Karaloʼuta namüinjatka na chajanakana Colosas 3:1-25
3 Shiimainrejeʼeya jüsoʼireʼennüin aaʼin nümaa Cristo, ayataʼaya jüchajaain tü kasa chakat iipünaa eere joyotuin Cristo nikialuʼujee chi Maleiwakai.
2 Jülüja jaaʼin tü kasa chakat iipünaa, nnojo jülüjain jaaʼin tü kasa yaakat saaʼu tü mmakat.
3 Outushii jia, mapajeʼe juunjunnakai aaʼin nutuma Cristo, jama shiain nücheküin tia Maleiwa.
4 Sütüjaajeerü aaʼu wayuu pülain maʼin Cristo, chi katakai atuma soʼu wayuu, kojuteenaʼaya jia sutuma wayuu wanaa nümaa.
5 Juuʼulaa suulia tü kasa mojusü suchuntaakat jiʼiruku, juuʼulaa suulia juʼluwajiraain jukuwaʼipa,* suulia yarüttüin jukuwaʼipa, suulia suchuntaain maʼin jaaʼin kakuwaʼipain jia sümaa wanee jierü jee wanee jierü nümaa wanee toolo, juuʼulaa suulia jülüjain jaaʼin kasa mojusü jee nnojo suchuntaain jaaʼin naata kakorotshi, tia makat müsü aka saaʼin aʼwaajaa maleiwayaasü.
6 Müle naainjala wanee wayuu, jashicheechi Maleiwa nümüin.
7 Mapuʼusü tü jaaʼinrakat maiwaʼaya jukuwaʼipa maʼaka nakuwaʼipa naya wayuukana.
8 Juuʼulaa suulia jashiee, üttaa aaʼin, nnojo jaainjain kasa mojusü, nnojo jüküjain pütchi eekai airuʼuluin jee nnojo jujuʼitirüin pütchi eekai yarüttüin.
9 Nnojo jüküjiraain alawaa, juuʼulaa suulia tü jukuwaʼipapuʼukat jee tü kasa jaaʼinrapuʼukat.
10 Aluʼu shiainjaʼa anain jeketüle tü jukuwaʼipakat, tü anuu joo naapüin Maleiwa jümüin. Tia müsü aka saaʼin nukuwaʼipa Maleiwa, shiʼipaʼaya pansaain tü kasa jütüjakat nüchiki Maleiwa, anakajaʼa junouteʼerüle tü jukuwaʼipakat.
11 Wanaawasü nakuwaʼipa na wayuu jekenakana akuwaʼipa, jaʼitashii griegoin, judíoin, nochoteʼerüle süta nakorolo* jee nnojorülejeʼeya nachoteʼerüin shia, jaʼitashii achepchieein jee nnojoliirejeʼeya achepchieein naya, jaʼitasü naatajatüin noumain jee wünaʼapüjanale naya.* Eeshi Cristo sünain kasa süpüshuaʼa jee paaʼinwashii waya nümaa.
12 Jia aneekuushikana nutuma Maleiwa, akataluushikana jee aikana nüpüla, jümülialaa aaʼin naalin na waneinnua, kamanee jia, nnojo yaletüin jaaʼin, nnojo jaashichijaain jee nnojoishii kashapajaaraliinjanain jia.
13 Ayataʼaya jülatirüin sooʼopünaa jaaʼin naainjala na waneinnua jee motomaata jaaʼin tü kasa mojusü aainjünakat jümüin, jaʼitasü eein tü kasa jashichikalü aaʼujee jia. Motomaatüsü naaʼin Jehová* tü kasa mojusü jaainjakat, akaainjanaʼaya neʼe jia, motuinjatü shia jaaʼin.
14 Eepejeʼe wanee kasa jaainjainjatka, alinjatü jüpüla wayuu, jama shiain kottiraain atuma wayuu tia.
15 Kasataalejeseʼe jimatüin jaaʼin sutuma tü anaa naapakat Cristo jümüin, jama jüneekuushin süpüla jimatüinjatüin jaaʼin, müinnakalaka jia maʼaka nukuwaʼipa wanee wayuu. Anashii jaapüle analuʼut saaʼu wanee kasa.
16 Kasataalejeseʼe eein suluʼu jaaʼin tü nünüikikat Cristo, kekiijeenakalaka jia suluʼujee tia. Ayataʼaya jikirajiraain jee jükatchinjiraain jaaʼin sükajee jiiʼirajüin salmos,* sükajee juʼwaajüin Maleiwa, juʼwaajüin nia sükajee jiiʼirain sümaa jaapüin analuʼut nümüin. Jiiʼiraja nümüin Jehová* suluʼu jaaʼin.
17 Jaʼitasü kasain jaainjain, jüküjalejeʼeya wanee kasa jee jaainjalejeʼeya shia, jaainja kasa süpüshuaʼa saaʼu nünülia chi Señotkai Jesús jee jaapa analuʼut nümüin chi Washikai Maleiwa nükajee Jesús.
18 Jia jieyuu kaʼwayuuseshiikana, jüüjüüinjana jia namüin na juʼwayuusekana maʼaka naaʼinrüinjatüin shia na wayuu oushikajaakana süchiirua nukuwaʼipa chi Señotkai.
19 Jia tooloyuu kaʼwayuuseshiikana, ayataʼaya alin jüpüla juʼwayuuse, nnojo jashichin jia sümüin.
20 Jia achonniikana, joonoo sümaa süpüshuaʼa tü nümakat jüshi jee tü sümakat jii, jama anain tia noʼuluʼu chi Señotkai.
21 Jia wayuu kachonniikana, nnojo jaashichijain na jüchonniikana suulia mojujain naaʼin.
22 Jia achepchieekana, oonooinjana jia sümaa nanüiki na jülaamainkana, jaʼitashii wayuuin neʼe naya. Nnojotsü jaaʼinrajatüin tia noʼupalapünaa neʼe shiiʼiree anainjatüin saaʼin wayuu jutuma. Jaaʼinrajatü tia süka süpüshuaʼa jaaʼin sümaa kojutuin jutuma Jehová.*
23 Jaʼitasü kasain jaainjain, jaainja shia süka süpüshuaʼa jaaʼin,* müinjachi niakaijaʼa Jehová* jaaʼinrüin amüin shia, nnojotsü sümüinjatüin wayuu,
24 jama jütüjaain saaʼu niain Jehová* aapeechin kasa anasü jümüin, tü kasa nüsülajüinjatkat jümüin. Anashii nüchepchiale jia Cristo, chi Jülaamainkai.
25 Chi wayuu aainjakai wanee kasa eekai mojuin, achekajüneerü nümüin tia, jama nnojoluin koʼuin nukuwaʼipa Maleiwa sümüin wayuu.
Noota
^ Pünaʼla tia suluʼu tü kanüliakat «Jamaluʼulu pütchikat».
^ Pünaʼla tü pütchikat «Circuncisión» suluʼu tü kanüliakat «Jamaluʼulu pütchikat».
^ «Escita» maluʼulu tia suluʼu griego. Sümaiwa paala escita münapuʼushii na wayuu mojutukana atumawaa sünainjee tü kasa naaʼinrakat jee tü nakuwaʼipapalakat.
^ Pünaʼla tia suluʼu tü kanüliakat «Sooʼomüin pütchi A5».
^ Pünaʼla tia suluʼu tü kanüliakat «Jamaluʼulu pütchikat».
^ Pünaʼla tia suluʼu tü kanüliakat «Sooʼomüin pütchi A5».
^ Pünaʼla tia suluʼu tü kanüliakat «Sooʼomüin pütchi A5».
^ Pünaʼla tü pütchikat «Alma» suluʼu tü kanüliakat «Jamaluʼulu pütchikat».
^ Pünaʼla tia suluʼu tü kanüliakat «Sooʼomüin pütchi A5».
^ Pünaʼla tia suluʼu tü kanüliakat «Sooʼomüin pütchi A5».
