Karaloʼuta namüinjatka na chajanakana Colosas 4:1-18
4 Jia wayuu kachepchiakana, loto jukuwaʼipa namüin na jüchepchiakana jee nnojo koʼuin jukuwaʼipa namüin. Soto jaaʼin Kalaamain jia, nia chi chakai sirumatuʼu.
2 Anakajaʼa waneepiale jia sünain oʼuraajaa, nnojo juuʼulaain suulia tia jee jaapa analuʼut nümüin Maleiwa.
3 Sümaʼaleeya jaaʼinrüin tia, juʼuraaja wapüleerua jee juchunta nümüin Maleiwa süpüla wountajanain aküjaa tü pütchikat jee weʼikajüinjanain süchiki tü kasa nütüjaakalü aaʼu Maleiwa nüchiki Cristo, tü anuu jooluʼu püreesain aaʼujee taya.
4 Juchuntaleʼeya taküjainjachin tü pütchikat süpüla shiyaawatüinjatüin maʼin wayuu saaʼu, jama müinjatüinjaʼaya sukuwaʼipa tatuma.
5 Jaʼyainjatü jaaʼu wayuuin kekiishii jia noʼupala na wayuu nnojoliikana anoujiraain wanaa jümaa jee alatirüinjana jia kaʼi sünain kasa eekai anain.
6 Anakajaʼa anale saaʼin wayuu waneepia sutuma jünüiki maʼaka wanee eküülü eekai jemetüin sutuma kaʼakain shia ichii, jütüjeenakalaka süpüleerua jünüiki sümüin wayuu.
7 Nieechi aküjaka jümüin chi tawalakai Tíquico jamüin takuwaʼipa, aishi nia tapüla, waneepiashi nia sünain aʼyatawaa nümüin chi Señotkai. Nüchepchia nia chi Señotkai wanaa tamaa.
8 Tajütüin nia jümüin süpüla jütüjaainjanain saaʼu jamüin wakuwaʼipa jee süpüla nümülialüinjatüin jaaʼin.
9 Oʼuneechi nia nümaa Onésimo, waneepiashi chia tawalakai tamaa jee aishi nia tapüla, chapuʼushi nia jümaa. Naküjeetkalaka jümüin süpüshuaʼa tü alatakat wamüin.
10 Nüsaküin jia Aristarco, chi püreesajiraakai wanaa tamaa jee nüsaküinña jia Marcos, chi nüpüriimasekai Bernabé, (kamaneeinjana jia nümüin nuʼunapeena jümaʼanamüin maʼaka süküjünüin jümüin)
11 jee nüsaküinña jia Jesús, chi Justo münakai, naya wayuukana napüshi na achoteʼerakana süta nakorolo, nayaʼala neʼe akaalinjaka taya süpüla taküjainjachin süchiki nuluwataainjachin Maleiwa, amülialaasü taaʼin natuma naya wayuukana.
12 Nüsaküinña jia Epafras, jüpüshitchi nia jee nüchepchia nia Cristo Jesús. Achuntawaishi maʼin nia waneepia jüpüleerua süpüla jüchecherüinjatüin jaaʼin maʼaka naaʼin wanee wayuu eekai katsüin nunoula jee süpüla junoujainjanain maʼin sünain tü kasa nüchekakat Maleiwa.
13 Tatüjaa aaʼulu wattain saalii tü kasa naaʼinrakat jüpüleerua jee napüleerua na chakana Laodicea jee müshiʼiya na chakana Hierápolis.
14 Nüsakuinña jia Lucas, chi tottoot aikai süpüla wayuu süpüshuaʼa jee nüsaküinña jia Demas.
15 Jüsaka tamüin na wawalayuu chakana Laodicea jee jüsaka tamüin Ninfa namaʼaleeya na anoujashii chakana outkajaain shipialuʼu.
16 Süchikijee jaashajeʼerüin karaloʼutakat tüü, juluwataa jünüiki süpüla saashajeʼennüin namüin na anoujashii chakana Laodicea, shieetkalaka jaashajeʼerüin tü karaloʼuta aluwataanakat namüin nayakana.
17 Anuu jünüikinjatü nümüin Arquipo: «Paaʼinmaa maʼin tü aʼyatawaa püchekakalü achiki saaʼujee puushikajaain süchiirua nukuwaʼipa chi Señotkai, pikeraajeetkalaka shia».
18 Eekajasaʼa tayakai Pablo, taya kashajalakai jümüin pütchikat tüü sümaa tasaküin jia, soto jaaʼin püreesain taya. Kasataalejeseʼe kamaneein jümüin chi Maleiwakai.
