Karaloʼuta namüinjatka na chajanakana Filipos 3:1-21
3 Tawalayuu, ayataʼaya talatüin jaaʼin süka juushikajaain süchiirua nukuwaʼipa chi Señotkai. Nnojotsü mojushiin tamüin tashajüin süchikuaʼa tü tashajüitpakat jümüin, taaʼinrüin tia shiiʼiree aneein jukuwaʼipa.
2 Jalia jia naaʼin na wayuu makana aka saaʼin sukuwaʼipa erü, na aaʼinrakana kasa mojusü jee jalia jia naaʼin na wayuu ichekana süchiirua süchotoonuinjatüin süta nükorolo wanee wayuu.
3 Wayaʼaya maʼin achotoonoko ata akorolo,* waya oʼuninnakana akuwaʼipa sükajee tü nüpülainkat Maleiwa süpüla waʼyataainjanain nümüin otta aʼwaataashii waya nuluʼu Cristo Jesús, nnojoishii waya aʼwaataain suluʼu tü suʼwaataakalü aluʼu wayuu.
4 Saʼakajee wayuu süpüshuaʼa taya aʼwaataaka maʼin suluʼu tü suʼwaataakalü aluʼu wayuu.
Eerejeʼe wanee wayuu jülüjakai aaʼin nuʼwaatainjachin suluʼu tü suʼwaataakalü aluʼu wayuu, tayainjachi aʼwaataʼaleeka maʼin nuulia.
5 Sülatapa mekiisat kaʼi süchikijee teweetüin süleʼeruʼujee tei, achotoonusü süta takorolo, napüshi taya na israelitakana, nülüin taya Benjamín, wayuu hebreo na kachooinkana taya, taaʼinrüin süpüshuaʼa tü sümakat tü Pütchi Aapünakat nümüin Moisés,* jama wayuuin fariseo taya.
6 Kapülaleesia maʼin taaʼin tia, müshiijeseʼe müliain maʼin tatuma na anoujashiikana. Jülüjasü taaʼin nnojoluin mojuin tü kasa taaʼinrakat, jama taaʼinrüin shia wanaapünaa sümaa tü Pütchi Aapünakat nümüin Moisés.
7 Shiasaʼa tü kasa kojutupuʼukat maʼin tamüin sümaiwa, tapütüitpa süka anaka akuwaʼipa nüpüleerua Cristo.
8 Alanaʼaleesia maʼin tamüin suulialeʼeya wanee kasa tü tatüjaakalü aaʼu nüchiki Cristo Jesús, chi Taseñotsekai. Tapütüin kasa süpüshuaʼa süka alin nia tapüla otta müsü shia tamüin maʼaka saaʼin wanee wasuura shiiʼiree aneein takuwaʼipa noʼuluʼu Cristo
9 otta süpüla sütüjaanajatüin aaʼu paaʼinwain taya nümaa. Nnojotsü lotuin takuwaʼipa sünainjee taaʼinrüin süpüshuaʼaleʼeya tü sümakat tü Pütchi Aapünakat nümüin Moisés. Lotusü takuwaʼipa süka kanoulain taya nünain Cristo, lotusü wakuwaʼipa noʼuluʼu Maleiwa sünainjee kanoulain waya.
10 Teʼraajee amüinchi Cristo, tatüjawee aaʼu nüpülain chi asoʼireʼerakai naaʼin. Teʼreein tü müliaa niʼrakat jee outajachi taya wanaa nümaa
11 shiiʼiree tasoʼiraweein aaʼin palajana naʼakajee na outushiikana.
12 Nnojotyülia aapünüin tia tamüin otta nnojotyülia lotuin takuwaʼipa. Ayatapejeʼe aʼyataain maʼin taya shiiʼiree tounteein tü nüneekakalü apüla taya Cristo Jesús.
13 Tawalayuwaa, nnojoyütpejeʼe tountuin tia makat, anuupejeʼe tü taaʼinrawaikat: nnojotsü kasajatüin tamüin tü kasa tapütüitpakat otta müshi tayurulaakai aaʼin süchiirua tü kasa eejeetkat mapeena.
14 Aʼyataashi maʼin taya shiiʼiree katüinjatüin toʼu chaa iipünaa. Naya aapünaka amüin tia na wayuu nüneekakana Maleiwa nükajee Cristo Jesús.
15 Müinjatiaʼaya tü jülüjakat waaʼin waya laülaakana aaʼin sünain anoujaa, eere wanee wayuu jülüjakai aaʼin wanee kasa naata suulia tia nüpansaajeerü Maleiwa nümüin jamüinjatüin maʼin sukuwaʼipa tü jülüjakat naaʼin.
16 Eerejeʼeya wanee kasa waaʼinraka shiiʼiree wakooʼomüinreein waʼyataain nümüin Maleiwa, ayataʼaya waaʼinrüin shia.
17 Tawalayuwaa, anashii jüshatüle takuwaʼipa otta jülüja jaaʼin nakuwaʼipa na wayuu ashatakana wakuwaʼipa.
18 Wainma na wayuu tachuntapuʼukana anülia pejeewa, tachuntuitpapejeʼe nanülia teʼiraluʼu, jama müin paʼünüüwaainnapakai naaʼin nümaa Cristo jee sümaa tü wunuʼu akachennakalü anain nia.
19 Ajaʼttinneena naya wayuukana, müsü aka saaʼin namaleiwase namüin tü kasa suchuntaakat naaʼin. Aʼwaataashii naya suluʼu tü kasa japüikalü atuma wayuu. Shia neʼe jülüjaka naaʼin tü kasa jülüjakat saaʼin wayuu.
20 Chejeʼewalii waya iipünaajee otta waʼatapajüin maʼin nuʼtteʼerajanain waya chi Señotkai Jesucristo.
21 Meerü niiʼiratakai saaʼin tü watapaʼakat süpüla anainjatüin maʼin shia maʼaka saaʼin tü nütapaʼakat. Naaʼinreerü tia sükajee tü laülawaa aapünakat nümüin, tü nuuntakalü akajee laülaain nia saaʼu kasa süpüshuaʼa.
Noota
^ Pünaʼla tü pütchikat «Circuncisión» suluʼu tü kanüliakat «Jamaluʼulu pütchikat».
^ Pünaʼla tia suluʼu tü kanüliakat «Jamaluʼulu pütchikat».
