 Pejesü tü pueulokot Lida sünain Jope. Naapakalaka na anoujashiikana chajachin Pedro suluʼu tia pueulokot, naluwataainjeseʼe piamashii wayuu sünain maa nümüin Pedro: «Püntaʼaya yaamüin».
39 Nütamaamaataka Pedro jee nuʼunamaataka namaa. Nüntapa chamüin, nümaanaka suluʼumüin tü kuatta iipünaakat. Nantapaaka waneinnua jieyuu outa aʼwayuusechii, neeʼiyataka nümüin Pedro sümaa neʼira tü nasheʼin jee tü saajunakat nasheʼin shiʼyapüjalakat Dorcas namüin kataiwaʼaya soʼu.
40 Nujuʼittirüinjeseʼe naya Pedro napüshuaʼa, nüsapainkaka nia jee nuʼuraajaka. Niirakaaka sümüin müliashii jee nümakalaka: «¡Pütamaa Tabita!». Sujutalaka soʼu, süikalaaka shiʼraiwaʼaya Pedro.
41 Naapakalaka Pedro najapü sümüin süpüla nütameʼerajatüin shia. Neenajitkalaka na nikirajüinkana Jesús, namaʼaleeya na jieyuu outa aʼwayuusechiikana, niiʼiyataka shia namüin suluʼu katüin soʼu.
42 Suʼwalakajaaka süchiki tia suluʼupünaa tü mmakat Jope, wattaka naalii na wayuu anoujakana nünain chi Señotkai.
43 Eesü nükalia Pedro chaa Jope, nipialujuchi nia wanee wayuu akuttiirajüi* kanüliashi Simón.
Noota
^ Pünaʼla tia suluʼu tü kanüliakat «Sooʼomüin pütchi A5».
^ Wayuu aʼyataakai sünain süta mürüt.
