Karaloʼuta namüinjatka na chajanakana Colosas 2:1-23
2 Tawalayuwaa, shia keeʼireeka taaʼin jütüjaainjatüin saaʼu taʼyataain maʼin shiiʼiree aneein jukuwaʼipa jüpüshuaʼa, jia chakana Laodicea jee shiiʼiree aneein nakuwaʼipa napüshuaʼa na nnojoliikana eʼraajüin taya.
2 Shia tachekaka achiki tamülialüinjatüin jaaʼin, paaʼinwainjanain jia süka aijiraain jia otta jiʼrüinjanain tü kasa anasü* eejeetkat sünainjee jiyaawatüin saaʼu pansaain tü jütüjaakalü aaʼu otta süpüla jiyaawatajatüin maʼin saaʼu tü kasa nütüjaakalü aaʼu Maleiwa. Tia shia tü nüchikikat Cristo.
3 Wayaawata aaʼu nükajee Cristo kekiin maʼin chi Maleiwakai jee nütüjain maʼin, tia müsü aka saaʼin wanee korolo kojutusü eekai suunjunnüin.
4 Taküjain jümüin tia suulia shimeejaʼalüin jia wayuu sükajee kemeʼeriain sünüiki jümüin.
5 Mayaainjeʼe nnojolin chain taya jümaa jülüjasü taaʼin tü kasa alatakat jümüin, talatakalaka taaʼin süka tatüjaain saaʼu pansaain jukuwaʼipa otta ichein junoula nünain Cristo.
6 Ayataʼaya jia paaʼinwain nümaa Cristo Jesús chi Señotkai maʼaka jaaʼinrüin shia juʼttaiwaʼaya sünain anoujaa nünain.
7 Jütüjaaitpa saaʼu katchinjatüin jaaʼin sünainjee kanoulain jia nünain Cristo, müinjatü jukuwaʼipa maʼaka naaʼin wanee wunuʼu oʼutakai maʼin ourala shiinaluʼu mma otta jaapüinjatü waneepia analuʼut nümüin Maleiwa.
8 Eeja jaaʼin suulia nemeejaʼalüin jia na manoujainsaliikana sükajee tü kasa kekiikalü anainjee naya naashin jee sükajee tü alawaa naküjakat, nnojotsü kasain anain apüla tia makat, jama sümaʼanajeejatüin neʼe shia wayuu, tü jülüjakat saaʼin otta tü sukuwaʼipapalakat, nnojotsü nümaʼanajeejatüin shia Cristo,
9 jama nüshatüin süpüshuaʼa tü nukuwaʼipakat Maleiwa.
10 Nnojotkalaka eein wanee kasa choʼujaaka jümüin nutuma Cristo, jama niain nekiipüʼüin napüshuaʼa na eekai naluwataain jee na sülaülajanakana wanee kasa.
11 Süka kanoulain jia nünain Cristo, müsü süchotoonokoi saaʼin süta jukorolo,* nnojotpejeʼe achotoonuin süta jukorolo maʼaka süchotoonuin süta sukorolo wayuu. Shia juuʼulaaitpaka oulia tü kasa mojusü suchuntaapuʼukat jiʼiruku, shiaʼaya nooʼulaaka oulia tia na wayuu oushikajaakana süchiirua nukuwaʼipa Cristo, müinnapakalaka süchotoonokoi saaʼin süta nakorolo suluʼujee tia.
12 Müshii jojoitünakai aaʼin wanaa nümaa Cristo süka woutiisain jia maʼaka woutiisain nia otta süka paaʼinwainnapain jia nümaa müshii jüsoʼireʼennakai aaʼin wanaa nümaa süka junoujain sünain tü kasa nuuntakat Maleiwa sükajee tü nüpülainkat, asoʼireʼenna aaʼinchiaʼaya nia nutuma Maleiwa süchikijee outaa.
13 Mayaainjeʼe müin outakai jaaʼin sutuma tü kasa mojusü jaaʼinrakat jee sutuma müin nnojotkai süchotoonuin süta jukorolo naapüin Maleiwa kataa oʼuu jümüin wanaa nümaa Cristo. Motoko naaʼin Maleiwa süpüshuaʼaleʼeya tü kasa mojusü waaʼinrakat süka kamaneein nia wamüin.
14 Nümalajeʼerüin tü pütchi ashajuushikat eere süküjünüin tü saaʼinrajatkat wayuu otta tü aküjakat süchiki mojuin tü kasa waaʼinrakat. Najaʼttirüin Maleiwa tü Pütchi Aapünakat nümüin Moisés wanaa sümaa nükachennüin Cristo sünain wanee wunuʼu* süpüla outajachin nia.
15 Suluʼujee tia müshii nümasheʼinjakai naaʼin na laülaashiikana jee na sülaülajanakana wanee kasa, niiʼiyatakalaka naya sümüin wayuu. Sütüjaanakalaka aaʼu suluʼujee tia nayamünnüin nutuma jee namaanakalaka nutuma maʼaka naaʼin wayuu eekai nataʼülüüshin.
16 Nnojotkalaka anain shiyoujale jia wayuu sünainjee tü kasa jikakat jee tü kasa jüsakat jee shiale sünainjee jaainjain miʼiraa shikiira wanee kasa maʼaka saaʼin shikiira piʼyuushoʼu jee shiale shikiira tü kaʼi seemeraakalü oʼu wayuu.
17 Shiyaawase shia tü kasa eejeetkat mapeena, ekeraajapejeʼe shia nutuma Cristo.
18 Jalia jia naaʼin na wayuu nnojoliikana yaletayaain aaʼin suʼupalapünaa wayuu jee jalia jia naaʼin na wayuu aʼwaajakana na aapiee nümaʼanajeejanakana Maleiwa* süka eein süpüla nooʼuleʼerüin jia suulia saapünüin jümüin tü kasa aapünajatkalia jümüin. Naya wayuukana, «icheshii süchiirua» tü kasa neʼrakat otta aʼwaataashii naya suluʼu wanee kasa nnojotka kasain anain apüla, jama shiain neʼe jülüjain naaʼin tü kasa suchuntaakat neʼiruku.
19 Nnojoishii naya paaʼinwain nümaa chi nekiipüʼükai, müinnakalaka naya maʼaka nukuwaʼipa wanee wayuu eekai mekiin. Anasü natapaʼa nutuma chi nekiipüʼükai otta nia kottoka atuma wanee kasa nanain, nemiyoʼulaakalaka nutuma Maleiwa maʼaka nimiyoʼulaain wanee wayuu.
20 Shiimainrejeʼeya müin outakai jaaʼin wanaa nümaa Cristo sümaa juuʼulaain suulia tü kasa jülüjakat saaʼin wayuu otta tü sukuwaʼipapalakat, ¿jamakaʼa wanaawaka jukuwaʼipa namaa na wayuu manoujainsaliikana? ¿Jamüshii ayatakaʼa joonooin sümaa tü pütchi makat
21 «nnojo paapaain wanee kasa, nnojo piküin shia, nnojo pipettüin shia»?
22 Tia aküjünakalü achiki yaʼayaa shia tü kasa atüjakalü ajaʼttaa saapaapa shia wayuu. Suluwataa anainrü wayuu tia makalü otta shia tü shikirajakalü anain.
23 Müsü anayaakai saaʼin tia pütchi aluwataanakalü anain, naneekapejeʼe süka naaʼin namüiwaʼa naya wayuukana tü sukuwaʼipainjatkat naʼwaajia wanee kasa. Naapajiraain nakuwaʼipa sünain müliaa süpüla jülüjainjatüin saaʼin wayuu nnojoluin yaletüin naaʼin, nnojotpejeʼe kasain saamüin tia naaʼinrakat, jama ayatüin naaʼinrüin tü kasa mojusü suchuntaakat neʼiruku.
Noota
^ Jee shiale «washirüinjanain jia».
^ Pünaʼla tü pütchikat «Circuncisión» suluʼu tü kanüliakat «Jamaluʼulu pütchikat».
^ Pünaʼla tia suluʼu tü kanüliakat «Jamaluʼulu pütchikat».
^ Jee nayale «na wayuu aʼwaajakana maʼaka naaʼinrüin shia na aapieekana».
