Karaloʼuta namüinjatka na Hebreokana 12:1-29
-
Nia Jesús chi Anoutakai Sukuwaʼipa wanoula (1-3)
-
«Müshii pasanainkai waaʼin sünain wanee siruma, jama pasanain waya nanain naya wayuu wattakana maʼin naalii eʼrakana wanee kasa jee aapakana wanee kasa» (1)
-
-
Nnojo mojutuin wamüin nüchiaale waya Jehová (4-11)
-
«Ayataʼaya lotuin jia suluʼu tü wopu anakat» (12-17)
-
Arütkaainjana waya sünainmüin tü Jerusalén chakat sirumatuʼu (18-29)
12 Müshii pasanainkai waaʼin sünain wanee siruma, jama pasanain waya nanain naya wayuu wattakana maʼin naalii eʼrakana wanee kasa jee aapakana wanee kasa. Suluʼujee tia, anakajaʼa müle wasünneʼerakai saaʼin woulia tü kasa jawatakat wamüin jee anakajaʼa wooʼulaale suulia tü kasa jookalü atuma waya süpüla kaainjalaa. Müinjana wayoujiraakaijaʼa aaʼin sümaa wachecherüin waaʼin sünain tü ayoujirawaa niʼitaakat Maleiwa wapüleerua.
2 Müinjana weirakaakai aaʼin nümüin Jesús, chi Wekiipüʼükai jee Anoutakai Sukuwaʼipa wanoula, saaʼujee süküjünüin nümüin talatüinjachin nia, nüchecherüin naaʼin soʼu nükachennüin sünain wanee wunuʼu* eere müliain nia atumawaa, nnojotsü jamajatüin nümüin niʼrüin japülii jee aikalaashi nia shikialuʼujee tü einasee eere nuluwataain Maleiwa.
3 Anakajaʼa jülüjale jaaʼin nukuwaʼipa chi achecherakai naaʼin soʼunnaa mojuin nanüiki nümüin na wayuu kaainjarannuukana, naya wayuukana mojusü neʼe nakuwaʼipa sutuma tü kasa naaʼinrakat, anakajaʼa jülüjale jaaʼin nia süpüla nnojoliinjanain jukulajaain aaʼin jee suulia mapüsajüin jia.
4 Nnojotsü jaapüin jaaʼin sünain kaainjalaa, achechetshiiyaajeʼe jia jaaʼin, nnojoyüliipejeʼe jia outuin saaʼujee tia.
5 Motoleesia maʼin jaaʼin tü pütchi achiaanakalü anain jia, tü aküjünakat jümüin süka müin naaʼin nüchonnii jia Maleiwa, tü makat mayaa: «Tachonchee, nnojo mojutuin pümüin nüchiaale pia Jehová* jee nnojo yüülain paaʼin punoutunule akuwaʼipa nutuma,
6 jama nüchiaain Jehová* na wayuu aikana nüpüla. Niʼyaatüin chi wayuu anashiikai nümüin süpüla nüchooinjachin nia».
7 Choʼujaasü jüchecherüinjatüin jaaʼin, tia süpüshi tü ekirajünakalü anain jia, müshii jia maʼaka naaʼin nüchonnii Maleiwa. ¿Aashin nüchiaanawalin wanee jintüi nutuma nüshi?
8 Achiaanajana waya wapüshuaʼa, nnojoliirejeʼeya jüchiaanüin, nüchonyaashiijaʼamata jia Maleiwa, nnojoishii shiimain nüchonniin jia.
9 Nachiaapuʼuin waya na wayuu kachonniikana waya, kojutupuʼukalaka naya wamüin, nialeekajaʼa joo chi Washi oʼunirakai wakuwaʼipa sükajee tü nüpülainkat jee aapakai wamüin kataa oʼuu, jüüjüüleeinjana waya nümüin.
10 Na wayuu kachonniikana waya nachiaapuʼuin waya soʼu jeʼra kaʼi neʼe wanaapünaa sümaa tü anakat saaʼin namüin, eekajasaʼa chi Maleiwakai nüchiaain waya süpüla anainjatüin wakuwaʼipa, wulekalaka wakuwaʼipa suluʼujee tia maʼaka wulein nukuwaʼipa niakai.
11 Shiimainsaʼaya nnojoluin anain sümüin wayuu süchiaanüle, aisü tia sümüin. Na wayuu ekirajünakana sükajee nachiaanüin, jimatüsü naaʼin jee lotusü nakuwaʼipa mapa.
12 Maa jükatchinrakai saaʼin jajapü sümaʼaleeya jüsapain, jama matchin shia.
13 Ayataʼaya lotuin jia suluʼu tü wopu anakat, nnojoleetkalaka saakajiraain tü jüsaʼa shalüʼütakalü aluʼujee jia, aawalaajeerü neʼe.
14 Anakajaʼa jüchajaale sukuwaʼipa süpüla anajiraainjanain jia jüpüshuaʼa otta süpüla wuleinjatüin jukuwaʼipa, nnojorüle jaaʼinrüin tia nnojoleechi jiʼrüin chi Señotkai.
15 Anakajaʼa eejüle maʼin jaaʼin süpüla kamaneeinjachin chi Maleiwakai jümüin jüpüshuaʼa otta eeja jaaʼin suulia eejüin jaʼaka wanee wayuu eekai müin aka saaʼin suurala wanee wunuʼu outasiroʼu eekai shiweetaain, eesü kasa mojusü nutuma chia wayuukai otta niʼyarülajüin sukuwaʼipa watta saalii wayuu.
16 Anakajaʼa eejüle jaaʼin suulia eejüin jaʼaka wayuu eekai nuʼluwajiraain nukuwaʼipa,* anashi nnojoire jaʼaka wanee wayuu eekai mojutuin amüin tü kasa nümaʼanajeejatkat Maleiwa, maʼaka naaʼin Esaú, nuʼwanajaain neʼe saaʼu wanee eküülü tü aapajünajatkat nümüin saaʼu eʼirumaain nia.
17 Jütüjaa aaʼu nnojoluin saapünüin nümüin tü kasa eʼipünaanajatkat paala nüpüla. Amüla neʼe niʼyalajüin maʼin süka nnojoluin suʼwanajaain tü kasa nüneekatüjütkalia chi nüshikai.
18 Nnojoishii jia arütkaain sünainmüin wanee kasa eekai süpüla jipettüin, nnojoishii jia arütkaain sünainmüin wanee kasa eekai chuwatüin maʼin jee sünainmüin wanee siruma eekai kojoin maʼin, sünainmüin wanee piʼyuushi eekai kojoin otta nnojoishii arütkaain jia sünainmüin wanee wawai
19 jee nnojoishii jia arütkaain jaapaiwaʼaya shiʼira konneeta jee jaapaiwaʼaya tü pütchi aküjünakalü iipünaajee. Naapaiwaʼaya na israelitakana tia pütchikalü iipünaajee, nachuntuin maʼin nümüin Moisés shiyüʼülaainjatüin tia pütchikat.
20 Mmotshii naya sutuma naapüin tü pütchi aluwataanakalü anain, tü makat mayaa: «Jaʼitakajeʼe neʼe wanee mürüt eekai sürütkaain sünainmüin tü uuchikalü aʼinaʼannajatü süka ipa».
21 Keemasü maʼin tü kasa alatakat, anuujeseʼe nünüiki Moisés: «Kutkuttüshi taya sutuma mmoluin taya».
22 Arütkaapejeʼe jia sünainmüin tü uuchi kanüliakat Sión jee arütkaashii jia sünainmüin tü pueulo chakat nümaʼana chi Maleiwa matüjainkai outaa, shia tü Jerusalén chakat sirumatuʼu otta arütkaʼaleeshiʼiya jia nanainmüin watta naalii aapiee nümaʼanajeejanakana Maleiwa
23 jutkatakana, arütkaashii jia nanainmüin na niʼirumakana Maleiwa, na ashajinnakana anülia chaa sirumatuʼu, arütkaashii jia nünainmüin Maleiwa, chi süsalakai atuma saainjala wayuu süpüshuaʼa jee arütkaashii jia nanainmüin na wayuu lotokana akuwaʼipa wanaapünaa sümaa tü nüpülainkat Maleiwa jee alaʼajaanüsü naainjala naya wayuukana noulia.
24 Arütkaashii jia nünainmüin Jesús, chi akaalinjakai sünain apansaajaa wanee pütchi jeketü jee arütkaashii jia sünainmüin tü nüshakat, tü nütülittirakat waaʼu. Anaʼleesia tia nüshakat suulia tü nüshakat Abel.
25 Eeja jaaʼin suulia jiyoutajüin neʼe aapajaa nünüiki chi aashajaakai sirumatuʼujee. Sümaiwa paala na wayuu mmapaʼajanakana nnojotsü naapajüin nünüiki Maleiwa,* kasalajanakalaka namüin tia. Akaweenaʼaya waya, kasalajaneerü wamüin nnojoliire waapajüin nünüiki chi aashajaakai sirumatuʼujee.
26 Wanaa sümaa tia akutkujaasü tü mmakat sutuma nünüiki Maleiwa, anuupejeʼe nünüiki jooluʼu süchiki tü kasa alatajatkat: «Nnojoleerü shiain neʼe takutkujeʼerüin tü mmakat süchikuaʼa, akutkujaajeeriaʼaya tü sirumatuʼukat tatuma».
27 Sükajee tü pütchikat «süchikuaʼa» makat, wayaawata aaʼu sajaʼttinnajatüin tü kasa akutkujaakat, tü kasa akumajuushikat. Shieetkalaka eein neʼe tü kasa nnojotkalü akutkujaain.
28 Eʼreena waya tü kasa anasü eejeetkat nuluwataapeena Maleiwa, tia nnojotsü süpüla sukutkujeʼennüin, anakalaka ayatüleʼeya kapülain waaʼin kamaneein maʼin chi Maleiwakai wamüin. Wounteetkalaka waʼyataain nümüin chi Maleiwakai wanaapünaa sümaa tü kasa nüchekakat. Waaʼinrajatü tia sümaa kojutuin maʼin chi Maleiwakai wamüin.
29 Chi Wamaleiwasekai müshi aka saaʼin wanee siki ajaʼttiraleeka wanee kasa.
Noota
^ Pünaʼla tia suluʼu tü kanüliakat «Jamaluʼulu pütchikat».
^ Pünaʼla tia suluʼu tü kanüliakat «Sooʼomüin pütchi A5».
^ Pünaʼla tia suluʼu tü kanüliakat «Sooʼomüin pütchi A5».
^ Pünaʼla tia suluʼu tü kanüliakat «Jamaluʼulu pütchikat».
^ «Chi nüjütakai Maleiwa süpüla aapiraa wayuu» eesüjaʼa maluʼurüle tia.
