Apocalipsis 20:1-15
20 Teʼrakalaka nüshakatüin sirumatuʼujee wanee aapiee kamaʼanakai shiyaawein tü ishi oʼutakat maʼin otta eejatü najapuluʼu wanee kaleena laütta maʼin.
2 Nütaʼülaka chi wüi miyoʼukai maʼin, chi wüi nümaiwajachikai, chi Yolujaa jee Satanás münakai, kapüshi nia nutuma soʼu miit juya.
3 Nujutakalaka nia suluʼu tü ishi oʼutakat maʼin eere nüsürülüin nia jee niʼitaaka wanee shiyaawase soʼuluʼu suulia nimeejaʼalüin wayuu sainküinpünaa tü mmakat waneʼereeya sajaʼttapa tü miitkat juya. Süchikijee tia ajütüneechi achiki nia motsomüin neʼe.
4 Teʼrakalaka kojuyasü einasee süpülajatka aluwatawaa, nayasaʼa na wayuu aikalaakana saaʼu tia einaseekat, aapünüsü laülawaa namüin süpüla süsalainjatüin saainjala wayuu natuma. Teʼraka nasha na wayuu oʼutuushikana aaʼin sutuma naküjain pütchi nüchiki Jesús jee sutuma naküjain pütchi nüchiki Maleiwa. Naya wayuukana nnojotsü naʼwaajüin tü wüchii wünaʼapüjatkat sümaʼaleeya tü shiyaakuakat jee nnojotsü eʼitaanüin neʼipoʼunain jee sünain najapü sejeetse tü wüchii wünaʼapüjatkat. Asoʼiraasü naaʼin naya wayuukana jee aluwataashii naya nümaa Cristo soʼu miit juya,
5 naya asoʼiraaka aaʼin palajana süchikijee outaa. Asoʼiraʼaleesia naaʼin na wane outushiikana sajaʼttaleepaʼaya tü miitkat juya.
6 Anakuwaʼipalii jee aneekuushi na wayuu asoʼiraakana aaʼin palajana. Nnojotsü laülaain naaʼu naya wayuukana tü chiiruaajatkalü outaa, sacerdoteena naya nutuma Maleiwa jee nutuma Cristo otta aluwataweena naya nutuma soʼu miit juya.
7 Ajütüneechi achiki Satanás sülatapa tü miitkat juya.
8 Ojuʼiteechi nia süpüla nimeejüin tü wayuu sainküinpünaakat mma, tü chakat süshekeinruʼu tü mmakat, chaa palaajeeruʼu, chaa wüinpüjeeruʼu, uuchijeeruʼu jee wopujeeruʼu. Nayeena nimeejaka Gog nümaa Magog, naaʼinrajatü tia shiiʼiree nuutkajeʼerüin naya süpüla wanee atkawaa. Watta maʼin naalii naya wayuukana müshii naya maʼaka saaʼin tü jasai sotpünaakat palaa.
9 Noʼunakalaka naya wayuukana sainküinpünaa tü mmakat, noutkajaka nepia na wayuu aneekuushikana jee noutkajüin tü pueulo kojutukat nümüin Maleiwa. Ojutuupejeʼe siki sirumatuʼujee, najaʼttaleeka naya wayuukana sutuma.
10 Emeejünüshii naya wayuukana nutuma chi Yolujaakai, ojutunushijeseʼe nia suluʼumüin tü laa chuwatakat maʼin, tü ajaʼttaleekalü atuma wanee kasa, eere sujutunuin paala tü wüchii wünaʼapüjatkat nümaʼaleeya chi nünüikimaajachiaakai Maleiwa. Müliashii maʼin naya atumawaa soʼukai jee saʼwai süpüla kaʼikat süpüshuaʼa.
11 Teʼrakalaka wanee einasee miyoʼu süpülajatü aluwatawaa, kasuusü maʼin jee teʼrüin chi joyotokoi saaʼu. Makaʼa süpantajaakai aaʼin tü mmakat sümaa tü sirumatuʼukat nüpüleerua, nnojotkalaka shiʼnnüin piantua.
12 Teʼrakalaka na wayuu outushiikana shaʼwashawalüin sümülatuʼu tü einasee süpülajatkalü aluwatawaa, eejachi chira eekai miyoʼuin jee eejachi chira eekai jintülin. Sujutannaka kojuyasü rooyo, ojutannapejeʼe wanee rooyoya, shia tü rooyo nanüliamaajatkat na wayuu katüinjanakana oʼu. Süsalaka atumawaa tü kasa naaʼinrakat na wayuu outushiikana wanaapünaa sümaa tü ashajünakat suluʼu tü kojuyasükat rooyo.
13 Müshii saapakai naaʼin tü palaakat na wayuu outakana shiroku, akaʼaya tü outaakat sümaa tü Amuuyuukat* müshii saapakai naaʼin na outushii eejanaka suluʼu. Süsalashiijeseʼe naainjala waneʼewai nakua na outushiikana saaʼujee tü kasa naaʼinrakat.
14 Sujutunaka tü outaakat sümaa tü Amuuyuukat suluʼumüin tü laa chuwatakat maʼin. Tü laa chuwatakat maʼin, tü ajaʼttaleekalü atuma wanee kasa, shiyaawase tü chiiruaajatkalü outaa.
15 Nayasaʼa na wayuu nnojoliikana ashajünüin anülia suluʼu tü karaloʼuta nanüliamaajatkat na wayuu katüinjanakana oʼu, ojutunushii naya suluʼumüin tü laa chuwatakat maʼin, tü ajaʼttaleekalü atuma wanee kasa.
Noota
^ «Hades» eesü sümünüle. Shia eere na outushiikana. Pünaʼla tia suluʼu tü kanüliakat «Jamaluʼulu pütchikat».
