Apocalipsis 12:1-17
12 Sülatakalaka wanee kasa chaa sirumatuʼu, eesü tü kayaawasekat tia makat, eejatkalaka wanee wayuu jorottusü maʼin süsheʼin maʼaka saaʼin nuwarala chi kaʼikai, suuʼuipalasü tü kashikat otta eejatü saaʼu shikii wanee kotse kanainka poloo piamamüin shüliwala.
2 Ipuotsü tia wayuukat jee aʼwaatüsü shia sutuma saʼalijaain.
3 Sülatakalaka wanee kasa chaa sirumatuʼu, eesü tü kayaawasekat tia makat, niiʼiyalaaka wanee wüi miyoʼu maʼin, ishotoi, akaratshisü nikii, poloosü nuʼuwa otta eejatü akaratshi kotse sünain nikii.
4 Watta saalii* shüliwala najaralajaka süka nüsi jee nujutaka shia mmapaʼamüin. Shaʼwatüshi chi wüikai sümülatuʼu tü wayuu aʼalijaakat, niküinjachi chi süchonkai jemeyutpa shia nümaa.
5 Toolo süchon, meerü nürüleejakai saaʼin wayuu sainküin mmakat süka wanee kachueera. Nüsaajaanaka chi süchonkai, nümaanaka chamüin eere joyotuin Maleiwa sünain aluwatawaa.
6 Suʼluwataaka tia wayuukat chaa isashiipaʼamüin, yapatüjülia nutuma Maleiwa tü mma süntajatkalü aluʼumüin tia wayuukalü otta eeinjatüle shikinnüin soʼu 1.260 kaʼi.
7 Eejatka wanee atkawaa chaa iipünaa. Miguel otta müshiʼiya na aapiee nümaajanakana atkaashii nümaa chi wüi miyoʼukai maʼin jee namaʼaleeya na aapiee nümaajanakana.
8 Nükanajuuka chi wüi miyoʼukai maʼin namaʼaleeya na nümaajanakana, nnojoliinnapaka süpüla eekuʼu namüin chaa iipünaa.
9 Nujunaanakalaka mmapaʼamüin chi wüi miyoʼukai maʼin, chi wüi nümaiwajachikai, chi Yolujaa jee Satanás münakai, chi emeejakai wayuu sainküin mmakat. Ojunaanüshi nia mmapaʼamüin namaʼaleeya na aapiee nümaajanakana.
10 Taapakalaka chaa sirumatuʼu wanee pütchi emetutka maʼin sünain maa:
«Oʼttaasü wayuu nutuma Maleiwa, atüjaanüitpa aaʼu pülashin maʼin nia, oʼttuichipa nia sünain aluwatawaa otta aapünüsiaʼaya laülawaa nümüin chi nüneekajalakai süpüla Cristoin nia, jama nujutunuin mmapaʼamüin chi alirajakai na wawalayuukana, chi mojukai anüiki nachiki saʼwai jee soʼukai nuʼupala chi Maleiwakai.
11 Akanajuushi nia natuma na wawalayuukana saaʼujee amülain nüsha chi Anneetchonkai otta saaʼujee tü pütchi naküjakat, anashiisü namüin naapajiraain nekii* otta nnojoishii mmoluin naya seema outaa.
12 Anakajaʼa talatüle maʼin jaaʼin jia kepiakana chaa sirumatuʼu, eekajasaʼa süpaʼapünaa tü mmakat otta shirokupünaa tü palaakat, jouleerü maʼin müliaa, jama nüshakatüitchipain jümaʼanamüin chi Yolujaakai sümaa jashichin maʼin nia. Nütüjaa aaʼu süpütaain palit kaʼi nüpüla».
13 Niʼrapa chi wüi miyoʼukai maʼin nujutunuin mmapaʼamüin, niipiijakalaka tü wayuu jemeyutkat.
14 Saapünaka sümüin tü wayuukat piamasü sütüna warulapai miyoʼu maʼin süpüla süwatüinjatüin isashiipaʼamüin eejatüle shia. Ekinnajatü shia chamüin watta nuulia chi wüikai soʼu apünüin juya shiatapünaamüin.*
15 Nujuʼulaka chi wüikai wüin naanüküluʼujee süchiiruajee tü wayuukat, mataasü aka saaʼin süchi, nujuʼuluin tia süpüla wüinsirüinjatüin shia nutuma.
16 Sümüliajünakalaka aaʼin tü wayuukat sutuma tü mmakat. Seerutkalaka saanükü tü mmakat süpüla süsajaain tü süchi nujuʼulakat chi wüi miyoʼukai maʼin.
17 Naashichijaakalaka chi wüi miyoʼukai maʼin sooʼomüin tü wayuukat otta nushutaka naaʼu na süikeyuu apütaakana. Naya makana na oonookana sümaa tü nuluwataakalü anain chi Maleiwakai otta na aküjakana pütchi nüchiki Jesús.
Noota
^ Apünüinsü shiʼipapaʼa tü shüliwalakalü atumawaa, sajaralajünaka wanee shiʼipa.
^ Pünaʼla tü pütchikat «Alma» suluʼu tü kanüliakat «Jamaluʼulu pütchikat».
^ Jee shiale «wanee juya, piama juya jee shiatapünaa juya».
