Apocalipsis 18:1-24
-
Akanajuusü «Babilonia tü Kojutukat Atumawaa» (1-8)
-
Jia wayuu tapüshikana, anashii jujuʼitüle suulia (4)
-
-
Aʼyalajüsü wayuu saalinjee sükanajuuin Babilonia (9-19)
-
Talatüshii na chakana sirumatuʼu sutuma sükanajuuin Babilonia (20)
-
Ojutuneerü Babilonia shirokumüin tü palaakat maʼaka sujutunuin wanee ipa (21-24)
18 Süchikijee tia, teʼrakalaka nüshakatüin wanee aapiee sirumatuʼujee, aapünüsü laülawaa nümüin. Warattuuika tü mmapaʼakat sutuma tü nüpülainkat.
2 Emetutkalaka nünüiki sünain maa: «¡Akanajuuitpan! ¡Shia akanajuuka Babilonia tü Kojutukalü Atumawaa! Shipiaitpa neʼe shia yolujaa, suukajüleitpa shia yolujaa otta shipiaitpa shia tü wüchii yarüttakat maʼin otta tü aʼürülaanakalü anain.
3 Müshii süsiʼrakai naaʼin wiino na wayuu kepiakana sainküinpünaa tü mmakat, saaʼinrüin tia süka suʼluwajiraweein maʼin sukuwaʼipa namaa, aʼluwajiraashii nakuwaʼipa na sülaülajanakana mma sümaa tia wayuukat otta washirüinnapa maʼin na oikaaliikana sutuma tü kasa kojutusü süniijakat tia wayuukat, nnojotsü japüliwaain saaʼin sutuma süniijain tia».
4 Taapakalaka wanee pütchi sirumatuʼujee sünain maa: «Jia wayuu tapüshikana, nnojoliirejeʼeya kaainjaleein jia wanaa sümaa, anashii jujuʼitüle suulia otta nnojoliirejeʼeya jiʼreein tü müliaa shiʼrüinjatkat.
5 Watta maʼin saalii tü kasa mojusü saaʼinrakat otta sotusü naaʼin Maleiwa tü sümaʼülakat.
6 Jaaʼinra sümüin tü kasa saaʼinrakat sümüin wayuu, alanaʼaleeinjatia maʼin tü kasa jaaʼinrakat sümüin suulialeʼeya tü saaʼinrakat. Jülaʼala piantua süsüin suluʼu tü iita saainjakalü aluʼu tü asüüshikat.
7 Müliainjatü shia jutuma otta aʼyalajüinjatü shia jutuma wanaapünaa sümaa tü kasa suʼwaataakalü aluʼu otta wanaapünaa sümaa tü kasa kojutusü süniijakat, tü nnojotkat japülin aaʼujee shia. ‹Müsü taya maʼaka saaʼin wanee aluwataasü, nnojotsü wayuuin outa aʼwayuuset taya otta müiria nnojoluin mojuin aaʼin taya saalinjee wanee kasa›, makuʼu müsü shia suluʼu saaʼin.
8 Eʼreerü shia müliaa sutuma tü kasa mojusü alatajatkat sümüin soʼuleʼeya wanee kaʼi, eʼreerü shia outaa, mojeerü saaʼin, alatireerü shia jamü otta aʼajünaleejeeria shia süka sikoʼu, jama pülashin maʼin Jehová* chi Maleiwakai, chi kasalajanakai atuma saainjala.
9 »Nayasaʼa na sülaülashiikana mma, na aʼluwajiraakana nakuwaʼipa sümaa otta na eʼrakana anaa suluʼujee tü kasa kojutusü eejatkat sümaʼana, tü kasa maapülinkalü akajee shia, aʼyalajeena naya jee nasheʼejeerü naʼluuwain saalinjee neʼrüin kaittüin sümüsain sutuma saʼajünüin.
10 Shaʼwateena naya kaʼyataluʼu suulia neʼrüin müliaa wanaa sümaa. Anuujeerü nanüiki: ‹¡Aluʼuwatsiaʼaya mayaaka pukuwaʼipa! Piapuʼusü tü pueulo miyoʼukat, Babilonia tü kojutukat sutuma wayuu, ¿jamakuwaʼipat süpüla pajaʼttinnüin soʼu wanee oora?›.
11 »Aʼyalajeenaʼaya na oikaaliikana sainküinpünaa tü mmakat jee mojeerü maʼin naaʼin saalinjee, jama nnojoleerüin jaralüin ayaʼlajüin süpüshuaʼa tü noikaainkat.
12 Nnojoleerü jaralüin ayaʼlajüin noulia ooro, pülaata, ipa anajakat maʼin anoʼu, kaaʼürüla, lino anakat maʼin, kuluulu jepisiiyaa, seda jee müsia tü kuluulu ishokot maʼin. Nnojoleeriaʼaya jaralüin ayaʼlajüin noulia süpüshuaʼa tü kasa aainjuushikat süka wunuʼu jemeta eejuut otta tü kasa aainjuushikat süka ‹marfil› otta wunuʼu anajakat maʼin, cobre, kachueera jee müsia ‹mármol›.
13 Nnojoleerü jaralüin ayaʼlajüin noulia canela, wunuʼu jemeta eejuut chejeʼewatka India, wunuʼu aʼajuushi jemetakalü eejuu, seita jemetakalü eejuu, ‹olíbano›,* wiino, seita ayuʼluushikat sünainjee olivo, ariina eekai anain maʼin, trigo, paaʼa, anneerü, ama, kareeta, achepchiee jee müsia wayuu.
14 Ajaʼttüitpa puulia süpüshuaʼa tü kasa anasü* suchuntaakat paaʼin, süpüshuaʼa tü eküülü anakat maʼin jee jemetaka maʼin. Müiria nnojoluin shia.
15 »Na wayuu oikaapuʼukana tia, na washinnuukana sünainjee, shaʼwateena naya kaʼyataluʼu suulia neʼrüin müliaa wanaa sümaa. Aʼyalajeena naya jee mojeerü naaʼin
16 sünain maa: ‹¡Aluʼuwatsiaʼaya mayaaka pukuwaʼipa! Pia tü pueulo miyoʼukat, anasü maʼin püsheʼin, aainjuushi shia süka lino, jepisiiyaa sünoʼu püsheʼin jee ishosü maʼin shia, eesü ooro pünain, ipa eekai anain maʼin sünoʼu otta kaaʼürüla.
17 Ajaʼttaleesia soʼu wanee oora süpüshuaʼa tü suwashirüinkat›.
»Napüshuaʼa na sülaülajanakana anuwa jee napüshuaʼa na aʼyataakana suluʼu anuwa, shaʼwateena naya kaʼyataluʼu suulia.
18 Anuujeetkalaka nanüiki nekiiseruʼu neʼrapa kaittüin sümüsain sutuma saʼajünüin: ‹Eetaayaai eein wanee pueulo eekai müin aka saaʼin tü pueulo miyoʼukat›.
19 Nejinaka mma saaʼu nekii, aʼyalajüshii naya, mojusü maʼin naaʼin jee woottüshii naya sünain maa: ‹¡Aluʼuwatsiaʼaya mayaaka pukuwaʼipa! Pia tü pueulo miyoʼukat, jama washinnuuin maʼin pünainjee na wayuu kaʼanuwainkana. ¡Ajaʼttinnaleesia pia soʼu wanee oora!›.
20 »Anashii talatüle jia chakana sirumatuʼu saaʼujee tü kasa alatakat sümüin. Anashiʼiya talatüle jia aneekuushikana nutuma Maleiwa, jia aluwataaushikana jee jia nünüikimaajanakana. Nümülialüin jaaʼin chi Maleiwakai, müsüjeseʼe kasalajanain nutuma saainjala».
21 Eejachika wanee aapiee katchinkai maʼin, niyaleraka wanee ipa asirujia miyoʼu maʼin, nujutaka shia shirokumüin tü palaakat sünain maa: «Meeriaʼaya neʼe tü alatakat sümüin Babilonia, tü pueulo miyoʼukat, ojunaaneerü shia otta nnojoleerü eʼnnüin shia piantua.
22 Müiria maapujuin chaa Babilonia neeʼirain na wayuu eeʼiraliikana sümaa naʼyalajirüin tü kanüliakat arpa, na wayuu aʼyalajirakana tü kanüliakat flauta, na aʼyalajirakana konneeta jee müiria maapujuin neeʼirain na wayuu eeʼiraliikana. Nnojoleechi eein wanee wayuu eekai kuʼyamalin otta müiria maapujuin shipisana tü ipa asirujiakat.
23 Müiria nnojoluin achuwajaanüin luusa chaa Babilonia, müiria maapujuin nünüiki wanee wayuu eekai kasaalüinjachin jee sünüiki wanee wayuu eekai kasaalüinjatüin, jama nayain washinnuʼuleeinña maʼin suulia wayuu süpüshuaʼa na wayuu oikaapuʼukana suluʼu tia pueulokot otta süka wattain maʼin naalii na wayuu pimeejakana sükajee paaʼinrüin tü saaʼinrakat ouutsü.
24 Antüna anainrü nasha na nünüikimaajanakana Maleiwa suluʼu tia pueulokot, na aneekuushikana nutuma Maleiwa jee nasha napüshuaʼa na wayuu oʼutunakana aaʼin sainküin tü mmakat».
Noota
^ Pünaʼla tia suluʼu tü kanüliakat «Sooʼomüin pütchi A5».
^ Pünaʼla tia suluʼu tü kanüliakat «Jamaluʼulu pütchikat».
^ «Anasü süchon tü aʼttieekat» maluʼulu tia suluʼu griego.
