Karaloʼuta namüinjatka na chajanakana Filipos 4:1-23
4 Tawalayuu aishiikana tapüla, teʼree amüinchii maʼin jia jee talatüsü maʼin taaʼin jümaa, müshii jia maʼaka saaʼin wanee kotse tamüin. Jia aishiikana tapüla, ayataʼaya ichein junoula nünain chi Señotkai.
2 Tachuntuin maʼin sümüin Evodia otta Síntique nakumajaiwa sukuwaʼipa tü mojujiraakalü aaʼujee naya, jama noushikajaain süchiirua nukuwaʼipa chi Señotkai.
3 Otta müshia piakai aʼyataajiraakai tamaa, tachuntuin maʼin pümüin pükaalinjainjanain naya jieyuukana, jama naʼyataajiraain tamaa sünain eʼikajaa tü pütchi anakat maʼin* nümaʼaleeya Clemente otta namaa na wane wawalayuukana, na anaa jooluʼu ashajünüin anülia suluʼu tü karaloʼuta nanüliamaajatkat na wayuu katüinjanakana oʼu.
4 Talataʼaya jaaʼin waneepia sünain aʼyatawaa nümüin chi Señotkai. Anuu tanüiki jümüin tachikuaʼa: ¡talataʼaya jaaʼin!
5 Anasü sütüjaale saaʼu wayuu süpüshuaʼa nnojoliin ichein jia süchiirua jünüiki, eeshi chi Señotkai jümaa.
6 Nnojo shapaain jaaʼin saaʼu wanee kasa. Aluʼu shiainjaʼa anain juʼuraajüle nümüin Maleiwa sümaa juchuntuin maʼin nümüin nuʼunirajatüin jukuwaʼipa sünain kasa süpüshuaʼa jee jaapa waneepia analuʼut nümüin.
7 Jaainjale tia, jimateerü jaaʼin nutuma Maleiwa jee naaʼinmajeerü tü suluʼukat jaaʼin jee tü suluʼukat jikii nükajee Cristo Jesús. Nnojoishi eein wanee wayuu ayaawatakai saaʼu tia jimataa aaʼin naapakat Maleiwa.
8 Shiakalaka anain tawalayuu jülüjale jaaʼin waneepia tü kasa eekai shiimain, tü kasa kojutukat sutuma wayuu, tü kasa eekai lotuin akuwaʼipa, tü kasa eekai wulein akuwaʼipa, tü kasa aijiraakalü anainjee wayuu, tü kasa anakalü atuma sünüiki wayuu nüchiki wanee wayuu yalejee, tü kasa eekai anain jee müsia tü kasa kojutukalü anainjee wanee wayuu.
9 Jaainja tü kasa ekirajünakalü anain jia jee tü talatirakat jümüin. Jaainja tü kasa taküjakat jümüin jee tü jiʼrakat sünain taaʼinrüin, eejeechikalaka jümaa chi Maleiwa jimatakai atuma saaʼin wayuu.
10 Taapüin maʼin analuʼutkat nümüin chi Señotkai saaʼu shapaain jaaʼin jüchikuaʼa taaʼu. Mayaapejeʼe shapaain jaaʼin taaʼu, kapüleepünaasü jümüin jiiʼiyatüin taalin jüpüla.
11 Nnojotsü müin tanüiki jümüin saalinjee teʼrüin müliaa, jama tatüjüichin süpüleerua takuwaʼipa jaʼitasü kasain alatüin tamüin.
12 Jaʼitasü paliʼirüin kasa tamaʼana jee wainmalejeʼeya shia, talatüsü taaʼin sümaa tia. Atüjashi taya süpüleerua takuwaʼipa sünain kasa süpüshuaʼa, talatakalaka taaʼin suluʼujee tia, jaʼitashi talatirüin jamü, wainmalejeʼeya kasa tamaʼana jee nnojorülejeʼeya shia.
13 Katchinsü taaʼin süpüla taaʼinrüin kasa süpüshuaʼa, jama niain Maleiwa katchin atuma taaʼin.
14 Akaʼaya jiakana, anasü maʼin tü jaainjakat sükajee jükaalinjain taya wanaa sümaa teʼrüin müliaa.
15 Jia tawalayuu chakana Filipos, süchikijee jaapüin tü pütchi anakat maʼin jee süchikijee tojuʼitüin Macedoniajee, jiaʼala neʼe jümüiwaʼa akaalinjaka taya.
16 Wanaa sümaa chajachin taya Tesalónica aluwataashii jia kasa tamüin süpüla eeinjatüin tamaʼana tü kasa choʼujaakat tamüin. Nnojotsü jaainjain tia uwatua, jaainjain piantua.
17 Nnojotsü tachajaain sukuwaʼipa süpüla süsülajünüinjatüin tamüin wanee kasa, shia tachekaka saapünajatüin jümüin wanee kasa saaʼu jüsülajüliin.
18 Eesü tamaʼana kasa süpüshuaʼa jee alanaʼaleesia maʼin suluʼu wainmain shia. Anasü taaʼin sutuma tü kasa jüsülajakat tamüin, tü juluwataakat nümaa Epafrodito. Müsü aka saaʼin wanee asülajuushi jemetaka eejuu, tü talatakalü atuma naaʼin Maleiwa.
19 Sutuma wainmain maʼin kasa nümaʼana chi Maleiwakai, naapeerü jümüin nükajee Cristo Jesús süpüshuaʼa tü kasa choʼujaakat jümüin.
20 Kasataalejeseʼe kojutuin atumawaa chi Washikai Maleiwa süpüla kaʼikat süpüshuaʼa. Amén.*
21 Jüsakai tamüin napüshuaʼa na anoujashii paaʼinwakana nümaa Cristo Jesús. Nasaküin jia na wawalayuu yaakana tamaa.
22 «Jüsakaʼaya maa naya wamüin» naya makana maʼin na anoujashii nipialujanakana César.* Nasaküinña jia na wane aneekuushikana nutuma Maleiwa.
23 Kasataalejeseʼe kamaneein jümüin chi Señotkai Jesucristo saaʼu wayuuin kamaneeshii jia.
Noota
^ Pünaʼla tia suluʼu tü kanüliakat «Jamaluʼulu pütchikat».
^ Pünaʼla tia suluʼu tü kanüliakat «Jamaluʼulu pütchikat».
^ Pünaʼla tia suluʼu tü kanüliakat «Jamaluʼulu pütchikat».
